މި ސަރުކާރުން އެއްބަސްވުން ބާތިލުކުރުމުން ލިބުނު ގެއްލުމަށް 70 މިލިއަނަށްވުރެ ބޮޑު ބަދަލެއް ހޯދަން އިންޑިއާ ކުންފުންޏަކުން ހުށަހަޅާފައިވާ ކަމަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބުނެފި އެވެ.
އެމްޑީޕީން ނެރުނު ނޫސް ބަޔާނެއްގައި ބުނީ ކ. ތުލުސްދޫ ހޮސްޕިޓަލް މަޝްރޫއު އާއި ނ. ވެލިދޫ ހޮސްޕިޓަލް މަޝްރޫއު އަދި ށ. މިލަންދޫ ހޮސްޕިޓަލް މަޝްރޫއުގެ އެއްބަސްވުން މިދިޔަ އަހަރުގެ މާޗު 11، ގައި މި ސަރުކާރުން ވަނީ ބާތިލުކޮށްފައި ކަމަށެވެ.
އަދަދު އަށް އެނގިފައިވާ ގޮތުގައި އެ ހޮސްޕިޓަލްތައް އަޅަން ހަވާލުކުރީ އިންޑިއާގެ އާނަންޑް ބިލްޑްޓެކް ޕްރައިވެޓް ލިމިޓެޑާ އެވެ. އޭގެތެރެއިން ކ. ތުލުސްދޫ ހޮސްޕިޓަލް އަޅަން 91.7 މިލިއަން ރުފިޔާއަށް ހަވާލުކުރިއިރު، ނ. ވެލިދޫ ހޮސްޕިޓަލާއި ށ. މިލަންދޫ ހޮސްޕިޓަލް އަޅަން ހަވާލުކުރީ 95.6 މިލިއަން ރުފިޔާއަށެވެ.
މިދިޔަ އެމްޑީޕީ ސަރުކާރުން ހަވާލުކުރި 16 މަޝްރޫއެއް ކުރިއަށްނުގޮސް ހުއްޓިފައިވާ ކަމަށް ހެލްތު މިނިސްޓަރު ގީލާ އަލީ ވިދާޅުވި ވާހަކައަށް ރައްދުދީ ނޫސް ބަޔާނުގައި އެމްޑީޕީން ބުނީ އެ މަޝްރޫއުތައް ހިނގަމުންދަނިކޮށް ހުއްޓުވީ މި ސަރުކާރުން ކަމަށެވެ.
އެމްޑީޕީން ބުނީ މަޝްރޫއުތައް ހަވާލުކޮށްފައިވާ ކޮންޓްރެކްޓަރުންނާއެކު ހަދާފައިވާ އެއްބަސްވުންތައް މި ސަރުކާރުން ވެރިކަމަށް އައިސް އާންމުންނަށް ގެއްލުންވާ ގޮތަށް ބާތިލުކޮށް އެ މަޝްރޫއުތައް ބޮޑު އަގުގައި ސަރުކާރުގެ އެކި އެސްއޯއީތަކާ މިހާރު ހަވާލުކޮށްފައިވާ ކަމަށެވެ.
މިދިޔަ ސަރުކާރުން ހަވާލުކުރި ހެލްތު ސެކްޓާގެ 16 މަޝްރޫއުއެއް ހިނގަމުންދަނިކޮށް ހުއްޓުވީ މި ސަރުކާރުން: އެމްޑީޕީ
ނިމިދިޔަ ސަރުކާރުން ހަވާލުކުރި ހެލްތު ސެކްޓަރުގެ 16 މަޝްރޫއެއް ހުއްޓުވީ މި ސަރުކާރުން ކަމަށް ބުނެ އެމްޑީޕީން ހެލްތު މިނިސްޓަރުގެ ވާހަކަތަކަށް ރައްދުދީފި. އެ ޕާޓީން ބުނީ ކުރީގެ އެއްބަސްވުންތައް ބާތިލުކޮށް، ބޮޑު އަގުގައި ސަރުކާރުގެ ކުންފުނިތަކާ މަސައްކަތްތައް ހަވާލުކުރުމުގެ ސަބަބުން ދައުލަތަށް ބޮޑެތި ގެއްލުންތަކެއް ލިބެމުންދާ ކަމަށް.
އެމްޑީޕީ ސަރުކާރުން މަޝްރޫއުތައް ހަވާލުކޮށްފައިވަނީ މިނިސްޓްރީ އޮފް ފިނޭންސްއިން ނޭޝަނަލް ޓެންޑާ ބޯޑް މެދުވެރިކޮށް ނިންމަންޖެހޭ ހުރިހާ މަރުހަލާއެއް ނިންމުމަށްފަހުކަން ފާހަގަކޮށް އެ ޕާޓީން ބުނީ މަޝްރޫއުތަކުގެ އެއްބަސްވުންތައް ބާތިލުކުރުމުން ލިބުނު ގެއްލުމުގެ ފުރިހަމަ ޒިންމާ ނަގަން ޖެހޭނީ "މިއަދުގެ ނާގާބިލު ސަރުކާރުން" ކަމަށެވެ.
ކޮންޓްރެކްޓާ ފައިނޭންސް އުސޫލުން ސްޕެއިންގެ އެގްޒިމް ބޭންކްގެ އެހީގައި އެމްޓީސީސީ މެދުވެރިކޮށް އިމާރާތްކުރަން ހަވާލުކޮށްފައިވާ ލ. ގަމު ޓާޝަރީ ހޮސްޕިޓަލް އަދި ގައްދޫ ހޮސްޕިޓަލްގެ މަސައްކަތް ވެސް މި ސަރުކާރުން ވަނީ ހުއްޓުވާފައި ކަމަށް އެމްޑީޕީން ބުންޏެވެ.
އެ ޕާޓީން ބުނީ މިދިޔަ ސަރުކާރުން ސައުދީ ފަންޑް ފޯ ޑެވޮލޮޕްމަންޓްއަށް ހުށަހަޅައިގެން އއ. ރަސްދޫ ހޮސްޕިޓަލް މަޝްރޫއު، ނ.މަނަދޫ ހޮސްޕިޓަލް މަޝްރޫއު އަދި ޏ. ފުވައްމުލަށް ހޮސްޕިޓަލް މަޝްރޫއަށް 50 މިލިއަން ޑޮލަރު ހޯދާފައި ވަނިކޮށް މި ސަރުކާރުން ވަނީ އޭގެތެރެއިން އއ. ރަސްދޫގެ ބަދަލުގައި ފ. ނިލަންދޫ އަދި ނ. މަނަދޫގެ ބަދަލުގައި ލ. ފޮނަދޫގައި އޭގެ ތެރެއިން ދެ ހޮސްޕިޓަލް އަޅަން ނިންމާފައި ކަމަށެވެ.
