ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ދީފައިވާ ދައުވަތު ގަބޫލުކޮށް އެ ޕާޓީއާއެކު ކޯލިޝަން ހެދުމަށް އަދާލަތު ޕާޓީން މަޝްވަރާ ކުރަން ފަށައިފި އެވެ.
ހުކުރު ދުވަހުގެ ރޭ އަދާލަތު ޕާޓީގެ މަޝްވަރާ މަޖިލީހުގެ ހަތަރުވަނަ ދައުރުގެ ނުވަވަނަ ބައްދަލުވުން ވަނީ ބާއްވާފަ އެވެ. އެ ބައްދަލުވުމަށް އެ ޕާޓީގެ ރައީސް މުހައްމަދު ޝިފާންގެ ފަރާތުން ވަނީ ޕީއެންސީ އާއެކު ކޯލިޝަން ހެދުމުގެ މައްސަލަ ހުށަހަޅާފަ އެވެ.
މައުލޫމާތު ލިބިފައިވާ ގޮތުގައި އެ މައްސަލައަށް ވަކި ގޮތެއް މިހާތަނަށް ނިންމާފައި ނުވެ އެވެ. އެ ޕާޓީގެ މިހާރު ލީޑާޝިޕުގެ ވިސްނުން ހުރީ ވެރިކަން ކުރާ ޕާޓީއާއެކު ކޯލިޝަން ހަދައިގެން ކުރިއަށްދިޔުމަށް ކަމަށް ވަނީ މައުލޫމާތު ލިބިފަ އެވެ.
މިރޭގެ ވަގުތެއްގައި މިކަމާ ގުޅިގެން އިތުރު ބައްދަލުވުމެ އެ ޕާޓީގެ މަޝްވަރާ މަޖިލީހުގެ ފަރާތުން ބާއްވާނެކަން ވަނީ އެނގިފަ އެވެ.
ކުރިން އެމްޑީޕީއާ ނުރުހި، އެ ޕާޓީގެ ސިޔާސަތުތަކާ ދެކޮޅު ހެދި އަދާލަތުން އެމްޑީޕީއާ 2015 ވަނަ އަހަރުން ފެށިގެން ގުޅިގެން މަސައްކަތްތަކެއް ކުރި އެވެ. އަދި 2018 ގައި ރިޔާސީ އިންތިހާބު ކާމިޔާބު ކުރި ސަރުކާރު ކޯލިޝަންގައި ވެސް އެ ޕާޓީ ހިމެނުނެވެ.
އެ ސަރުކާރުގެ ދައުރު ނިމެން އައި އިރު، ކޯލިޝަނުގައި ދެމިތިބި ހަމައެކަނި ޕާޓީއަކީ ވެސް އަދާލަތެވެ. އަދި އެންމެފަހުން ބޭއްވި ރިޔާސީ އިންތިހާބުގައި އެމްޑީޕީއާ އެކީ ދެވަނަ ބުރުގައި ވެސް ކޯލިޝަން ހަދައިގެން ތިބި ހަމައެކަނި ޕާޓީއަކީ އަދާލަތެވެ.
މި ސަރުކާރު ހަވާލުވުމަށް ފަހު ކުރި ބައެއް ކަންކަމަށް އަދާލަތުން ވަރަށް ބޮޑަށް ފާޑުވެސް ކިޔާފައިވެ އެވެ. އެ ޕާޓީގެ ރާގު ބަދަލުވާން ފެށީ މި އަހަރުގެ ޖެނުއަރީ މަހު ލީޑާޝިޕަށް އައި ބަދަލުތަކާއެކު އެވެ.
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަށް ރައީސް މުހައްމަދު މުއިއްޒު ބޭނުންވެގެން ނެގި ވޯޓުގައި ވެސް އަދާލަތުން ތާއިދުކުރީ ސަރުކާރުގެ ސްޓޭންޑަށެވެ.
