ރައީސް މުހައްމަދު މުއިއްޒު މަސައްކަތް ކުރައްވަނީ ޒަޔަނިޒަމް ދިރުވައި އާލާކުރަން ކަމަށާއި، އެއީ ދިވެހި އިސްލާމީ އުއްމަތަށް ދެވޭނެ އެންމެ ބޮޑު އަނިޔާކަމަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަލީ ހުސައިން ރޭ ވިދާޅުވެއްޖެ އެވެ.
ދިވެހި ރައްޔިތުންގެ ފައިސާއިން ފުށިދިއްގަރުފަޅު (ރަސްމާލެ) ހިއްކުމަށް ފަހު، އެއްވެސް ބީލަމަށް ނުލައި ހިލޭ ޔޫއޭއީގެ އީގަލް ހިލްސްއަށް ދޫކޮށްލަން މުއިއްޒު މަސައްކަތް ކުރައްވާތީ އެކަން ހުއްޓާލަން ގޮވާލައި ރޭ އާޓިފިޝަލް ބީޗު ސަރަހައްދުގައި ބޭއްވި އެއްވުމުގައި އަލީ ހުސައިން ވިދާޅުވީ މުއިއްޒު ވެރިކަމަށް ވަޑައިގަތީ ދީނުގެ ދިފާއުގައި މަސައްކަތްކުރައްވާނެކަމަށް ވިދާޅުވެ ކަމަށާއި، ނަމަވެސް މިއަދު ފެންނަނީ މުޅިން ތަފާތު މަންޒަރެއްކަމަށެވެ.
އަލީ ހުސައިން ތުހުމަތު ކުރެއްވި ގޮތުގައި އިޒްރޭލަށް ވާގިވެރިވާ ބިލިޔަނަރު އަލައްބާރުގެ އީގަލް ހިލްސްއިން ތަރައްގީކުރާ ރަސްމާލެ ވޯޓާ ފްރޮންޓް އެންޑް މެރީނާ މަޝްރޫއުއަކީ އެހެން ދީންތަކުގެ މީހުން ރާއްޖޭގައި ވަޒަންވެރިވެ އުޅުމަށް މަގުފަހިކުރަން ރާވައި ހިންގާ މަޝްރޫއެކެވެ.
ދުނިޔޭގެ ބޮޑެތި ގައުމުތަކުގައި ޒަޔަނިޒަމަށް އޮތް ތާއީދު ކުޑަވަމުންދާކަން ފާހަގަކުރައްވައި އަލީ ހުސައިން ވިދާޅުވީ، ޒަޔަނިޒަމް މިހާރު އޮތީ އޭގެ އެންމެ ފަހުގެ ދުވަސްތަކުގައި ކަމަށެވެ. އެހެންނަމަވެސް ރައީސް މުއިއްޒު މި އުޅުއްވަނީ އަލުން ޒަޔަނިސްޓުން ގެނެސްފައި ދިވެހިރާއްޖޭގައި އާބާދުކޮށް، ޒަޔަނިޒަމް ދިރުވަން ކަމަށް އޭނާ ތުހުމަތު ކުރެއްވި އެވެ.
"އިސްލާމްދީނަށް ދެވޭނެ އެންމެ ބޮޑު އަނިޔާއަކީ ދިވެހިރާއްޖޭގައި މި ސަތޭކަ ޕަސެންޓް ދިވެހިންގުޅޭ ދިވެހި ފަސްގަނޑުގައި ޒަޔަނިސްޓުން ގެނެސް ޣައިރުދީންތަކުގެ މީހުން ގެނެސް އާބާދުކުރުވުން،" އަލީ ހުސައިން ވިދާޅުވި އެވެ.
"ނުވަސަތޭކަ އަހަރު ވަންދެން ދިވެހިރާއްޖޭގައި މިއޮތް އިސްލާމްދީނަށް މިހާތަނަށް މީހަކު ދިން އެންމެ ބޮޑު އުދުވާން، އެންމެ ބޮޑު ހަމަލާދޭ މީހަކަށް މިއަދު ތިވީ ސީދާ ރައީސް މުއިއްޒު."
ނަމަވެސް، މި ހަފުތާގެ ނޭޝަން ޗެޓް ޕްރޮގްރާމުގައި މުއިއްޒު ވިދާޅުވީ ޒަޔަނިޒަމްއާ ދެކޮޅަށް ފާޅުގައި ވަކާލާތު ކުރަން ކެރުނު ހަމައެކަނި ރައީސަކީ އެމަނިކުފާނު ކަމަށެވެ.
އިޒްރޭލްގެ ޕާސްޕޯޓު މަނާކުރުމުގެ މައްސަލައަށް އިޝާރާތްކުރައްވައި އަލީ ހުސައިން ވިދާޅުވީ، ޒަޔަނިސްޓުންނަކީ ދެ ޕާސްޕޯޓު ގެންގުޅޭ ބައެއް ކަމަށާއި، ހަމައެކަނި ޕާސްޕޯޓު ބޭން ކުރުމަކުން ނުފުދޭ ކަމަށެވެ.
ރަސްމާލޭގައި އަލައްބާރު ހިންގާ މަޝްރޫއުއަކީ، މިހާރު އިޒްރޭލް ޕާސްޕޯޓުގައި ފަތުރުވެރިންގެ ގޮތުގައި މިހާރު ރާއްޖެ ނާދެވޭތީ، އިންވެސްޓަރުންގެ ގޮތުގައި ރާއްޖެއަށް އައުމަށް ކުރާ ކަމެއް ކަމަށެވެ. މިކަމުގައި ސަރުކާރު ހިންގާ ޕީއެންސީގެ މެންބަރުން ބައިވެރިނުވުމަށް އޭނާ ގޮވާލެއްވިއެވެ.
"ތިޔަބޭފުޅުންގެ ނަމުގައި މިކަން ކުރިއަނުދެއްވާށޭ. ތިބޭފުޅުންނަކީ މި ދިވެހި ގައުމަށް ޣައްދާރުވާ މީހުންގެ ގޮތުގައި ނުވެވަޑައިގަންނަވާށޭ،" އަލީ ހުސައިން ވިދާޅުވި އެވެ.
އެހެން ދީންތަކުގެ މީހުންނަށް ދިވެހި ފަސްގަނޑުން މިލްކުވެރިކަން ދޭން މުއިއްޒު ފައިވިއްދާލައިގެން އެ އުޅުއްވަނީ ރާއްޖޭގައި އިސްލާމްދީން އޮންނާތީ މުއިއްޒު ކަންބޮޑުވާލެއް ބޮޑު ކަމުން ކަމަށް ވެސް ގަބޫލު ކުރެއްވޭ ކަމަށް އަލީ ހުސައިން ވިދާޅުވި އެވެ.
"އީގަލް ހިލްސް" ކުންފުންޏަށް ފާޑުވިދާޅުވަމުން އަލީ ހުސައިން ވިދާޅުވީ، އެ ކުންފުނިން ދިޔަ ކޮންމެ ގައުމަކުން އެމީހުން ބޭރުކޮށްލާފައިވާ ކަމަށެވެ. އެގޮތުން އެމެރިކާގެ ކެލިފޯނިއާ އާއި، ތައިލޭންޑް، ފިލިޕީންސް އަދި ސްރީލަންކާ ފަދަ ގައުމުތަކުގައި ވެސް އެމީހުންނާ ދެކޮޅަށް މުޒާހަރާކޮށްފައިވާކަން އޭނާ ފާހަގަކުރެއްވި އެވެ.
ދުނިޔޭގެ ކަންކަން އޮޅުންފިލުއްވުމަށް އަލީ ހުސައިން ވަނީ މުއިއްޒަށް ގޮވާލެއްވި އެވެ.
ރަސްމާލޭގެ 500 ހެކްޓަރު އަލައްބާރުގެ އީގަލް ހިލްސްއަށް ދެނީ އެކުއިޒިޝަން ކޯސްޓެއް އަދި ބިމު ކުއްޔެއް ނުނަގާ ގޮތަށް ހިލެ އެވެ. ސަރުކާރުން ބުނަނީ ރަސްމާލެ ދޫކޮށްލަނީ 99 އަހަރަށް ކަމަށެވެ. އެކަމަކު އަލައްބާރުގެ އީގަލް ހިލްސް ކުންފުނިން ބުނީ ރަސްމާލެއިން ފުރަތަމަ ލިބޭ 99 އަހަރުގެ ކުލީގެ މުއްދަތު ހަމަވުމުގެ ކުރިން އެތަން ވިއްކާލައިފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރަން މަސައްކަތް ކުރަނީ ނޮވެމްބަރު 11، ގަ އެވެ. އެއީ ރާއްޖޭގެ ޖުމްހޫރީ ދުވަހެވެ.
