އުނަގަނޑު ވަށައިގެން ޖަހާފައި ހުންނަ ގަދަ ފެޓް ނުވަތަ ސަރުބީގެ ސަބަބުން، އަމިއްލަ ނަފްސަށް އޮންނަ އިތުބާރާއި، ހެދުން އެޅުމުގެ އިތުރުން ސިއްހަތަށް ވެސް ނޭދެވޭ އަސަރުތަކެއް ކުރެ އެވެ. އުނަގަނޑުގެ ސައިޒު ކުޑަކުރުމަކީ ހަށިގަނޑަށް އިތުރު ހަކަތަ ލިބިދޭ ކަމެކެވެ. އަދި މީގެ ސަބަބުން ހިތުގެ ބަލިތަކާއި ހަކުރުބަލި ފަދަ ސިއްހީ ނުރައްކާތަކުން ސަލާމަތްވުމަށް އެހީތެރިވެދެ އެވެ.
ހަށިގަނޑުގެ މެދުތެރޭގައި ނުވަތަ ބަނޑާއި އުނަގަނޑު ހިމެނޭ ސަރަހައްދުގައި ސަރުބީ ހުރުމަކީ އުމުރު ކުރުވުމުގެ ފުރުސަތު ބޮޑުކޮށްދޭ ކަމެއްކަން އިތުބާރު ހުރި ދިރާސާތަކުން ދައްކަ އެވެ. ހަށިގަނޑުގެ އެ ސަރަހައްދުގައި ގުދުރަތީ ގޮތުން ސަރުބީ ރައްކާކުރާ މީހަކަށް އުނަގަނޑު ހިމަ ކުރުމަކީ އުނދަގޫ ކަމަކަށް ވެދާނެ އެވެ. ނަމަވެސް ކަސްރަތު ކުރުމާއި ކެއުމަށް ގެންނަ ކުދިކުދި ބަދަލުތަކުގެ އެހީގައި މިކަން ފަސޭހަކުރެވިދާނެ އެވެ.
ބަރުދަން ލުއިވާ ގޮތް ދެނެގަތުމަކީ ވަރަށް މުހިންމު ކަމެކެވެ. މުޅި ހަށިގަނޑުގެ ބަރުދަން ލުއިނުކޮށް، ހަމައެކަނި ހަށިގަނޑުގެ ވަކި ގުނަވަނަކުން ބަރުދަން ލުއިކުރެވިދާނެ ކަމަށް ގަބޫލުކުރުމަކީ ކުށްހީއެކެވެ. ހަމައެކަނި ބަނޑުގެ ކަސްރަތުތައް ކޮށްގެން ބަނޑުގެ ސަރުބީ ވިރުވާލުމަށް ކުރާ މަސައްކަތަކީ ނަތީޖާއެއް ނުފެންނަ ކަމެއްކަން ދިރާސާތަކުން ވަނީ ސާބިތުވެފަ އެވެ.
ކަސްރަތު ކުރުމުގެ ސަބަބުން ބަނޑުގެ ސަރުބީގެ ދަށުގައި ހުންނަ މަސްތައް ވަރުގަދަވެ ބާރުވި ނަމަވެސް، މުޅި ހަށިގަނޑުގެ ބަރުދަން ލުއިނުކޮށް އުނަގަނޑުގެ ސައިޒަށް ބަދަލެއް ނާންނާނެ އެވެ. އެންމެ ރަނގަޅު ނަތީޖާއެއް ހޯދޭނީ ސިއްހަތަށް ފައިދާހުރި ދިރިއުޅުމުގެ އާދަތަކާއި، ރަނގަޅު ކެއުމާއި، އަދި ކަސްރަތު އެއްކޮށްލައިގެންނެވެ.
ކާނާއާ ބެހޭ ގިނަ މާހިރުން އެއްބަސްވާ ގޮތުގައި، ހަށިގަނޑުގައި ރައްކާކުރެވިފައި ހުންނަ އެއް ޕައުންޑުގެ ސަރުބީ ވިރުވާލުމަށްޓަކައި 3،500 ކެލޮރީ މަދުކުރަން ޖެހެ އެވެ. ކެއުމުގައި ބޭނުންކުރާ ކެލޮރީގެ މިންވަރު މަދުކުރުމުން މި އަމާޒަށް ވާސިލުވުމަށް އެހީތެރިވެދެ އެވެ.
ކޮންމެ ދުވަހަކު ކަސްރަތު ކުރުމުން 400 އާއި 500 އާ ދެމެދުގެ ކެލޮރީ އަންދާލެވެ އެވެ. ނަމަވެސް ހަފުތާއަކު މަދުވެގެން އެއް ދުވަހު ކަސްރަތު ނުކޮށް ހަށިގަނޑަށް އަރާމުދިނުމަކީ މުހިންމު ކަމެކެވެ.
ކެލޮރީ މަދުކުރުމާއި ކަސްރަތުގެ އެހީގައި، ހަށިގަނޑަށް އެތެރެވާ ކެލޮރީއަށް ވުރެ އިތުރަށް ދުވާލަކު އެވްރެޖްކޮށް 750 ކެލޮރީ އަންދާލެވޭނަމަ، ކޮންމެ 4.6 ދުވަހަކުން އެއް ޕައުންޑުގެ ސަރުބީ ވިރުވާލެވޭނެ އެވެ. މިއަށްވުރެ އަވަހަށް ބަރުދަން ލުއިކުރުމަކީ ވަރަށް އުނދަގޫ ކަމަކަށް ވުމުގެ އިތުރުން، އެއީ ގިނަ މީހުންނަށް ސިއްހީ ގޮތުން ރަނގަޅު ގޮތެއް ވެސް ނޫނެވެ.
ހަފުތާއަކު 1.5 ނުވަތަ 2 ޕައުންޑު ލުއިކުރުމަށް އަމާޒު ހިފުމަކީ ރަނގަޅު މިންވަރެކެވެ. މި ރޭޓުގައި ބަރުދަން ލުއިކުރާނަމަ، ހަ ހަފުތާގެ ތެރޭގައި 10 ޕައުންޑު ލުއިކުރުމަކީ ހާސިލުކުރެވޭނެ އަމާޒެކެވެ. މިގޮތަށް ލުއިވާ ބަރުދަނުގެ ތެރޭގައި އުނަގަނޑުގެ ސަރުބީ ވެސް ހިމެނޭނެ އެވެ.
މިކަން ކުރުމަށް ކެތްތެރިކަމާއި އަދި އަހުލާގީ ހިފެހެއްޓުންތަކެއް ބޭނުންވެ އެވެ. އެންމެ ރަނގަޅު ގޮތަކީ ހަމައެކަނި އުނަގަނޑަށް ސަމާލުކަން ދިނުމުގެ ބަދަލުގައި، މުޅި ހަށިގަނޑުގެ ސަރުބީ މަދުކުރުމަށް މަސައްކަތް ކުރުމެވެ. ބައެއް ކަސްރަތުތަކުގެ ސަބަބުން ބަނޑާއި އުނަގަނޑުގެ މަސްތައް ވަރުގަދަކޮށް ބާރުކޮށްދިނުމަށް އެހީތެރިވެދެ އެވެ.
ހާސިލުކުރެވޭނެ ފަދަ ހަގީގީ އަމާޒެއް ކަނޑައަޅައި، ހިތްވަރާއެކު މަސައްކަތް ކޮށްފިނަމަ، ދާއިމީ ގޮތެއްގައި މިކަމުން ކާމިޔާބީ ލިބުމުގެ ފުރުސަތު ބޮޑެވެ.
މައުލޫމާތު: ހެލްތުލައިން
