އިންދިރާ ގާންދީ މެމޯރިއަލް ހޮސްޕިޓަލު (އައިޖީއެމްއެޗް) ގައި ލެބޯޓްރީ މެޝިނެއް ބަހައްޓައިދިނުމުގެ މުގާބިލުގައި އެއްބަސްވީ ގޮތަށް ރީއެޖެންޓްސް ނުގަތުމުން ގެއްލުމުގެ ބަދަލު ނުހޯދޭނެ ކަމަށް ބުނެ ހައިކޯޓަށް ދިޔުމުން، އެ ހޮސްޕިޓަލާ ދެކޮޅަށް މައްސަލަ ނިންމައިފި އެވެ.
މިއީ 2014 ގައި މެޑިކްއިޕް މޯލްޑިވްސް އާއި އައިޖީއެމްއެޗާ ދެމެދު ވީ އެއްބަސްވުމަކާ ގުޅިގެން އުފެދުނު މައްސަލައެކެވެ.
މި އެއްބަސްވުމުގެ ދަށުން މެޑިކްއިޕުން ވަނީ އައިޖީއެމްއެޗްގައި ލެބޯޓްރީ މެޝިނެއް ހިލޭ އިންސްޓޯލް ކޮށްދީފަ އެވެ. އޭގެ މުގާބިލެއްގެ ގޮތުން އެ މެޝިނަށް ބޭނުންވާ ރީއެޖެންޓްސްގެ އަގު ފަސް އަހަރު ވަންދެން ވަކި ވަރެއްގައި ހިފަހައްޓަން އެއްބަސްވި އެވެ. އަދި އެ ތަކެތި ހޮސްޕިޓަލުން ހޯދަން ޖެހޭނީ މެޑިކްއިޕް މެދުވެރިކޮށް ކަމަށް ވެސް އެއްބަސްވުމުގައި ވެ އެވެ.
ނަމަވެސް ނޮވެމްބަރު 2017 ގައި އައިޖީއެމްއެޗުން ވަނީ އެ މެޝިންތައް ގެންދަން މެޑިކްއިޕަށް ސިޓީއަކުން އަންގައިފަ އެވެ. ސަބަބަކަށް ދެއްކީ އެ ވަގުތު އެ މެޝިންތައް ހޮސްޕިޓަލުގައި ބޭނުން ނުކުރާ ކަމެވެ. އައިޖީއެމްއެޗްއިން އެ މެޝިން ބޭނުންކުރި ދެ އަހަރުގެ މުއްދަތުގައި ވެސް މެޝިނަށް ބޭނުންވާ ރީއެޖެންޓްސް ގަނެފައި ވަނީ އެސްޓީއޯ މެދުވެރިކޮށެވެ.
އެއްބަސްވުން އުވާލި މައްސަލައިގައި މެޑިކްއިޕުން ސިވިލް ކޯޓުގައި ދައުވާ ކުރުމުން، އެ ކޯޓުން ހުކުމް ކުރި އެއްބަސްވުން އުވާލީ ގާނޫނާ ހިލާފަށް ކަމަށް ބެލެވެން ނެތް ކަމަށެވެ. އެކަމަކު މެޝިން ބޭނުންކުރި މުއްދަތުގައި އެއްބަސްވުމާ އެއްގޮތަށް ރީއެޖެންޓްސް ނުގަތުމުން ލިބުނު ގެއްލުމުގެ ބަދަލު ހޯދަން ވަކި ދައުވާއެއް ކުރުމުގެ ހައްގު މެޑިކްއިޕަށް އޮންނާނެ ކަމަށް ސިވިލް ކޯޓުން ކަނޑައެޅި އެވެ.
ދަށު ކޯޓުގެ ނިންމުން އިސްތިއުނާފު ކުރަމުން ދައުލަތުން ހައި ކޯޓުގައި ބުނީ މެޝިން ބެހެއްޓީ ހިލޭ ކަމަށް ވާތީ އެއްބަސްވުމުގައި މުގާބިލެއް ނެތް ކަމަށެވެ. އަދި ދައުލަތުން އެއްބަސްވުމާ ހިލާފުނުވާ ކަމަށް ނިންމުމަށް ފަހު، ގެއްލުމުގެ ބަދަލު ހޯދަން ދައުވާ ކުރުމުގެ ހައްގު މެޑިކްއިޕަށް ދިނުމަކީ ގޯހެއް ކަމަށް ވެސް ބުންޏެވެ.
މި މައްސަލައިގައި ހައި ކޯޓުން ކުރި ހުކުމުގައި ބުނީ، މެޝިނަށް ބޭނުންވާ ސާމާނު މެޑިކްއިޕް މެދުވެރިކޮށް ގަންނަން އޮތް އޮތުމަކީ އެއްބަސްވުމުގެ މުގާބިލު ކަމަށެވެ. އަދި ދައުލަތުން އެހެން ފަރާތަކުން ސާމާނު ގަތުމަކީ އެ މުގާބިލު ނެތިގެންދާނެ ކަމެއް ނޫން ކަމަށް ވެސް ބުންޏެވެ.
މީގެ އިތުރުން ސިވިލް ކޯޓުން ދީފައިވާ ހައްގަކީ އެއްބަސްވުން އުވާލުމުން ލިބޭ ބަދަލެއް ނޫން ކަމަށް ހައިކޯޓުން ބުންޏެވެ. މި ބަދަލަކީ، އެ ކޯޓުގެ ފަނޑިޔާރުން ބުނި ގޮތުގައި، މެޝިން ބޭނުންކުރި އިރު މެޑިކްއިޕް މެދުވެރިކޮށް ރީއެޖެންޓްސް ނުގަތުމުގެ ސަބަބުން ލިބުނު ގެއްލުމުގެ ބަދަލު ހޯދުމުގެ ހައްގު ކަމަށެވެ.
މިހެންކަމުން އެފަދަ ދައުވާއެއް ކުރުން މަނާކުރާ ގާނޫނީ ހަމައެއް ނެތް ކަމަށް ކަނޑައަޅައި، ހައި ކޯޓުގެ ތިން ފަނޑިޔާރުން އިއްތިފާގުން ވަނީ ސިވިލް ކޯޓުގެ ހުކުމް ދަމަހައްޓައިފަ އެވެ.
