ރަސްމާލޭގައި ކާފަރުން ވަޒަންވެެރި ކުރުވުމާ ގުޅޭ ގޮތުން، އިސްލާމީ ދީން ހިމާޔަތް ކުރުމުގެ މަގްސަދުގައި ހަރަކާތްތެރިވާ ޖަމިއްޔަތުއްސަލަފުން ނެރުނު ބަޔާނަށް އަދަދު ގައި ޖެހި ހަބަރު އެ ޖަމިއްޔާއިން ވަނީ ދޮގުކޮށްފަ އެވެ.
"ޝަރުތުތަކަކާއެކު އެހެން ދީންތަކުގެ މީހުން ރާއްޖޭގައި ވަޒަންވެރިކުރުވަން ސަލަފު ޖަމިއްޔާއިން ތާއީދުކޮށްފި"، މި ސުރުހީގެ ދަށުން މި ނޫހުގައި ޖަހާފައި ވަނީ ގޯސް ހަބަރެއް ކަމަށް ބުނެ ސަލަފް ޖަމިއްޔާއިން ސޯޝަލް މީޑިއާ ޕްލެޓްފޯމް އެކްސްގައި އިތުރު ބަޔާނެއް ނެރުނީ ރޭ ދަންވަރު 12:07 ގަ އެވެ.
"ދިވެހިރާއްޖޭގައި އެހެން ދީންތަކުގެ މީހުން ވަޒަންވެރިކުރަން ޖަމިއްޔަތުއްސަލަފުން ތާއީދު ކުރާ ކަމަށް ބުނެ ބައެއް ނޫސްތަކުން ފަތުރާ ހަބަރަކީ ކަނޑައެޅިގެން ދޮގު ހަބަރެއް! ޖަމިއްޔަތުއްސަލަފުން ކުރި އިލްތިމާސްއަކީ ތަރައްގީގެ ކޮންމެ މަޝްރޫއުއެއްގައި ވެސް ދިވެހިރާއްޖޭގެ ސައްތައިންސައްތަ އިސްލާމީވަންތަކަން ކަށަވަރުވާންޖެހޭނެ ކަމާއި ދިވެހިރާއްޖޭގެ އިސްލާމީ ޝަހުސިއްޔަތަށް ބުރޫއަރާފަދަ އެއްވެސް ކަމަކަށް ޖާގަދެވިގެންނުވާނެކަން!،" ރޭގެ ބަޔާނުގައި ބުނެފައިވެ އެވެ.
ސަލަފް ޖަމިއްޔާއިން ބަޔާނެއް ނެރުމުގެ އިތުރުން، އެ ޖަމިއްޔާގެ ރައީސް، ރައީސް މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދުގެ އެއްބަފާ ބޭބެ، އަބްދުﷲ ބިން ޖަނާބު ވެސް ވަނީ މި ނޫހުގެ ހަބަރު ދޮގުކޮށް އެކްސްގައި ރޭ ޕޯސްޓެއް ކުރައްވާފަ އެވެ. އޭނާގެ ޕޯސްޓުގައި މި ނޫހުގެ ހަބަރު ސިފަ ކުރައްވާފައި ވަނީ "ޕްރޮޕެގެންޑާ" ގެ ގޮތުގަ އެވެ.
"ދިވެހިރާއްޖޭގައި އެހެން ދީންތަކުގެ މީހުން ވަޒަންވެރިކުރުމަށް ޖަމްއިއްޔަތުއް ސަލަފުން ތާއީދު ކުރާ ކަމަށް ބުނެ ބައެއް ނޫސްތަކުން ފަތުރާ ޕްރޮޕެގެންޑާ އަކީ ކަނޑައެޅިގެން ދޮގު ހަބަރެއް! ޖަމްއިއްޔަތުއްސަލަފް އިން އިލްތިމާސްކުރީ ތަރައްގީގެ ކޮންމެ މަޝްރޫއެއްގައި ވެސް ދިވެހިރާއްޖޭގެ ސައްތައިންސައްތަ އިސްލާމީވަންތަކަން ކަށަވަރުވާންޖެހޭނެކަން! އަދި ކޮންމެ ސަރުކާރަކުން ވެސް ރާއްޖޭގެ އިސްލާމީ ޝަހުސިއްޔަތު ދަމަހައްޓައި އެކަމަށް ބުރޫއަރާ އެއްވެސް ކަމެއް ކޮށްގެން ނުވާނެކަން! ދަންނައެވެ! ހެޔޮ ނިމުން ހުރީ ތަގްވާވެރިންނަށް،" އަބްދުﷲ ގެ ޕޯސްޓުގައި ބުނެފައިވެ އެވެ.
އެކަމަކު، ސަލަފުން އެހެން ބުނި ނަމަވެސް، ރަސްމާލެ މައްސަލައިގައި އެ ޖަމިއްޔާއިން ނެރުނު ބަޔާނުގައި، ވަކި ޝަރުތުތަކެއް ކަނޑައެޅުމަށްފަހު ކާފަރުން ރާއްޖޭގައި ވަޒަންވެރިވުމަކީ މައްސަލައެއް ނޫންކަން ވަރަށް ސާދާކޮށް ބުނެފައިވެ އެވެ.
ސަލަފުގެ ބަޔާނުގެ ފުރަތަމަ ބައިގައި ވަނީ ރަސްމާލޭގެ މަޝްރޫއުގެ ކޮންސެޕްޓަކީ ކޮބައިކަން ކިޔައިދީފަ އެވެ. ބަޔާނުގައި ބުނެފައިވާ ގޮތުން އެ ޕްރޮޖެކްޓުގެ ދަށުން ރަސްމާލޭގައި އަޅާ ތަންތަން 99 އަހަރަށް ކުއްޔަށް ހިފުމުގެ ހައްގު ބިދޭސީންނަށް ލިބޭނެ އެވެ. އަދި "ދިގު މުއްދަތަކަށް އެ ތަނުގައި އައިސް ތިބުމުގެ ހައްގު" ވެސް އެ ޕްރޮޖެކްޓުގެ ދަށުން ބިދޭސީންނަށް ލިބޭނެ ކަމަށް ސަލަފުގެ ބަޔާނުގައި ބުނެފައިވެ އެވެ.
ރަސްމާލޭގައި ބިދޭސީން ދިގު މުއްދަތަކަށް އައިސް ތިބުމުގެ ހައްގު އެ ޕްރޮޖެކްޓުގެ ދަށުން ލިބޭނެ ކަމަށް ސަލަފުގެ ބަޔާނުގައި ބުނެފައިވާއިރު، ދިވެހި ބަހުގެ ރަދީފުގައިވާ ގޮތުން، ވަޒަންވެރިވުން، މި ބަހުގެ މާނައަކީ "ތަނެއްގައި ގެދޮރު އަޅައިގެން ދިރިއުޅެން ފެށުން" އެވެ.
އޭގެ އިތުރުން، ސަލަފުގެ ބަޔާނުގައި ރަސްމާލޭގެ ޕްރޮޖެކްޓު ސިފަކޮށްފައި ވަނީ "ތަފާތު ދީންތަކާއި ސަގާފަތްތަކަށް ނިސްބަތްވާ ބޭރުގެ ގިނަ އަދަދެއްގެ މީހުން ދިގު މުއްދަތަކަށް ތިބޭނެ" ޕްރޮޖެކްޓެއްގެ ގޮތުގަ އެވެ. ރަސްމާލޭ ޕްރޮޖެކްޓު އެގޮތަށް ސިފަ ކުރުމަށްފަހު ސަލަފުން ކިޔައިދީފައި ވަނީ، އެފަދަ ޕްރޮޖެކްޓެއްގެ އެއްބަސްވުންތަކާއި ގާނޫނީ އޮނިގަނޑު އެކުލަވާލަންޖެހޭ ގޮތެވެ.
"... އެހެންކަމުން ރަސްމާލެ މަޝްރޫއު ހިމެނޭހެން، ތަފާތު ދީންތަކާއި ސަގާފަތްތަކަށް ނިސްބަތްވާ ބޭރުގެ ގިނަ އަދަދެއްގެ މީހުން ދިގު މުއްދަތަކަށް ތިބޭނެ މިފަދަ ހާއްސަ ސަރަހައްދުތަކުގެ ސަބަބުން މުސްތަގްބަލުގައި ދީނީ މިނިވަންކަމަށް ވަކާލާތު ކުރުމުގެ ފުރުސަތު ފަހިވެ، ދިވެހި މުޖްތަމައުގެ އިސްލާމީ ޝަހުސިއްޔަތަށާއި ގައުމުގެ ސިޔާދަތާއި މިނިވަންކަމަށާއި ޒަމާނުއްސުރެ ދަމަހައްޓަމުން އައި އިސްލާމީ ގައުމީ އުސޫލުތަކަށާއި ގާނޫނުއަސާސީން ކަށަވަރުކޮށްދީފައިވާ ސައްތައިން ސައްތަ އިސްލާމީ ދައުލަތެއްގެ ގޮތުގައި ދެމިއޮތުމުގެ ދުސްތޫރީ ނިޒާމަށް އެއްވެސް ނޭދެވޭ އަސަރެއް ނުފޯރާނެ ފަދަ ހަރުދަނާ އުސޫލެއްގެ މަތިން އެއްބަސްވުންތަކާއި ގާނޫނީ އޮނިގަނޑު އެކުލަވައިލުމަށް އަދުގެ ސަރުކާރަށާއި މުސްތަގްބަލުގައި އަންނަން އޮތް ސަރުކާރުތަކަށް އިހުލާސްތެރިކަމާއެކު އަޅުގަނޑުމެން އިލްތިމާސް ކުރަން."
އެހެންކަމުން، (1) ދީނީ މިނިވަންކަމަށް ވަކާލާތު ކުރުމުގެ ފުރުސަތު ބަންދުކޮށް، (2) މުޖްތަމައުގެ އިސްލާމީ ޝަހުސިއްޔަތާއި ގައުމުގެ ސިޔާދަތާއި މިނިވަންކަމާއި އިސްލާމީ ގައުމީ އުސޫލުތައް ހިމާޔަތްކޮށް، (3) ރާއްޖޭގައި އޮންނާނީ ސައްތައިން ސައްތަ އިސްލާމީ ދައުލަތެއްކަން އެއްބަސްވުމުންނާއި ގާނޫނީ އޮނިގަނޑުން ކަށަވަރު ކުރުމަށްފަހު، ކާފަރުން ރާއްޖޭގައި ވަޒަންވެރިކުރުވުނުގެ ދޮރު ހުޅުވާލައި، ދީނީ ނަޒަރުން އެ ޖަމިއްޔާއިން ވަނީ އެކަމަށް ތާއީދުކޮށްފަ އެވެ.
