އައިޖީއެމް ހޮސްޕިޓަލުގެ އެޑްމިނިސްޓްރޭޓިވް އަދި ސަޕޯޓިވް މުވައްޒަފުންގެ މުސާރައާ ގުޅޭގޮތުން ހުރި ކަންބޮޑުވުންތަކާއެކު ރައީސް މުއިއްޒުއަށް ޕެޓިޝަނެއް ހުށަހަޅައިފި އެވެ.
މިއީ، ސިވިލް ސާވިސް މުވައްޒަފުންގެ މުސާރައާ ބެހޭ އޮނިގަނޑަށް ގެނައި ބަދަލާ ގުޅިގެން ކަންބޮޑުވުން ފާޅުކޮށް އައިޖީއެމް ހޮސްޕިޓަލުގައި މަސައްކަތް ކުރާ މުވައްޒަފުން މުއިއްޒުއަށް ހުށަހެޅި ދެވަނަ ޕެޓިޝަނެވެ.
މީގެ ކުރިން، ޑިސެމްބަރު 9، 2025، ގައި އެ މުވައްޒަފުން ޕެޓިޝަނެއް ހުށަހެޅި އެވެ. ނަމަވެސް، އެ ޕެޓިޝަނާ ގުޅިގެން އެއްވެސް ޖަވާބެއް ލިބިފައި ނުވާކަމަށް މި ފަހުން ހުށަހެޅި ޕެޓިޝަނުގައި ބުނެފައިވެ އެވެ.
ޖުމުލަ 361 މުވައްޒަފުން ސޮއިކޮށް ހުށަހަޅާފައިވާ އެ ޕެޓިޝަނުގައި މުސާރައިގެ ހާޒިރީގެ އިނާޔަތް ލިބުމުގައި މުވައްޒަފުންނަށް ހަމަހަމަ ކުރުމާއި އިތުރު ގަޑީގައި މަސައްކަތް ކުރާ މުވައްޒަފުންގެ ހައްގުތައް ހޯދައިދިނުމަށް އެދިފައިވެ އެވެ.
ރިސްކު އެލަވަންސް އުނިކުރުމާއި ހާޒިރީ އެލަވަންސް ތަފާތުނުކުރުމަށާއި ރަސްމީ ބަންދު ދުވަސްތަކާއި ހޮނިހިރު ދުވަހުގެ އެލަވަންސް ލިބުމުގައި އޮތް ކަންބޮޑުވުން ވެސް އެ ޕެޓިޝަނުގައި ފާހަގަކޮށްފައިވެ އެވެ.
އެ ޕެޓިޝަނުގައި އެދިފައި ވަނީ ޖުމުލަ ހަތަރުކަމެއް ހައްލު ކޮށްދިނުމަށެވެ. އެއީ:
- ހާޒިރީ އެލަވަންސް އެއްހަމަކުރުން
މަގާމުގެ ފަންތިއަށް ނުވަތަ މަގާމުގެ ގްރޭޑަށް ބެލުމެއްނެތި، ހޮސްޕިޓަލުގައި މަސައްކަތްކުރާ ހުރިހާ މުވައްޒަފުންނަށް މަސައްކަތަށް ނިކުންނަ ކޮންމެ ދުވަހަކަށް 200ރ. އާއި 250ރ. އާ ދެމެދުގެ ހާޒިރީ އެލަވެންެސް އެއްހަމަކުރުން.
- ހޮނިހިރު ދުވަހުގެ އެލަވަންސް
ހޮނިހިރު ދުވަހަކީ ދިވެހި ސިވިލް ސާވިސް މުވައްޒަފުން މަސައްކަތް ކުރާ އިދާރާތަކަށް ސަރުކާރުގެ ބަންދު ދުވަހަކަށްވީ ނަމަވެސް، ހޮސްޕިޓަލުން ހިދުމަތް ދޭންޖެހޭ ދުވަހަކަށް ވާތީ، ހޮނިހިރު ދުވަހު ހޮސްޕިޓަލުގެ މުވައްޒަފުން މަސައްކަތަށް ނުކުންނަން ޖެހުމާއެކު މުވައްޒަފުންނަށް އެ ދުވަހުގެ މަސައްކަތަށް ނިކުތުމުން އިތުރު ގަޑީގެ ފައިސާ އާއި އަދި، ބަންދު ދުވަހުގެ އެލަވަންސް ހަމަޖައްސައި ދިނުން.
- ސަރުކާރު ބަންދު ދުވަސްތަކުގެ އެލަވަންސް
ސަރުކާރު ރަސްމީ ގޮތުން ބަންދުވާ ދުވަސްތަކުގައި ބަންދު ދުވަހެއް ނެތި ޑިއުޓީ އުސޫލުން މަސައްކަތް ކުރާ މުވައްޒަފުންނަށް ލިބެންޖެހޭ ބަންދު ދުވަހުގެ އެލަވެންސް އިންސާފުވެރިކަމާއެކު ހަމަޖައްސައިދިނުން.
- ނެޝަނަލް ޕޭކޮމިޝަނުން، މެއި 2026 ގައި ފޮނުވާފައިވާ އެލަވަންސް ހޯދައިދިނުން
ނޭޝަނަލް ޕޭކޮމިޝަނުން ޕޭހަމަނައިޒް ކުރުމުގައި އުނިވެފައިވާ މިންވަރަށް ބަލައި އެކި މުވައްޒަފުންނަށް ވަކިވަކިން އެލަވަންސް ދިނުމަށް ފޮނުވާފައިވާ އެލަވަންސް އަވަސް ފުރުސަތެއްގައި މުވައްޒަފުންނަށް ލިބޭނެ ގޮތް ހަދައި ދިނުން.
ހޮސްޕިޓަލުގައި މަސައްކަތް ކުރާ މުވައްޒަފުންނަކީ ކޮންމެ ފަދަ ހާލަތެއްގައި ވެސް ރައްޔިތުންގެ ފުރާނައާ ގުޅިފައިވާ ހިދުމަތްތަކެއް ދޭ އެންމެ މުހިންމު އެއް އިދާރާކަން އެ ޕެޓިޝަނުގައި ފާހަގަކޮށްފައިވެ އެވެ. އެހެންކަމުން، އެ ހޮސްޕިޓަލުގެ އެންމެ ދަށް ފަންތިން ފެށިގެން ތަފާތު ކުރުމެއްނެތި އެންމެ މައްޗާ ހަމައަށް މުވައްޒަފުންގެ މެދުގައި ހަމަހަމަކަން ގާއިމުކޮށްދިނުމަށް އެ ޕެޓިޝަނުގައި އެދިފައިވެ އެވެ.
