ބައިނަލްއަގުވާމީ އެކުވެރިކަމުގެ ފުޓްބޯޅަ މެޗެއްގައި މިރޭ ލެބަނަންއާ ދެކޮޅަށް ކުޅެ ރާއްޖެ 6-0 އިން ބަލިވެއްޖެ އެވެ.
ރާއްޖޭން މި މެޗުގެ ބޮޑުބައި ކުޅުނީ ކުޅުންތެރިއަކު މަދުކޮށެވެ. އެއީ، މެޗުގެ 11 ވަނަ މިނިޓްގައި ގައުމީ ޓީމުގެ ކެޕްޓަން، ސަމޫހު އަލީ (ސަމުއްޓެ) އަށް ރަތް ކާޑެއް ދެއްކުމުންނެވެ. އޭރު ނަތީޖާ އަކީ، 1-0 އެވެ.
ލެބަނަންއާ ދެކޮޅަށް ކުޅުނު މެޗާ އެކު، ރާއްޖޭން މި ފަހަރުގެ އިންޓަނޭޝަނަލް ބްރޭކުގައި ކުޅުނު ތިން މެޗުން ވެސް ބަލިވެފައި މި ވަނީ ލަނޑެއް ވެސް ނުޖެހި އެވެ.
އެ ގޮތުން، މިދިޔަ މަހު 24 ވަނަ ދުވަހު ޗައިނާގައި އެ ގައުމާ ދެކޮޅަށް ކުޅެގެން، 3-0 އިން ބަލިވިއިރު، އޭގެ ހަަތަރު ދުވަސް ފަހުން، ކިރްގިސްތާނަށް ދަތުރުކޮށް، އެ ގައުމާ ކުޅެގެން ވަނީ 5-0 އިން ބަލިވެފަ އެވެ. އަދި، ކިރްގިސްތާންގެ ބިޝްކެކްގައި މިރޭ ލެބަނަންއާ ކުޅެގެން ހަ ގޯލުން ބަލިވީ އެވެ.
ބާރަ އަހަރަށް ފަހު، ރާއްޖޭގެ ކޯޗުކަމާ މި އަހަރުގެ ކުރީކޮޅުގައި އަލުން ހަވާލުވެ، ގައުމީ ކޯޗު ހަންގޭރީގެ އިސްތަވާން އުރްބާނީގެ އިރުޝާދުގެ ދަށުން ރާއްޖޭން މި ވަނީ ޖުމްލަ އެކު، 10 މެޗު ކުޅެފަ އެވެ. އެފްއޭއެމްގެ ޓެކްނިކަލް ޑިރެކްޓަރުގެ މަގާމު ވެސް އަދާކުރަމުން އަންނަ އުރްބާނީ 20 އަހަރުން ދަށުގެ ޓީމުގެ ކޯޗަކަށް ވެސް މަަސައްކަތްކުރިއިރު، ނުކުތް 10 މެޗުގެ ތެރެއިން މޮޅުވީ، މިދިޔަ މާޗް މަހު މާލޭގައި ޓިމޯ ލެސްޓޭ އަތުންނެވެ. ހަ މެޗުން ބަލިވިއިރު، ތިން މެޗުން ވަނީ އެއްވަރުވެފަ އެވެ.
ލެބަނަން އިން ވަނީ މެޗުގެ ތިން ވަނަ މިނިޓްގައި ލީޑުނަަގައިފަ އެވެ. މިއީ، މިރޭގެ މެޗަށް ރާއްޖޭގެ މިޑްފީލްޑަރަކަށް ބޭނުންކުރި ހުސެއިން ސިފާއު ޔޫސުފް (ކުރޯ) އަތުން ގެއްލުނު ބޯޅައަކުން، އޭރިއާތެރެއިން، ހުސެއިން ޗަކްރޯން ޖެހި ލަނޑެކެވެ. އޭގެ ކުރިން، އޭރިއާތެރެއިން ލެބަނަންގެ ޖިމޭ ކަޒާން ފޮނުވާލި ބޯޅައެއް ރާއްޖޭގެ ކީޕަރު، ހުސެއިން ޝަރީފް ވަނީ މަތަކޮށްފަ އެވެ.
އޭގެ ފަހުން، މެޗުގެ 11 ވަނަ މިނިޓްގައި، ސަމުއްޓެ އަށް ރަތެއް ދެއްކީ، ލެބަނަންގެ ލެއޮނާޑޯ ޝާހިން އޭރިއާތެރެއަށް ހުސްކޮށް ވަންނަން ދިޔަ ބޯޅައެއްގައި އޭނާ ގައިގައި ހިފެހެއްޓުމުންނެވެ.
އެއް ކުޅުންތެރިއަކު މަދުކޮށް ރާއްޖޭން ރަނގަޅަށް ކުޅެމުންދިޔަ ނަމަވެސް މެޗުގެ 34 ވަނަ މިނިޓްގައި ލެބަނަން އިން ދެ ވަނަ ލަނޑު ޖެހި އެވެ. މިއީ، އޭރިއާބޭރުން، ލެބަނަންގެ ޖިމޭ ކަޒާން ފޮނުވާލި ބޯޅައެއް، އޭރިއާތެރެއިން ޗަކްރޯން ގަައިގައި ޖެހިފައި ވަން ގޯލެކެވެ. މެޗުގެ ރެފްރީ އެ ގޯލު ބަލައިގަންނަން ނިންމީ، ޗަކްރޯން އަތުގައި ބޯޅަ ޖެހުނުތޯ ބަލައިފަ އެވެ.
މެޗުގެ 42 ވަނަ މިނިޓްގައި ޗަކްރޯން ވަނީ ތިން ވަނަ ލަނޑު ޖަހައި ހެޓްރިކް ފުރިހަމަކޮށްފަ އެވެ. މިއީ، އޭރިއާތެރެއިން ރާއްޖޭގެ ޑިފެންޑަރުންނަށް ސަލާމަތްނުކުރެވި ދިޔަ ބޯޅައެއް ހޯދައި، ގޯލުގެ ތިރީ ކަނަށް އަމާޒުކޮށްލައިގެން ޗަކްރޯން ޖެހި ގޯލެކެވެ. އޭނާ އަކީ ލެބަނަން އަށް ހެޓްރިކެއް ހަދައިދިން ނުވަ ވަނަ ކުޅުންތެރިޔާ އެވެ.
ޗަކްރޯން އަކީ މި ފަހަރުގެ އިންޓަނޭޝަނަލް ބްރޭކުގައި ރާއްޖެ ކޮޅަށް ހެޓްރިކް ހެދި ދެ ވަނަ ކުޅުންތެރިޔާ އެވެ. މީގެ ކުރިން، ޗައިނާގެ ވަން ޒިމިން ވަނީ ހެޓްރިކް ހަދައިފަ އެވެ.
ފުރަތަމަ ހާފުގައި ރާއްޖެ އަށް ލަނޑެއް ޖަހައިދޭން އެންމެ ހުސް ފުރުސަތެއް ލިބިގެންދިޔައީ ސަމުއްޓެ އަށް ރަތް ކާޑެއް ދެއްކި ފަހުން ޓީމުގެ ކެޕްޓަން، ބޭންޑް އަޅައިގެން ކުޅުނު އަލީ ފާސިރު (ސެންޓޭޭ) އަށެވެ. އެ ގޮތުން، ލެބަނަންގެ ކީޕަރު، މޮސްތަފާ މަތަރު ކުރިއަށް ޖެހި ފޮނުވާލަން މަސައްކަތް ކުރި ވަގުތު ސެންޓޭ އަށް ލިބުނު ފުރުސަތެކެވެ. ކީޕަރު މަތަރު ކުރިއަށް އަރައި ހުއްޓައި ލިބުނު މި ފުރުސަތުގައި ސެންޓޭ ޖެހި ޝޮޓް ދިޔައީ ހުރަސްދަނޑިމަތިންނެވެ.
ރާއްޖޭން ދެ ވަނަ ހާފުގައި ދެ ބަދަލަކާ އެކު ނުކުތްއިރު، މި ހާފުގެ ހަ މިނިޓް ތެރޭ ލެބަނަން އިން ރާއްޖެ ކޮޅަށް ހަތަރު ވަނަ ލަނޑު ޖެހި އެވެ. މިއީ، އަރިމަތިން ނެގި ހުރަހަކުން ލެބަނަންގެ ޝާހީން ހުސްކޮށް އަރައި ޖެހި ޝޮޓެއް ކީޕަރު ހުސެން މަތަކުރުމުން، ރީބައުންސަށް ނުކުތް ބޯޅަ ރާއްޖޭގެ އަހުމަދު މާއިޝް ރަޝީދު (މާއި) ގައިގައި ޖެހިފައި ބައިކޮޅަށް ވަން ގޯލެކެވެ.
ލެބަނަން އިން ފަސް ވަނަ ލަނޑު ޖެހީ 84 ވަނަ މިނިޓްގަ އެވެ. މިއީ، އޭރިއާތެރެއިން އަލީ ކަސަސް އަށް ލިބުނު ފުރުސަތެއްގައި ތިރީ ކަނަށް ބޯޅަ ފޮނުވާލައިގެން ޖެހި ގޯލެކެވެ. ދެ ވަނަ ހާފުގައި ބަދަލަކަށް ކުޅެން އެރި ކަސަސް ވަނީ މެޗުގެ އިތުރު ވަގުތުގައި ލެބަނަންގެ ހަ ވަނަ ލަނޑު ޖަހައިފަ އެވެ.
މިއީ، ލެބަނަންގެ ކޯޗުކަމާ މި އަހަރުގެ ޖެނުއަރީ މަހު އަލްޖީރިއާގެ މަޖީދު ބުގޭރާ ހަވާލުވި ފަހުން ރަސްމީ މެޗަކުން އެ ޓީމުން ހޯދި ފުރަތަމަ މޮޅެވެ. ލެބަަނަންގެ ކޯޗުކަމާ މި އަހަރުގެ ޖެނުއަރީ މަހު ހަވާލުވީ ތިން އަހަރުގެ ކޮންޓްރެކްޓެއްގަ އެވެ. އޭނާގެ ކޯޗުކަމުގައި މިހާތަނަށް ލެބަނަން އިން ކުޅުނީ ރަސްމީ އެންމެ މެޗެއްގަ އެވެ. އެ މެޗުން، ޔަމަން އަތުން 2-0 އިން ވަނީ މޮޅުވެފަ އެވެ. އަދި، ގަތަރުގެ ދޯހާގައި ޓްރެއިނިން ހަދަމުން އަންނަ ލެބަނަން އިން ވަނީ، ރާއްޖެ އާއި ކިރްގިސްތާނާ ކުޅުމުގެ ކުރިން، މިދިޔަ މަހުގެ 27 ވަނަ ދުވަހު، ގަތަރުގެ ކްލަބް، އަލް ސާދާ އެކު. މެޗެއް ކުޅެފަ އެވެ. އެ މެޗުން، ލެބަނަން ވަނީ 2-1 އިން މޮޅުވެފަ އެވެ.
އަނެއްކޮޅުން، މިރޭގެ ނަތީޖާއާ އެކު، ލެބަނަން އިން މި ވަނީ ރާއްޖެއާ ދެކޮޅަށް ސައްތަ އިން ސައްތަ ރެކޯޑް ދަމަހައްޓައިފަ އެވެ. ލެބަނަން އިން ވަނީ 2004 ވަނަ އަަހަރު ވޯލްޑް ކަޕް ކޮލިފައިންގެެ ދެ މެޗުން ރާއްޖެ، 3-0 އާއި 5-2 އިން ބަލިކޮށްފަ އެވެ. އޭގެ ހަތަރު އަހަރު ފަހުން، 2008 ވަނަ އަހަރު ކުޅުނު ދެ އެކުވެރިކަމުގެ މެޗުތަކުގައި ލެބަނަން މޮޅުވީ، 4-0 އާއި 2-1 އިންނެވެ. އެންމެ ފަހުން، މި ދެ ޓީމު ކުޅުނީ 2023 ވަނަ އަހަރު ބެންގަލޫރުގައި އޮތް ސާފް ޗެމްޕިއަންޝިޕްގަ އެވެ. އެ މެޗުން ލެބަނަން މޮޅުވީ 1-0 އިންނެވެ.
ފީފާ އިން މި މަހު ނެރުނު ރޭންކިންގައި، ލެބަނަން އޮތީ 114 ވަނައިގަ އެވެ. ރާއްޖެ އޮތީ، 172 ވަނައިގަ އެވެ.
އަންނަ ނޮވެމްބަރު މަހު އޮތް ސާފް ޗެމްޕިއަންޝިޕަށް ތައްޔާރުވާން ރާއްޖޭން މި ފަހަރުގެ އިންޓަނޭޝަނަލް ބްރޭކުގައި ކުޅުނު ތިން މެޗުން ބަލިވިއިރު، އުރްބާނީގެ ކޯޗުކަމުގައި ރާއްޖޭން މޮޅުވީ ޓިމޯ ލެސްޓޭ އަތުން 2-1 އިންނެވެ. ރާއްޖޭގެ ސީނިއާ ގައުމީ ޓީމު އުރްބާނީގެ ކޯޗުކަމުގައި މި ފަހަރު ހަވާލުވި ފަހުން ބަލިވީ މިރޭ ލެބަނަން އަތުން ބަލިވުމުގެ އިތުރުން، އަފްގާނިސްތާން (1-0)، ޕާކިސްތާން (3-0)، ޗައިނާ (3-0) އަދި ކިރްގިސްތާން (5-0) އަތުންނެވެ.
ސީނިއާ ޓީމު ވަނީ ބަންގްލަދޭޝްގެ 23 އަހަރުން ދަށުގެ ޓީމާ 1-1 އިން އެއްވަަރުވެފަ އެވެ.
ރާއްޖޭގައި ބޭއްވި 20 އަހަރުން ދަށުގެ ސާފް ޗެމްޕިއަންޝިޕްގައި، އުރްބާނީގެ ކޯޗުކަމުގައި ރާއްޖެ ވަނީ ސްރީ ލަންކާ އަތުން 3-2 އިން ބަލިވެފަ އެވެ. އަދި، ބޫޓާނާ 0-0 އިން އެއްވަރުވިއިރު، ނޭޕާލާ އެއްވަރުވީ 1-1 އިންނެވެ.
