ރަސްމާލެއިން 500 ހެކްޓަރުގެ ބިން ޔޫއޭއީގެ އީގަލް ހިލްސް ކުންފުންޏަށް ދީގެން ހިންގަން ނިންމާފައިވާ މަޝްރޫއުގެ އެއްބަސްވުމުގައި ސޮއިކުރުމުގެ ކުރިން ހަދާނެ ކަމަށް ސަރުކާރުން ބުނި ރިއަލް އެސްޓޭޓު ގާނޫނުގެ ބިލު އަދިވެސް މަޖިލީހަށް ނުފޮނުވާ ކަމަށް މަޖިލިސް މެންބަރުން ވިދާޅުވެއްޖެ އެވެ.
މި ނޫހާ ވާހަކަދައްކަވަމުން ކެންދޫ ދާއިރާގެ މަޖިލިސް މެންބަރު، މައުރޫފް ޒާކިރު ވިދާޅުވީ ރަސްމާލެ ވިއްކައިލުމުގެ ކުރިން ހަދާނެކަމަށް ބުނި ރިއަލް އެސްޓޭޓް ގާނޫނުގެ ބިލު މަޖިލީހަށް އަދި ނުފޮނުވާ ކަމަށެވެ.
"އަދި، ނެތް އޭގެ އެއްވެސް ހަބަރެއް، އަދި ނުފޮނުވާ މަޖިލީހަކަށް،" މައުރޫފް ވިދާޅުވި އެވެ.
ދިވެހިރާއްޖޭގައި މިހާރު އަމަލު ކުރަމުންދާ ގާނޫނުތަކުގެ ދަށުން ރަސްމާލެ ޕްރޮޖެކްޓަށް ހުއްދަ ނުލިބޭތީ، އެ ޕްރޮޖެކްޓަށް މަގުފަހިކުރަން އާ ގާނޫނުތަކެއް ހަދަން ނިންމާފައިވާކަން ބަންޑާރަނައިބު، އަހުމަދު އުޝާމް ހާމަކުރެއްވީ ސެޕްޓެމްބަރު 29، ގަ އެވެ.
ރަސްމާލެ އެއްބަސްވުމުގެ ކުރިން ހަދާ ރިއަލް އެސްޓޭޓު ގާނޫނަށް ހިޔާލު ހުށަހަޅަން ދެ ހަފުތާ ދޭނަން: މުއިއްޒު
ރަސްމާލެ މަޝްރޫއުގެ އެއްބަސްވުމުގައި ސޮއިކުރުމުގެ ކުރިން، އަލަށް އެކުލަވާލާ ރިއަލް އެސްޓޭޓް ބިލަށް ހިޔާލު ހުށަހަޅަން އާންމުންނަށް ދެ ހަފުތާގެ މުއްދަތެއް ދެއްވާނެ ކަމަށް ރައީސް މުއިއްޒު ވިދާޅުވެއްޖެ. އަދި މަޝްރޫއުގެ އެއްބަސްވުން މަޖިލީހުގެ ކޮމިޓީއަކަށް ހުށަހަޅައިގެން ދެފުށް ފެންނަ ގޮތަކަށް ކުރިއަށް ގެންދާނެ ކަމަށް ވެސް ވިދާޅުވި.
އޭގެ އެއް މަސްދުވަސްފަހުން، މިދިޔަ ބުދަ ދުވަހުގެރޭ ރައީސް މުހައްމަދު މުއިއްޒު ވަނީ އެ ގާނޫނުގެ ބިލަށް ރައްޔިތުންގެ ހިޔާލު ހުށަހަޅަން ދެ ހަފުތާގެ މުއްދަތެއް ދެއްވާނެކަމަށް ވިދާޅުވެފަ އެވެ.
މި މަހު 17، ގެ ކުރިން ރަސްމާލޭގެ ދާއިމީ އެއްބަސްވުމުގައި ސޮއިކުރަން ސަރުކާރުން ވަނީ އަމާޒު ހިފައިފަ އެވެ. މިދިޔަ އަންގާރަ ދުވަހު ރައްޔިތުންގެ މަޖިލީހުގެ މެންބަރުންނާއި ކެބިނެޓު ވަޒީރުންނާއެކު މުލީއާގޭގައި ބޭއްވި ބައްދަލުވުމުގައި މުއިއްޒު ވަނީ އެކަން އެ ބޭފުޅުންނަށް ވެސް އަންގަވައިފަ އެވެ.
ރަސްމާލޭގެ ދާއިމީ އެއްބަސްވުމުގައި ސޮއިކުރަން ސަރުކާރުން އަމާޒު ހިފާފައިވާއިރު، އީގަލް ހިލްސް ކުންފުންޏާއެކު ސެޕްޓެމްބަރު 21، ގައި ސޮއިކުރި ކޮމާޝަލް ޓާމްސް އެގްރީމެންޓު އެއްވެސް މީހަކަށް އަދި ހާމައެއް ނުކުރެ އެވެ.
ރާއްޖޭގެ ބައެއް ބޭރު މީހުންނަށް 99 އަހަރަށް ވުރެ ދިގު ނޫން މުއްދަތަކަށް ދިނުން ގާނޫނުއަސާސީ ހުއްދަ ކުރެ އެވެ. ނަމަވެސް އެކަމާ ގުޅޭ ގާނޫނެއް މިހާތަނަކަށް ނެތެވެ. ޓޫރިޒަމާ ބެހޭ ގާނޫނުން ހުއްދަ ލިބެނީ 50 އަހަރަށެވެ. އަދި ލީސް މުއްދަތު އިތުރު 49 އަހަރަށް އެކްސްޓެންޑު ކުރެވިދާނެ އެވެ.
ސްޕެޝަން އިކޮނޮމިކް ގާނޫނުގެ ދަށުން ބިދޭސީ ބަޔަކަށް އެންމެ ގިނަވެގެން ބިމެއް ދޫކުރެވެނީ 66 އަހަރަށެވެ. އެކަމަކު އެ މުއްދަތު 33 އަހަރަށް އިތުރު ކުރެވިދާނެ އެވެ.
ރަސްމާލެ ދޫކޮށްލަން ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
