މާލޭ ސިޓީ ކައުންސިލްގެ މާފަންނު ހުޅަނގު ދާއިރާގެ މެންބަރަކަށް ހުންނެވި އިބްރާހީމް އަބޫބަކުރަށް، އައިޖީއެމްއެޗްގެ އިސް މަގާމެއް ސަރުކާރުން ހަމަޖައްސައިދީފި އެވެ.
މިދިޔަ އޭޕްރީލް 4 ވަނަ ދުވަހު ބޭއްވި ލޯކަލް ކައުންސިލް އިންތިހާބުގައި މާފަންނު ހުޅަނގު ދާއިރާ އަށް އަމިއްލަ ގޮތުން ވާދަކުރެއްވުމަށް ފަހު، އިބްރާހީމް އަބޫބަކުރު ފަހުން ނިންމެވީ ޕީއެންސީގެ ކެންޑިޑޭޓް، މިހާރުގެ ޑެޕިއުޓީ މޭޔަރު މުހައްމަދު އަރީޝްއަށް ތާއިދުކުރެއްވުމަށެވެ. ނަމަވެސް އެ އިންތިހާބުގައި އިބްރާހީމް އަދި އޭނާ ތާއިދުކުރެއްވި އަރީޝްއަށް ވެސް ވަނީ ނާކާމިޔާބީއާ ކުރިމަތިލާން ޖެހިފަ އެވެ.
ޕީއެންސީގެ އިސް މަސްދަރުތަކުން ބުނާ ގޮތުގައި، އިންތިހާބު ނިމުނުތާ ކުޑަ ދުވަސްކޮޅެއްގެ ތެރޭގައި ރައީސް އޮފީހުން އޭނާއަށް ހަމަޖައްސައިދީފައިވަނީ އައިޖީއެމްއެޗްގެ ޓްރާންސްޕޯޓްގެ އިސްވެރިޔާގެ މަގާމެވެ. އެ މަގާމު ހަމަޖެހުމުން އިބްރާހިމް ވަނީ ކައުންސިލްގެ މެންބަރުކަމުން އިސްތިއުފާ ދެއްވާފަ އެވެ.
"މިއީ އޭނާ [ޕީއެންސީ ކެންޑިޑޭޓަށް ތާއިދުކުރުމުން] އޭނާއަށް ދިން ހަދިޔާއެއް،" ނަން ނުޖެހުމަށް ޝަރުތުކޮށް ޕީއެންސީގެ އިސް މެންބަރަކު ބުންޏެވެ.
އިބްރާހީމް އަށް މަގާމު ދިންކަން ހާމަވީ، އައިޖީއެމްއެޗުން އިއްޔެ ސޯޝަލް މީޑިއާގައި އާންމުކުރި ހޮސްޕިޓަލުގެ އިވެންޓެއްގެ ފޮޓޯތަކުންނެވެ.
އިބްރާހީމްއަކީ މާލޭ ސިޓީ ކައުންސިލަށް ޕީޕީއެމްގެ ޓިކެޓުގައި އިންތިހާބުވި ބޭފުޅެކެވެ. އޭގެ ފަހުން ޕީއެންސީއަށް ބަދަލުވެ، 2024 ވަނަ އަހަރު ކުރީގެ ރައީސް ޔާމީން އުފެއްދެވި ޕީއެންއެފްއާ ވެސް އޭނާ ގުޅިވަޑައިގަތެވެ.
ކައުންސިލް އިންތިޚާބުގެ ކެމްޕޭން ތެރޭގައި، ޕީއެންސީގެ ކެންޑިޑޭޓަށް ތާއިދުކުރަން އިބްރާހީމް ނިންމެވުމާ ގުޅިގެން ރައީސް ޑރ. މުހައްމަދު މުއިއްޒު ވަނީ އޭނާއަށް އޭރު ޝުކުރު އަދާކުރައްވާފަ އެވެ. ކައުންސިލް މެންބަރުކަމުން އޭނާ އިސްތިއުފާ ދެއްވީ އައިޖީއެމްއެޗްގެ އާ މަގާމާ ހަވާލުވެވަޑައިގަތުމަށެވެ.
