ހުޅުމާލެ ފޭސް 2 ގެ ހިތިގަސްމަގު، ވިނަރެސް ޓަވަރު 7 ކައިރީގައި ހިނގި ނުރައްކާތެރި އެކްސިޑެންޓުގައި ބޯ ފަޅައިގެން ގޮސް، އައިސީޔޫގައި ފަރުވާ ދެމުންދަނިކޮށް ނިޔާވި 9 އަހަރުގެ ކުއްޖާގެ ގައިގައި ކާރުން ޖެހިފައިވާ ކަމަށް ނުވަތަ ކާރު އެ ކުއްޖާގެ ގައިމައްޗަށް އަރާފައިވާ ކަމަށް ބެލެވޭ ކަމަށް ދިވެހި ފުލުހުންގެ ހިދުމަތުން ބުނެފިއެވެ.
އޮގަސްޓް 29، 2026 ވަނަ ދުވަހުގެ ރޭ 21:04 ކަންހާއިރު ހިނގި މި އެކްސިޑެންޓުގައި އަނިޔާވި ޒީވާ ސިނާން އަހުމަދު ނިޔާވެފައިވަނީ އައިޖީއެމްއެޗް ހޮސްޕިޓަލްގެ އައިސީޔޫގައި ފަރުވާ ދެމުންދަނިކޮށް، ސެޕްޓެމްބަރު 1 ވަނަ ދުވަހުގެ ފަތިހުގެ ވަގުތެއްގަ އެވެ.
ފުލުހުން ބުނީ ތަހުގީގުން މިހާތަނަށް އެނގިފައިވާ ގޮތުގައި، އެކްސިޑެންޓް ހިނގަން މެދުވެރިވީ މަގުގެ އެއްފަރާތުގައި މަޑުކޮށްފައި އޮތް ކާރެއްގެ ޑްރައިވަރު، ކާރަށް އަރަން އުޅުނު ވަގުތު އެ ކާރު އޯވަޓޭކްކޮށް ދާން އުޅުނު ސައިކަލު، އެ ޑްރައިވަރުގެ ގައިން ނެއްޓެން މަސައްކަތް ކުރި ނަމަވެސް އެމީހާގެ ގައިގައި ޖެހި ސައިކަލު މަގުމައްޗަށް ވެއްޓިގެންނެވެ.
އެވަގުތު އެ ލޭނުން ދުއްވާފައި އައި އެހެން ކާރަކަށް ކުއްލިއަކަށް މަޑުކުރަން ފުރުސަތު ނުލިބި، ސައިކަލުން ވެއްޓުނު 9 އަހަރުގެ ކުއްޖާގެ ގައިގައި ޖެހިފައިވާކަމަށް ނުވަތަ އެ ކުއްޖާގެ ގައިމައްޗަށް ކާރު އަރާފައިވާކަމަށް ތަހުގީގަށް ބެލެވޭ ކަމަށް ފުލުހުން ބުނެ އެވެ. މިކަން ޔަގީންކުރުމަށްޓަކައި ފޮރެންސިކް ތަހުލީލުތައް ކުރުމުގެ މަސައްކަތް މިހާރު ކުރިއަށްދާ ކަމަށް ވެސް ފުލުހުން ބުންޏެވެ.
މި މައްސަލައާ ގުޅިގެން ފުލުހުން ވަނީ އެކްސިޑެންޓުގައި ހިމެނޭ ތިން އުޅަނދު ޓޯކޮށް، އެ އުޅަނދުތައް ދުއްވި ތިން މީހުންގެ ލައިސަންސް ވެސް ހިފަހައްޓާފަ އެވެ. އަދި މަޑުކޮށްގެން އޮތް ކާރުގެ ޑްރައިވަރު އެ އުޅަނދު ދުއްވާފައިވަނީ އޭނާގެ ލައިސަންސް ކުރިންވެސް ހިފަހައްޓާފައި ވަނިކޮށް ކަމަށްވާތީ، އޭނާ ޖޫރިމަނާކޮށްފައިވާ ކަމަށް ވެސް ފުލުހުން ބުނެ އެވެ.
