ރަސްމާލެ ވިއްކާލާ މަޝްރޫއުއާ ގުޅިގެން ދީނީ ގޮތުން އާންމުންގެ މެދުގައި ކަންބޮޑުވުންތައް ހުރި ކަންކަމާ ގުޅިގެން އިސްލާމިކް މިނިސްޓްރީން ބަސް ނުބުނެ ތިބޭތީ ކުރީގެ ރައީސް އަބްދުﷲ ޔާމީން އެ ކަމަށް ރޭ ފާޑުވިދާޅުވެއްޖެ އެވެ.
ޕީއެންއެފް އިން ބޭއްވި ޖަލްސާގައި ޔާމީން ވިދާޅުވީ ދީނީގޮތުން ތަންދޮރު ދަންނަދާ ފުށިދިއްގަރުފަޅުން އެއްބައި އިޒްރޭލަށް ވާގިވެރިވާ ޔޫއޭއީގެ އީގަލް ހިލްސްއަށް ދޫކޮށްލުމުގެ ކަންކަން ކުރިއަށްގެންދާއިރު އަދި އިސްލާމްދީނާ ފުށުއަރާ ކަންތައްތަކެއް ހުރި ސަމޯއާ އެގްރީމަންޓް ފަދަ އެއްބަސްވުމުގައި މި ސަރުކާރުން ސޮއިކުރިއިރު ދީނީ ގޮތުން ތަންދޮރު އެނގޭ މީހުންނަށް އެކަން ނުހުއްޓުވުނު ކަމަށެވެ.
އެމަނިކުފާނު ވިދާޅުވީ އިސްލާމިކް މިނިސްޓަރު ޑރ. މުހައްމަދު ޝަހީމާއި އެ މިނިސްޓްރީން ވެސް މިހާތަނަށް ރައްޔިތުންގެ ކަންބޮޑުވުންތަކާ ގުޅިގެން އެއްޗެއް ނުބުނާ ކަމަށާއި އިސްލާމިކް މިނިސްޓްރީން އެކަންބޮޑުވުންތަކާ ގުޅިގެން ކުރާ ކަމެއްވެސް ނެތް ކަމަށެވެ.
"ދީނީގޮތުން ތަންދޮރު ދަނެގެން އަންނަ މީހުން މިކަންކަން [ރަސްމާލެ ވިއްކާލުން] ނުހުއްޓުވަންޏާ އަޅުގަނޑުމެންގެ ޒިންމާއަކަށް ވާންޖެހޭތަ. އަޅުގަނޑަކަށް ނުވިސްނޭ ދެން އަންނަ ސަރުކާރުން އިސްލާމީ ކަންތައްތަކާ ބެހޭ މިނިސްޓްރީއެއްވެސް އޮންނަން ޖެހޭނެ ކަމަށް އެނގޭތޯ،" ޔާމީން ވިދާޅުވި އެވެ.
"ކީއްތޯ މިއަދު އިސްލާމިކް މިނިސްޓަރު ކުރަނީ ނޫނީ އިސްލާމިކް މިނިސްޓްރީން މިކަންކަމާ ކީއްތޯ ކުރަނީ. ތިއޮތީ ސަމޯއާ އެގްރީމަންޓް. ކަމެއް ކޮށްފިތޯ. އެތިބީ ބޮޑުތަނުން އޭގައި ދިވެހި ދައުލަތުން ސޮއިކޮށްގެންނެއް ނޫންތޯ."
ރަސްމާލެ ވިއްކާލުމަކީ ވިޔަފާރީގެ މަޝްރޫއެއް ގޮތަށް ދީނީ އިލްމުވެރިން ދެކޭކަން ފާހަގަކުރައްވަން ޔާމީން ވިދާޅުވީ އެ އިލްމުވެރިން ދެކޭ ގޮތުގައި ޔަހޫދީންނަކީ އަދާވާތްތެރިން ނޫން ކަމަށެވެ. ނަމަވެސް އެމަނިކުފާނު ވިދާޅުވީ އެއްބަސްވުމުގެ ދަށުން ރާއްޖެ އަންނަ މީހުން ކެސީނޯ އަޅައި ދިނާ ހިލާފު ކަންކަން ކުރާނެ ކަމަށެވެ.
"ރަސްމާލެއަށްވުރެ ކުރިން މިތިބީ ސަމޯއާ އެގްރީމަންޓްގައި ސޮއިކޮށްގެން އެނގޭތޯ. ރަސްމާލޭގެ ވާހަކައިގައި ދީނީ އިލްމުވެރިން ދެކެނީ މިއީ ވިޔަފާރީގެ ޕްރޮޖެކްޓެއްގެ ގޮތުގައި. އެމީހުން ނުދެކޭ ޔަހޫދީންނަކީ އަދާވާތްތެރިން ކަމަށް. މިތަނަށް އައިމަ ކެސީނޯ އަޅާނެ ކަމަށް،" ޔާމީން ވިދާޅުވި އެވެ.
ދައުލަތުން ބޮޑު ހަރަދުކޮށްގެން ހިއްކި ރަސްމާލޭގެ ބިމުން 500 ހެކްޓަރު އީގަލް ހިލްސްއަށް ދޫކޮށްލުމަށް ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
ރަސްމާލޭގެ އެއްބައި އީގަލް ހިލްސްއަށް ދޫކޮށްލާތީ އާއި އެ ކުންފުނީގެ ވެރިޔާ އަލައްބާރު އަކީ އިޒްރޭލްގެ އެކުވެރިއެއް އަދި މަދަދުވެރިއަކަށް ވުމުން ދީނީ އިލްމުވެރިންނާއި އިދިކޮޅު ޕާޓީތަކުން ދަނީ ކަންބޮޑުވުން ފާޅުކުރަމުންނެވެ. އެ މަޝްރޫއުގެ ސަބަބުން ރާއްޖޭގެ އެހެން ދީންތަކުގެ މީހުން ރާއްޖޭގައި ވަޒަންވެރިވުމަށް ފުރުސަތު ހުޅުވިގެންދާތީވެ ރައްޔިތުންގެ ފެންނަ ނުފެންނަ ވޯޓެއް ނެގުމަށް، މި މަޝްރޫއުއާ ދެކޮޅަށް މަސައްކަތްކުރާ "ގައުމީ ހަރަކާތުން" އަދި އިދިކޮޅު އެމްޑީޕީން ވަނީ ގޮވާލާފަ އެވެ.
ސަމޯއާ އެއްބަސްވުމުގައި އޯއޭސީޕީއެސް ގެ 79 ގައުމު އަދި ޔޫރަޕިއަން ޔޫނިއަންގެ 27 ގައުމު ސޮއިކޮށްފައިވެ އެވެ. ރާއްޖެ އޯއޭސީޕީއެސްގެ ފުރިހަމަ މެމްބަރު ގައުމަކަށްވެފައިވަނީ ޑިސެމްބަރު 9, 2022 ގަ އެވެ.
