މުޖުތަމައުގައި އިހުތިރާމް ކުރުމުގެ ސިފަ އާލާކުރުމަށް ސަރުކާރުން ފަށާ ގައުމީ މަޝްރޫއު، ރައީސް މުހައްމަދު މުއިއްޒު މިރޭ އިފުތިތާހުކޮށްދެއްވައިފި އެވެ. މިފަދަ މަޝްރޫއެއް މިއަހަރު ފަށާނެ ކަމަށް ރައީސް ވިދާޅުވީ ފެބްރުއަރީ މަހު ހުށަހެޅުއްވި ރިޔާސީ ބަޔާނުގަ އެވެ.
އެކުވެނި ދުވާ ޓްރެކްގައި ބޭއްވި ކުލަގަދަ ރަސްމިއްޔާތުގައި ރައީސްގެ އިތުރުން ސަރުކާރުގެ އިސްވެރިން ބައިވެރިވެވަޑައިގެންނެވި އެވެ. އަދި ގިނަ އަދަދެއްގެ ސިފައިންނާއި ފުލުހުންގެ އިތުރުން، ސަރުކާރުގެ އެކި އޮފީސްތަކާއި ސަރުކާރު ހިއްސާވާ ކުންފުނިތަކުގެ މުވައްޒަފުން ވެސް މި ރަސްމިއްޔާތުގައި ބައިވެރިވި އެވެ.
މި ގައުމީ މަޝްރޫއުގެ މައިގަނޑު މަގުސަދަކީ ދިވެހި މުޖުތަމައުގައި ގެއްލެމުންދާ އިޖުތިމާއީ އަގުތަކާއި، އަދަބުވެރިކަމުގެ އިތުރުން އެކަކު އަނެކަކަށް ގަދަރުކުރުމުގެ ރީތި ސިފަތައް އަލުން ދިރުވައި އާލާކުރުމެވެ.
އިހުތިރާމް އަދާކުރުމުގެ ކެމްޕެއިން ލޯންޗިންގައި ބައިވެރިވާން ސަރުކާރު އޮފީސްތަކާއި ކުންފުނިތަކުގެ މުވައްޒަފުންނަށް މަޖުބޫރުކުރަނީ
ސަރުކާރުން ފަށާ "އިހުތިރާމް އަދާކުރުމުގެ ގައުމީ ކެމްޕެއިން" ލޯންޗުކުރުމުގެ ރަސްމިއްޔާތަށް ސިވިލް ސާވިސް މުވައްޒަފުންނާއި ކުންފުނިތަކުގެ މުވައްޒަފުން ހާޒިރުވުމަށް މަޖުބޫރުކޮށް، ހާޒިރީ ބެލުމަށް ވަނީ އަންގާފައި. މިރޭ ބާއްވާ މި ހަރަކާތުގައި ބައިވެރިވުމަށް ސިވިލް ސާވިސް ކޮމިޝަނުންނާއި އޮފީސްތަކުގެ ވެރިން މުވައްޒަފުންނަށް ދަނީ އަންގަމުން.
ނަމަވެސް އިވެންޓަށް ސަރުކާރު އޮފީސްތަކާއި ކުންފުނިތަކުގެ މުވައްޒަފުން ހާޒިރުވުމަށް މަޖުބޫރުކޮށްފައިވާ ކަމަށް ބުނެ ފާޑުކިޔުންތައް ވަނީ އަމާޒުވެފަ އެވެ.
ރަސްމިއްޔާތަށް ތައްޔާރުވުމަށްޓަކައި ހަފުތާއެއްހާ ދުވަސް ކުރިން އެކުވެނި ދުވާ ޓްރެކް ބަންދުކުރުމުން، ކަސްރަތުކުރުމަށް އެ ތަން ބޭނުންކުރާ އާންމުންނާއި ދޮށީ އުމުރުގެ މީހުންނަށް ދަތިތަކާ ކުރިމަތިވި ކަމަށް ބުނެ ވެސް ބައެއް އާންމުން ވަނީ ނުރުހުން ފާޅުކޮށްފަ އެވެ.
