ރޯމް (އޮކްޓޫބަރު 15) - ޔުއެފާ ޗެމްޕިއަަންސް ލީގުގައި ރޭ ރެއާލް މެޑްރިޑުން 4-3 އިން ރޯމާ އަތުން ފަހަތުން އަރައި މޮޅުވިއިރު، އެންމެ ފަހުގެ ޗެމްޕިއަން، ޕީއެސްޖީން މެންޗެސްޓާ ސިޓީ ދަނޑުގައި 4-2 އިން އެ ޓީމު ބަލިކޮށްފި އެވެ.
އަމިއްލަ ދަނޑުގައި ރޯމާ އިން ވަނީ މާޓިން ޑެ ރޫންގެ ގޯލުން 20 ވަނަ މިނިޓްގައި ލީޑުނަގައިފަ އެވެ. އެކަމަކު، އޭގެ ފަސް މިނިޓް ފަހުން ކީލިއަން އެމްބާޕޭ ވަނީ ލަނޑު ޖަހައި އެއްވަރުކޮށްފަ އެެވެ.
ދެ ވަނަ ހާފުގައި ކުޅުން ފަށައިގެން، ނެދަލެންޑްސްގެ ފޯވާޑް، ޑޮންޔެލް މާލެން ވަނީ ދެ ލަނޑު ޖަހައި، ރޯމާ އަށް ދެ ގޯލުގެ ލީޑެއް ނަގައިދީފަ އެވެ. އަދި، އެ ލީޑާ އެކު، މެޗުގެ 83 ވަނަ މިނިޓާ ހަމައަށް ރޯމާ އޮތީ ކުރީގަ އެވެ. އެހެން ނަމަވެސް ބަދަލު ކުޅުންތެރިން ދެއްކި ތަފާތާ އެކު، ހޯސޭ މޮރީނިއޯގެ ރެއާލް މެޑްރިޑުން ނަތީޖާ އަނބުރާލީ އެވެ.
މެޗުގެ 83 ވަނަ މިނިޓްގައި ކާލޮސް އެސްޕީ ވަނީ ރެއާލްގެ ދެ ވަނަ ލަނޑު ޖަހައިފަ އެވެ. އަދި، އޭގެ ދެ މިނިޓް ފަހުން، އެންޑްރިކް ވަނީ ލަނޑު ޖަހައި ރެއާލަށް އެއްވަރުކޮށްދީފަ އެވެ. މެޗުން ރެއާލް މޮޅުވި ލަނޑު ޖެހީ ކުރީން ރޯމާ އަށް ވެސް ކުޅުނު ޖަރުމަނުގެ ޑިފެންޑަރު، އެންޓޯނިއޯ ރޫޑިގާ އެވެ.
އެންމެ ފަހުން ދެ ސީޒަނުގެ ޔޫރަޕްގެ ޗެމްޕިއަން، ޕީއެސްޖީން ވަނީ ރޭގެ މެޗުގެ 32 މިނިޓް ތެރޭ ތިން ލަނޑުގެ ލީޑެއް ނަގައިފަ އެވެ. މި ލަނޑުތައް ޖެހީ ޑެޒީރޭ ޑޫއޭ، އޮސްމާން ޑެމްބެލޭ އަދި ވިޓީނިއާ އެވެ. އާލިން ބްރައުޓް ހާލަންޑް ވަނީ ދެ ވަނަ ހާފުގެ ހަ ވަނަ މިިނިޓްގައި ސިޓީ އަށް ފުރަތަމަ ލަނޑު ޖަހައިދީފަ އެވެ.
އެކަމަކު، މެޗުގެ 62 ވަނަ މިނިޓްގައި، މަގްނެސް އަކްލިއޫޝް ވަނީ ޕީއެސްޖީގެ ހަތަރު ވަނަ ލަނޑު ޖަހައިފަ އެވެ. ސިޓީ އަށް މެޗުގައި އެ ޓީމުގެ ދެ ވަނަ ލަނޑު ޖަހައިދިނީ، 75 ވަނަ މިނިޓްގައި ހާލަންޑް އެވެ.
ލިވަޕޫލުން ވަނީ ރޭ ބްރެޑްލީ ބާކޮލާގެ ހެޓްރިކާ އެކު، 6-3 އިން އޮސްޓްރިއާގެ ލާސްކް ބަލިކޮށްފަ އެވެ. އެސްޓަން ވިލާ އިން 6-0 އިން ފެނަބާޗޭގެ މައްޗަށް ކުރިހޯދިއިރު، ފެޔަނޫޑުން 3-2 އިން ކޯމޯ ބަލިކުރި އެވެ. އަދި، މި ސީޒަނުގައި މޮޅު ކުޅުމެއް ދައްކަމުން އަންނަ ރެއާލް ބެޓިސް އިން 3-2 އިން ޕޯޓޯ ބަލިކުރި އެވެ.
