ހުރިހާ ދިވެހިން ހިއްސާވާ ރިސޯޓުތަކެއް ތަރައްގީކުރަން ރައީސް މުހައްމަދު މުއިއްޒު ވެވަޑައިގެންނެވި ވައުދު ފުއްދުމަށްޓަކައި އެކަމަށް ހާއްސަ ކުންފުންޏެއް މިއަދު އުފައްދަވައިފި އެވެ.
ހުރިހާ ދިވެހިން ހިއްސާވާ ރިސޯޓުތައް ތަރައްގީ ކުރުމަށްޓަކައި މުއިއްޒު ކުންފުންޏެއް އުފެއްދެވީ "ދިވެހީންގެ ރިސޯޓް ހިއްސާ ކޯޕަރޭޝަން" ގެ ނަމުގަ އެވެ.
ރައީސް އޮފީހުން ބުނީ އެ ކުންފުންޏަކީ ސައްތަ އިންސައްތަ ސަރުކާރު ހިއްސާވާގޮތަށް ތިމާވެށި ރައްކާތެރިކުރުމާއި އިއާދަކުރަނިވި ހަކަތައަށް އިސްކަންދީގެން ބައިނަލްއަގުވާމީ ފެންވަރުގެ ރިސޯޓުތަކާއި ފަތުރުވެރިކަމާ ގުޅުންހުރި އެހެނިގެން ވަސީލަތްތައް ތަރައްގީކޮށް ހިންގުމަށް އުފެއްދި ކުންފުންޏެއް ކަމަށެވެ.
ދިވެހިން ހިއްސާވާ ރިސޯޓުތަކަކީ މި އަހަރުގެ ރިޔާސީ ބަޔާން އިއްވަވަމުން މުއިއްޒު އިއުލާންކުރެއްވި ކަމެކެވެ. އެ ދުވަހު އެމަނިކުފާނު ވިދާޅުވީ 10 ރިސޯޓެއް ތަރައްގީކޮށް، ރާއްޖޭގެ ކޮންމެ ރައްޔިތަކަށް ބޭރު ފައިސާ ޖަމާކޮށްދޭނެ ކަމަށެވެ.
"މަދުވެގެން 10 ރިސޯޓު ތަރައްގީކޮށް، އެ ރިސޯޓުތަކުން ދޭ ފައިދާގެ ބޮޑު ބައެއް ހަމަ އެއްވެސް ރައްޔިތަކު ބާކީ ނުކޮށް، ރާއްޖޭގެ ކޮންމެ ރައްޔިތެއްގެ ބޭންކް އެކައުންޓަށް ހަމަހަމަކަމާއެކު އަހަރަކު އެއްފަހަރު ބޭރު ފައިސާއިން ޖަމާކޮށްދޭނަން،" ފެބްރުއަރީ 5، ގައި މުއިއްޒު ވިދާޅުވި އެވެ.
މުއިއްޒު އެ ދުވަހު ވިދާޅުވީ އެ ޕްރޮޖެކްޓުގެ ދަށުން ސަރުކާރުން ތަރައްގީ ކުރާ ހުރިހާ ރިސޯޓެއްގެ ހިއްސާ ގާނޫނަކުން ހުރިހާ ރައްޔިތުންނަށް ވެސް ބައްސަވާނެ ކަމަށެވެ.
"އަދި ދިވެހިރާއްޖޭގެ ކޮންމެ ރައްޔިތަކީ މި މަޝްރޫއުގެ ދަށުން ތަރައްގީ ކުރެވޭ ހުރިހާ ރިސޯޓެއްގެ ހިއްސާދާރެއް ކަމުގައި ހަމަހަމަކަމާއެކު ގާނޫނަކުން ކަނޑައަޅައި ހަމަޖައްސާނަން،" އެމަނިކުފާނު ވިދާޅުވި އެވެ.
"މި މަޝްރޫއުގެ ދަށުން ތަރައްގީ ކުރާ ރިސޯޓުތަކުގެ ފައިދާ ދިވެހި ރައްޔިތެއްގެ އައިޑީކާޑު އޮތް ކޮންމެ ރައްޔިތަކަށް، ހަމަހަމަކަމާއެކު، އަހަރުން އަހަރަށް ލިބި، ރާއްޖޭގެ ތާރީހުގައި ފުރަތަމަ ފަހަރަށް ދިވެހި ފަތުރުވެރިކަމުގެ ސީދާ ހިއްސާދާރަކަށް ދިވެހި ކޮންމެ ރައްޔިތުންވެ، ކޮންމެ ރައްޔިތަކަށް ސީދާ ގޮތުން މާލީ މަންފާ އިރާދަކުރެއްވިއްޔާ ޖަމާވާން ފަށާނެ،" މުއިއްޒު ވިދާޅުވި އެވެ.
މުއިއްޒު ވިދާޅުވީ ކުރިއަށް އޮތް ހަތަރު އަހަރު ތެރޭގައި ރިސޯޓުތައް ތަރައްގީކޮށް، އެ ރިސޯޓުތަކުން ލިބޭ ފައިސާ ރައްޔިތުންގެ އެކައުންޓުތަކަށް ޖަމާވާން ފަށާނެ ކަމަށެވެ.
"އަންދާޒާ ކުރެވެނީ މި އިންވެސްޓްމަންޓުން ދިވެހި ރައްޔިތުންގެ އެކައުންޓަށް ފައިސާ ޖަމާވާން ފަށާނީ 2030 ވަނަ އަހަރުން ފެށިގެން ކަމަށް. ހިސާބު ހަދާލާއިރު އެވްރެޖްކޮށް ކޮންމެ ރައްޔިތެއްގެ އެކައުންޓަށް އިރާދަކުރެއްވިއްޔާ އަހަރަކު މަދުވެގެން 400 ޑޮލަރު ޖަމާވެގެންދާނެ،" އެމަނިކުފާނު ވިދާޅުވި އެވެ. "މިކަން ހަގީގަތަކަށް ހެދުމަށް ކުރަންޖެހޭ އެންމެހާ ކަންކަން ވަރަށް ހަލުވިކަމާއެކީގައި އިރާދަކުރެއްވިއްޔާ ކުރިއަށްގެންދާނަން."
ދިވެހިން ހިއްސާވާ ރިސޯޓުތައް ތަރައްގީ ކުރުމަށް ހާއްސަ ކުންފުންޏެއް އުފައްދައިފައިވާއިރު، އެ ކަމަށް ހަރަދު ކުރާނެ ގޮތެއް ނޫނީ އެ ހަރަދު ކުރާ ފައިސާ ހޯދާނެ ގޮތެއް ސަރުކާރަކުން އަދި ނުބުނެ އެވެ.
ރާއްޖޭގެ މަޝްހޫރު ޓްރެވަލް އެޖެންސީއެއް ކަމުގައި ރިސޯޓު ލައިފުން އަންދާޒާ ކުރާ ގޮތުގައި، 100 އެނދުގެ ޕްރީމިއަމް ނުވަތަ ހަތަރު ތަރީގެ ރިސޯޓެއް ތަރައްގީކުރަން މަދުވެގެން 40 މިލިއަން ޑޮލަރު ހަރަދު ވާނެ އެވެ. މިހެންކަމުން މި ރޭންޖުގެ 10 ރިސޯޓު ތަރައްގީކުރަން މަދުވެގެން 400 މިލިއަން ޑޮލަރު ބޭނުން ވާނެ އެވެ.
