ގައުމީ ފުޓްބޯޅަ ޓީމުގެ ސްކޮޑަށް ނަގާ ކުޅުންތެރިން ޓީމާ އެކު ދިއުމާ މެދު ގެންގުޅެން ޖެހޭ ވިސްނުމާއި އަމިއްލަ އަށް ދެކޭ ގޮތް، ވިކްޓަރީ ސްޕޯޓްސް ކްލަބްގެ އެސިސްޓަންޓް ކޯޗު، އަދި ގައުމީ ފުޓްބޯޅަ ޓީމުގެ ކުރީގެ އެއް ވަނަ ފޯވާޑް، އާދަމް އަބްދުއްލަތީފް (ލައްޗޭ) ހިއްސާކޮށްފި އެވެ.
ގައުމީ ފުޓްބޯޅަ ޓީމުން އެންމެ ފަހުން ފީފާ ބްރޭކުގައި ނެގި ސްކޮޑުން އަމިއްލަ ސަބަބަކާ ހުރެ ބައެއް ކުޅުންތެރިން ޓީމާ އެކު ނުދެ އެވެ. އޭގެ ތެރޭގައި ވިކްޓަރީގެ ކުޅުންތެރިން ވެސް ހިމެނެ އެވެ. އެކަމާ ގުޅޭގޮތުން، ދިރާގު ދިވެހި ޕްރިމިއާ ލީގުގެ ނޫސްވެރިންގެ ބައްދަލުވުމެއްގެ ތެރެއިން، ލައްޗޭއާ ވަނީ ސުވާލު އަމާޒުވެފަ އެވެ.
ލައްޗޭ ބުނީ އެއްވެސް އިރެއްގައި ގައުމީ ފުޓްބޯޅަ ޓީމަށް ކްލަބެއްގެ ކުޅުންތެރިއަކު ނެގުމުން، އެ ކުޅުންތެރިން ގައުމީ ޓީމަށް ދިޔަނުދޭން ކްލަބެއްގެ މެނޭޖްމަންޓުން ހިފަހައްޓާފައިނުވާ ކަމަށެވެ. އެއީ، އެ ގޮތަށް ހިނގާ ކަމެއް ނޫން ކަމަށް ލައްޗޭ ވަނީ އިތުބާރާ އެކު ބުނެފަ އެވެ.
"ތި ކަންތައް ދިމާވެގެން ކޯޗު ވެސް ވަރަށް ގިނައިން ތި ސުވާލު އުފެދިގެން ވަކިވަކިން ތި ނަންތައް ކީ ކުޅުންތެރިންނަށް ސުވާލުކޮށް ހެދިން، ތި ކުދިން މި ދުވަސްވަރު ގައުމީ ޓީމަށް ކުޅޭއިރު ކިހިނެއްހޭ ތި ސިލެކްޓް ކުރީމާ ތި މީހުންނަށް އޭތި އިގްނޯކޮށް ތިހެން ތި އަނެކަތި ކުރެވެނީ،" ލައްޗޭ ކިޔައިދިނެވެ.
"ދެން، އެ ކުދިންގެ ވެސް އިނީ ބޮޑު ސިންގާ އެކްސްކިއުޒެއް (އުޒުރެއް). މަންމަ، ބައްޕަ ބަލިވެ، އެ މީހުން އިމަޖެންސީކޮށް ތަަނަކަށް ދާންޖެހޭތީއާ އެކީގައި އަސްލު އެ ގޮތަށް އެ ކުޅުންތެރިން ނިންމީ، ހަަގީގަތުގައި މި ވަގުތު އެ މީހުންނަށް ޓީމުގައި ބައިވެރިވެވެން ނެތީ އިންޖަރީ ވެސް އެއް ކަމެއް ވެސް ނެތް. އެކަމަކު ފެމިލީގެ ބޮޑު އިޝޫއެއް އޮތީ،"
ލައްޗޭ ބުނީ، ގައުމީ ފުޓްބޯޅަ ޓީމުން މިހާރު ތައްޔާރުވަމުން އެ އަންނަނީ ބަންގްލަދޭޝްގެ ޑާކާގައި އަންނަ މަހު 4-17 އަށް ބާއްވާ ސާފް ޗެމްޕިއަންޝިޕަށެވެ. ލައްޗޭ ބުނީ އެ މުބާރާތަށް ތައްޔާރުވުމަށް ކުޅޭ މެޗުތަކެއްގެ ސްކޮޑަށް ކުޅުންތެރިން ނެގުމުން، އެ ކުޅުންތެރިންނަށް ޓީމަށް ނުދެވޭނީ ގައުމީ ކޯޗުގެ ފަރާތުން ވެސް އެ ފުރުސަތު އޮންނާތީވެ ކަމަށެވެ.
"އެ ވަރުގެ ސީނިއާ އެކްސްޕީރިއަންސް ޕްލޭޔަރުން ގައުމީ ޓީމުގެ ކޯޗަށް ރިކުއެސްޓްކުރީމާ އޭނަގެ ފަރާތުން އެ އޮފާ ލިބިގެންދޯ އެ މީހުންނަށް މަޑުކުރެވޭނީ ނޫނީ އެފްއޭއެމް ތުރޫކޮށް އެ މީހުންނާ ދޭތެރޭ ޑިޒިޝަނެއް ވެސް ނެގޭނެ، އެހެންވީމަ މިހާރު ބޯޅަ އޮތްގޮތުން، އެބައޮތޭ ކުޅުންތެރިއަކަށް ތިމަންނަ ރަށަށް ދަނީ ތިމަންނަ ގޭގެ މަސައްކަތެއް އޮތީ ކިޔާފައި ސްކިޕްކޮށްފައި އަނެއް ދުވަހު،" ލައްޗޭ ބުންޏެވެ.
"ކޯޗު ސުވާލުކުރިން، އަނެއް ދުވަހު ކުޅެން އައިސްފައި ކިހިނެއްހޭ ގައުމީ ޓީމަށް އެރޭނީ. އެކަމަކު، ކޯޗު މެން ކުޅުނުއިރު ވެސް އެއީ ތެދެއް މެ. އައިސްފައި ހަމަ މޮޅަށް ކުޅެފިކަމަށްވިންޏާ ސާފް ގޭމްސް (ސާފް ޗެމްޕިއަންޝިޕް) އަށް ދާއިރު އެ މީހުން (ޓީމަށް) ލައިގެން ދާނީ،"
ދިވެހި ޕްރިމިއާ ލީގުގައި މިހާރު ވާދަކުރާ ޓީމުތަކާއި ކުޅުންތެރިންގެ ފެންވަރަށް ބަލާއިރު، ދެން ނަގާ ގައުމީ ސްކޮޑުގައި ވިކްޓަރީ އަށް ނިސްބަތްވާ ހަތެއް ނޫނީ އަށް ވަރަކަށް ކުޅުންތެރިން ގައުމީ ސްކޮޑަށް އެރުވުމަކީ، ވިކްޓަރީގެ ކޯޗިން ސްޓާފުންގެ އަމާޒެއް ކަމަށް ލައްޗޭ ވަނީ ބުނެފަ އެވެ.
