ވެރި ރަށް މާލޭގައި ބިދޭސީން ދިރިއުޅޭ ތަނެއްގައި ގޭސް ފުޅިއެއް ގޮވައި ހަތަރު މީހަކަށް ހާނީއްކަވެއްޖެ އެވެ.
މީޑީއާތަަކަށް ފުލުހުން ފޮނުވި މެސެޖެއްގައި ބުނެފައި ވަނީ އެ ހާދިސާގައި ހަތަރު މީހަކަށް ހާނީއްކަވި ކަމަށާއި އޭގެ ތެރެއިން ދެ މީހެއްގެ ހާލު ސީރިއަސް ކަމަށެވެ.
ގޭސް ފުޅި ގޮވި ހާދިސާގައި ހާނީއްކަވީ ބަންގްލަދޭޝްގެ ދެ މީހުންނާއި އިންޑިއާގެ ދެ މީހުންނަށް ކަމަށް ފުލުހުން ބުނެ އެވެ. އެ އެންމެނަށް ވެސް އައިޖީއެމްއެޗް ހޮސްޕިޓަލުގައި އަންނަނީ ފަރުވާ ދެމުންނެވެ.
އަލިފާން ރޯވީ މއ. ދޫގަސް ގަ އެވެ. އެއީ މާވެޔޮ މަގުގައި ހުންނަ އޭޑީކޭ ފާމަސީ ކުރިމަތިން ހުންނަ ހަނި ގޯޅި ތެރޭގަ ހުންނަ ގެއެއްގަ އެވެ. އެ ހާދިސާގައި ގޭސް ފުޅި ގޮވައި، އަލިފާން ރޯވި ކަމަށް ވެސް ފުލުހުން ބުންޏެވެ.
އެ ގޭގައި ރޯވި އަލިފާންގަނޑު ސިފައިން އައިސް ނިއްވާލާފައިވާ ކަމަށް ވެސް ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވެ އެވެ.
ބިދޭސީން ދިރިއުޅޭ ތަނެއްގައި ގޭސް ފުޅިއެއް ގޮވައި ހާދިސާއެއް ހިނގިއިރު، ހަމަ މިފަދަ ހާދިސާއެއްގައި މިދިޔަ މާޗް މަހު އއ. ދިގުރަށުގައި ފަސް ބިދޭސީއަކު ވަނީ މަރުވެފަ އެވެ. މަރުވީ ބަންގްލަދޭޝްއަށް ނިސްބަތްވާ ސަފީގުލް އިސްލާމް، އެމްޑީ ސާދަރު އަލީ، ތާޖުއްދީން އިސްލާމް، އެމްޑީ ރޮބިން މޮއްލާ އަދި އެމްޑީ ނަބީސަރްކާރް އެވެ.
އޭކުރިން ނޮވެމްބަރު، 2022، ގައި މާލޭގައި ހިނގި ވަރަށް ބޮޑު އަލިފާނުގެ ހާދިސާއެއްގައި 10 ބިދޭސީއަކު ވަނީ ނިޔާވެފަ އެވެ. އޭގެ ތެރެއިން ނުވަ މީހުންނަކީ އިންޑިއާގެ ރައްޔިތުންނެވެ.
ރަސްމީ ހިސާބުތަކަށް ބަލާއިރު، ދިވެހިރާއްޖޭގައި ދިރިއުޅޭ ކޮންމެ ތިން މީހަކުން އެކަކީ ބިދޭސީއެކެވެ. ނުރަސްމީ ހިސާބުތަކުން އެ އަދަދު މާ ބޮޑަށް އިތުރު ވާނެ ކަމަށް ބެލެވެ އެވެ. ރާއްޖޭގައި މަސައްކަތް ކުރާ ގިނަ ބިދޭސީން އުޅެނީ ދިރިއުޅެން އެކަށީގެންނުވާ ކުދި ތަންތަންކޮޅުގައި، ވަރަށް ގިނަ މީހުންނައެކު އެވެ.
