ޕެރިސް (އޮކްޓޫބަރު 21) - ޔުއެފާ ޗެމްޕިއަންސް ލީގުގައި ރޭ ބާސެލޯނާ އަތުން 4-2 އިން މޮޅުވި، ޕީއެސްޖީގެ ޖޯޖިއާ ތަރި، ކްވިޗާ ކްވަރަޝްކޭލިއާގެ ކަކުލަށް ސީރިއަސް އަނިޔާއެއްވުމާ ގުޅިގެން އޭނާ އަށް ދެން މި ސީޒަނުގައި ކުޅެވުމުގެ ފުރުސަތު ކުޑަވެއްޖެ އެވެ.
ރޭގެ މެޗުގައި ބާސެލޯނާގެ ޒަވީ އެސްޕާޓް، ބޯޅަ ހޯދަން އުޅުމުގެ ތެރޭގައި ކްވަރަޝްކޭލިއާގެ ކަކުލަށް އަނިޔާވުމާ ގުޅިގެން ފަރުވާ ހޯދުމަށް ފަަހު، މެޗުގެ 59 ވަނަ މިނިޓްގައި ބަދަލުކުރީ އިތުރަށް ކުރިއަށްނުގެންދެވިގެންނެވެ.
އަނިޔާގެ ތަފްސީލް ދެނެގަންނަން ހެދި ޓެސްޓްތަކުން އެނގިގެންދިޔައީ، ކްވަރަޝްކޭލިއާ، 25، ގެ ކަކުލުގެ އެންޓީރިއޯ ކްރޫޝިއޭޓް ލިގަމެންޓް (އޭސީއެލް) އިރައިގެން ގޮސްފައިވާ ކަމެވެ. ޕީއެސްޖީން ވަނީ ކްވަރަޝްކޭލިއާގެ އޮޕަރޭޝަން ވަރަށް އަވަހަށް ކުރާނެ ކަމަށް ބުނެފަ އެވެ. އެކަމަކު، އޭނާ އަށް ދެން އެނބުރި ދަނޑަށް އާދެވޭނެ މުއްދަތަކާ ބެހޭގޮތުން، ޕީއެސްޖީން ވަކި އެއްޗެއް ހާމައެއް ނުކުރެ އެވެ.
އެކަމަކު، އާންމުކޮށް މި ފަދަ އަނިޔާގެ މައްސަލަތަކުގައި ކުޅުންތެރިން އެނބުރި ދަނޑަށް ނުކުމެވެނީ، 6-9 މަސް ތެރޭގަ އެވެ. އެ އަށް ވުރެން ބައެއް ކުުޅުންތެރިންގެ ރިކަވަރީ މުއްދަތު ދިގުވެފައިވާ ފަހަރު ވެސް އައިސްފައިވެ އެވެ.
އިޓަލީގެ ނަޕޯލީ ދޫކޮށް މިދިޔަ އަހަރުގެ ޖެނުއަރީ މަހު ޕީއެސްޖީ އަށް ބަދަލުވި ކްވަރަޝްކޭލިއާ އަކީ މިދިޔަ ދެ ސީޒަނުގައި ޕީއެސްޖީން ޗެމްޕިއަންސް ލީގު ކާމިޔާބުކުރިއިރު، މޮޅު ކުޅުމެއް ދެއްކި ކުޅުންތެރިއެކެވެ. އަދި، މި ސީޒަނުގައި ޕީއެސްޖީން މިހާތަނަށް ކުޅުނު 11 މެޗެއްގައި ކްވަރަޝްކޭލިއާ ވަނީ ކުޅެފަ އެވެ.
ކްވަރަޝްކޭލިއާ އަށް އަނިޔާވިއިރު، ޕީއެސްޖީން ކުރިއަށް ހުރި މެޗުތަކުގައި ކުޅެން ޖެހޭނީ މާކީނިއޯސް އާއި އޮސްމާން ޑެމްބެލޭ ވެސް ނުލަ އެވެ. އެ ކުޅުންތެރިންނަށް ވެސް ވަނީ އަނިޔާގެ މައްސަލަތަކެއް ކުރިމަތިވެފަ އެވެ.
