ހުޅުމާލެ ފޭސް 2، ގައި ތިން މީހުން އަރުވައިގެން ދުއްވި ސައިކަލެއް ފުލުހުންނަށް ފިލަން އުޅެނިކޮށް ސައިކަލެއްގައި ޖެހި ހިނގި އެކްސިޑެންޓުގައި އަނިޔާވި ފަސް މީހުންގެ ތެރެއިން ދެ މީހަކަށް ފަރުވާ ދިނުމަށްފަހު ދޫކޮށްލިއިރު، ދެ މީހަކަށް އަދިވެސް ފަރުވާ ދެމުންދަނީ އައިސީޔޫގައި ވެންޓިލޭޓަރުގެ އެހީގައި ކަމަށް އައިޖީއެމްއެޗް އިން ބުނެފި އެވެ.
އައިޖީއެމްއެޗް އިން ބުނީ އެކްސިޑެންޓުގައި އަނިޔާވެގެން ވޯޑުގައި އެޑްމިޓްކޮށްގެން ފަރުވާ ދެމުންދިޔަ ތިން މީހުންގެ ތެރެއިން ދެ މީހަކު ފަރުވާއަށްފަހު ދޫކޮށްލާފައިވާ ކަމަށެވެ.
"ހުޅުމާލެ އެކްސިޑެންޓް ކޭސްގައި ވޯޑްގައި އެޑްމިޓްކޮށްފައި ތިބި ތިން ޕޭޝަންޓްސްގެ ތެރެއިން ދެ ޕޭޝަންޓްސްއަށް ފަރުވާ ދީފައި ދޫކޮށްލާފައިވީ. ބާކީ ދެ ޕޭޝަންޓްސްއަށް ފަރުވާދެނީ ވެންޓިލޭޓަރުގެ އެހީގައި،" އައިޖީއެމްއެޗް އިން ބުންޏެވެ.
މައުލޫމާތު ލިބިފައިވާ ގޮތުގައި ވެންޓިލޭޓަރުގެ އެހީގައި ފަރުވާ ދެމުންދާ ދެ މީހުންގެ ތެރެއިން އެކަކުގެ ސިކުނޑިއަށް ވަނީ ލޭ އެޅިފަ އެވެ.
ގަވާއިދާ އެއްގޮތަށް ދުއްވި ސައިކަލުގައި ތިބި މީހުންގެ އާއިލާއިން ބުނީ އެކްސިޑެންޓުގެ މައްސަލަ ރަނގަޅަށް ތަހުގީގުކޮށް، ވީގޮތް ހާމަކުރަން އެދޭ ކަމަށެވެ. އޭގެއިތުރުން މިއީ އާދައިގެ އެކްސިޑެންޓެއް ގޮތުގައި ނުދެކުމަށްވެސް އާއިލާއިން ވަނީ އެދިފަ އެވެ.
ފުލުހުން ބުނީ މި އެކްސިޑެންޓު ހިނގަން މެދުވެރިވި އެއް ސައިކަލުގައި ތިން މީހުން އަރައިގެން ދަތުރުކޮށްފައިވަނީ ވަންވޭއާ ހިލާފަށް ކަމަށާއި އެއީ ވަގަށް ނަގާފައިވާ ސައިކަލެއް ކަމަށްވެސް ބެލެވޭ ކަމަށެވެ. އޭގެއިތުރުން އެ ސައިކަލު ދުއްވަން އިން މީހާ އަތުގައި ލައިސަންސް ނެތް ކަމަށްވެސް ފުލުހުން ބުންޏެވެ.
މައުލޫމާތު ލިބޭ ގޮތުގައި ގަވާއިދާ ހިލާފަށް ވަންވޭއާ އިދިކޮޅަށް ސައިކަލު ދުއްވި މީހާއަކީ ގިނަ އަދަދެއްގެ ކުށުގެ ރެކޯޑު އޮންނަ މީހެކެވެ. އެގޮތުން މީގެކުރިން އޭނާ ވަނީ އެކިއެކި މައްސަލަތަކުގައި ހައްޔަރުކޮށްފަ އެވެ.
