ރައްޔިތުންގެ ހިޔާލާއި ކަންބޮޑުވުންތައް ސަރުކާރަށް ހުށަހެޅުމަށްޓަކައި ސިޓިޒަންސް ކޮމްޕްލެއިންޓްސް ބިއުރޯގެ ދެ ލައުންޖެއް މާލެ އާއި ހުޅުމާލޭގައި މިއަދު ހުޅުވައިފި އެވެ.
އެގޮތުން މާލޭގައި ހުޅުވި ލައުންޖު ހުންނާނީ ހުޅުމާލެ ފެރީ ޓާމިނަލްގަ އެވެ. އަދި ހުޅުމާލޭ ފޭސް އެކެއްގައި ހުޅުވި ލައުންޖު ހުންނާނީ އުމަރު ޒާހިރު ބިލްޑިންގެ ތިރީ ފަންގިފިލާގަ އެވެ.
މި ދެ ލައުންޖުންވެސް ސަރުކާރު ބަންދު ނޫން ކޮންމެ ދުވަހަކު ހެނދުނު ނުވަޔަކުން ފެށިގެން މެންދުރުފަހު ތިނެއް ޖަހަންދެން ރައްޔިތުންނަށް ހިދުމަތް ދެމުންގެންދާނެ އެވެ. މީގެ އިތުރުން، ކައިރި މުސްތަގުބަލެއްގައި ހުޅުމާލޭ ފޭސް ދޭއްގައި ވެސް މިފަދަ ލައުންޖެއް ހުޅުވުމަށް ނިންމާފައިވާ ކަމަށް ސަރުކާރުން ބުނެ އެވެ.
ސިޓިޒަންސް ކޮމްޕްލެއިންޓްސް ބިއުރޯއަކީ ރައްޔިތުންގެ ޝަކުވާތަކާއި ކަންބޮޑުވުންތައް ބަލައިގަނެ، އެކަންކަމަށް ހައްލު ހޯދައިދިނުމަށްޓަކައި ރައީސުލްޖުމްހޫރިއްޔާގެ އޮފީހުގެ ދަށުން އުފައްދަވާފައިވާ ހާއްސަ އިދާރާއެކެވެ.
ރައީސް މުހައްމަދު މުއިއްޒަށް ރައްޔިތުންގެ ހިޔާލާއި ކަންބޮޑުވުންތައް ހުށަހެޅުމަށް ހާއްސަކޮށްގެން "ސިޓިޒެންސް ވޮއިސް" ގެ ނަމުގައި ދެވަނަ ފަހަރަށް ޕޯޓަލްއެއް މިފަހުން އިފްތިތާހުކުރި އެވެ.
އީ-ފާސް ބޭނުންކޮށްގެން ލޮގިން ކުރެވޭ މި ޕޯޓަލް އެންމެ ފުރަތަމަ ފެބްރުއަރީ 23، 2024، ގައި އިފްތިތާހުކުރީ ރައްޔިތުން ކުރަން ބޭނުންވާ ސުވާލުތަކާއި، ޝަކުވާތަކުގެ އިތުރުން ބޭނުންވާ ހިޔާލުތައްވެސް ސީދާ މުއިއްޒަށް ހުށަހެޅޭ ގޮތަށެވެ. ނަމަވެސް ދުވަސްކޮޅެއްފަހުން އެ ޕޯޓަލް ޑައުންކުރި ގޮތަށް ނުވަދެވެ އެވެ.
ރައީސް އޮފީހުން ބުނީ ސިޓިޒެންސް ވޮއިސްގެ ނަމުގައި ދެވަނަ ފަހަރަށް މިއަދު އިފްތިތާހުކުރި ޕޯޓަލްއަކީ ރައްޔިތުންގެ ކަންބޮޑުވުންތަކާއި ޝަކުވާތައް ހުށަހެޅުމަށްޓަކައި 24 ގަޑިއިރު ހިދުމަތް ދިނުމަށް ރައީސް އޮފީހުގައި ގާއިމުކޮށްފައިވާ ސިޓިޒަންސް ކޮމްޕްލެއިންޓްސް ބިއުރޯގެ ދަށުން ރައްޔިތުންގެ ޚިޔާލާއި ކަންބޮޑުވުންތައް ހުށަހެޅުމަށް ހާއްސަކޮށް ގާއިމުކުރި ޕޯޓަލްއެއް ކަމަށެވެ.
މި ޕޯޓަލްގެ ހިދުމަތް މި ވަގުތަށް ވެބް މެދުވެރިކޮށް ފެށި ނަމަވެސް، ކައިރި މުސްތަގުބަލެއްގައި މި ހިދުމަތަށް ހާއްސަކުރެވޭ ފޯނު އެޕްލިކޭޝަންވެސް އިފްތިތާހު ކުރާނެ ކަމަށް ރައީސް އޮފީހުން ބުންޏެވެ.
މީގެ އިތުރުން މި ވަގުތު ވެސް ސިޓިޒަންސް ކޮމްޕްލެއިންޓްސް ބިއުރޯގެ ކޯލް ސެންޓަރުގެ ހިދުމަތް ހޮޓްލައިން ނަންބަރު 1470 މެދުވެރިކޮށް ދަނީ ދެމުން ކަމަށް އެ އޮފީހުން ބުންޏެވެ.





