އަނިޔާގައި ހުރި ނަަމަވެސް ވިކްޓަރީ ސްޕޯޓްސް ކްލަބްގައި، ހަމްޒާ މުހައްމަދު (ހަމްޕު) އަކީ މުހިންމު ކުޅުންތެރިއެއް ކަމަށް އެ ޓީމުގެ އެސިސްޓަންޓް ކޯޗު، އާދަމް އަބްދުއް ލަތީފް (ލައްޗޭ) ބުނެފި އެވެ.
ލީގުގައި މިއަދު ހަވީރު މާޒިޔާ ސްޕޯޓްސް އެންޑް ރެކްރިއޭޝަނާ ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި، ވިކްޓަރީގެ ހެޑް ކޯޗު، މުހައްމަދު ޝިޔާޒް (މޯހަން) އަށް ބައިވެރިނުވެވޭތީވެ، އެ ޓީމުގެ ފަރާތުން ނޫސްވެރިންެގެ ސުވާލުތަކަށް ޖަވާބުދޭން ބައްދަލުވުމަށް އައީ ލައްޗޭ އެވެ.
ހަމްޕު، މި ސީޒަނުގައި ވިކްޓަރީ އަށް ބަދަލުވީ ހަތް އަހަރު މާޒިޔާގައި ހޭދަކޮށްފަަ އެވެ. އެކަމަކު، ކަކުލަށް ލިބުނު އަނިޔާ އަކަށް ފަރުވާ ހޯދަމުން އަންނަ ހަމްޕު އަށް ކުޅެވޭނެ ކަމަށް ބެލެވެނީ އަންނަ އަހަރު އެވެ.
"ހަމްޕު އަށް ބަލާއިރު، އަދި ޓްރެއިނިން ސެޝަންގައި ބައިވެރިއެއް ނުވޭ. މި ބަލަނީ މި އަހަރު ގާތްގަނޑަކަށް ފަހުކޮޅު ހިސާބުގައި ފަހަރެއްގައި ޓްރެއިނިން ފީލްޑަށް ނުކުމެދާނެ، ހަމްޕު އެ ދަނީ މިހާރު ޓްރީޓްމަންޓް ނަަގަމުން، ފިޒިއޯ ޑޮކްޓަރުގެ އިރުޝާދާ އެއްކޮށް އެ ގޮތަށް ގޮސްގެން، ކޯޗު ބުނީ، އޭތި ރިކަވާވެގެން ފީލްޑަށް އަންނަން. އެހެންވީމަ ހަމްޕު އަދި ޓީމަކާ ނުގުޅޭ، އެކަމަކު ހުރިހާ ސެޝަންތަކެއްގައި ވެސް ހަމްޕު ވަރަށް ބަރާބަރު ސީނިއާ ޕްލޭޔަރަކު އައިސް ކުޅުންތެރިން މޯޓިވޭޓް ކުރަން ހުރިހާ ސެޝަނެއްގައި ވެސް އިންނާނެ ބޭރުގައި ބަލަން،" ހަމްޕުގެ މުހިންމުކަން ހިއްސާކޮށް ލައްޗޭ ބުންޏެވެ.
ވިކްޓަރީ އަކީ ފުރަތަމަ ޑިވިޝަނުގައި 2014 ވަނަ އަހަރުން ފެށިގެން ވާދަކުރަމުން އަންނަ ހަމްޕުގެ ކެރިއަރަުގައި އޭނާ ކުޅޭނެ ތިން ވަނަ ކްލަބް އެވެ.
އަނިޔާގައި ހުރުމަކީ ވިކްޓަރީން ހަމްޕު ގެންނަން ކުރި މަސައްކަތަށް ބަލާއިރު ކްލަބަށް ރަނގަޅު ގޮތެއްތޯ ސުވާލުކުރުމުން ލަައްޗޭ ބުނީ، ރާއްޖޭގެ ފުޓްބޯޅައިގެ ހާލަތު އޮތްގޮތާއި ކުޅުންތެރިންގެ ޓްރާންސްފާގެ ކަންކަމަށް ބަލާއިރު މޮޅެތި ކުޅުންތެރިން ޓީމުތަކުގައި ހުުރުމަކީ ކޯޗުގެ ޕްލޭން ކަަމަށެވެ.
"މިހާރު މި ބުނާހެން، ރާއްޖޭގެ ފުޓްބޯޅަ މީނީ ހީކުރާ ވަރަށް ވުރެން އެހެން ކަހަލަ ފައްތަރެއްގައި. ވަރަށް އުނދަގުލުން ފުޓްބޯޅަ އަނެއްކާ ވެސް ބަޔަކު ދިރުވައި އާލާ ކުރިއިރު، ފުޓްބޯޅައިގެ ކުޅުންތެރިންގެ އެގްރިމެންޓްތަކާ އެއްޗެހިތައް މި ހުރީ ސަޕޯޓަރުން ނުވަންނައިރާ ބަލާއިރުގައި ވަރަށް ބޮޑެތި އަދަދުތައް،" ގައުމީ ޓީމާއި ރާއްޖޭގެ މަޝްހޫރު ކްލަބްތަކަށް ކުރިން ކުޅުނު ލައްޗޭ ބުންޏެވެ.
"މި ވަގުތު އަަސްލު ހަމްޕު، މާޒިޔާ އިން ވިކްޓަރީ އަށް ބަދަލު ވުމަކީ އެ އަސްލު ކޮންމެހެން ހަމްޕު ގެންނަން ވެގެން ކުރި ކަމެއް ނޫން، ޓީމުގައި ކޯޗިން ސްޓާފުގައި ސީނިއާ ކޯޗުގެ ޑިސައިޑިން ލިސްޓުގައި ތިބޭ ބައެއް. ކޯޗަށް އެނގޭނެ މި ސީޒަނުގައި އެނބުރި އައިސް ކިހާ ވަރަކަށްތޯ ހަމްޕު އަށް މި ޓީމަށް ޖޮއިން ކުރެވެނީ، ހަމްޕު އަކީ މި ވަގުތަށް ވެސް ޓީމު ތެރޭގައި ވަރަށް މުހިންމު ކުޅުންތެރިއެއް. އެހެންވީމަ، މެނޭޖްމަންޓުން ކުޅުންތެރިން ޑިސައިޑްކުރާނީ ކޯޗު ބުނީމަ،"
"އެހެންވީމަ، ހަމްޕު މި ވަގުތު އިތުރު ގޮތަކަށް ޗޮއިސް އެއް ދެވޭކަށެއް ނެތް. މި ގޮތަށް ތޯ، އެހެންތޯ، މި ސީޒަނުގައި ކުރިއަށް ވިކްޓަރީ އަށް ކާމިޔާބު ހޯދަން އޮތީ އެހެންވީމަ އެ ވަރުގެ ކުޅުންތެރިން ޓީމަށް ގެނެސްފައި އެ ތިބީ،"
ހަމްޕު އަށް ވިކްޓަރީގެ ގިނަ މެޗުތަކެއްގެ އިތުރުން، އަންނަ ނޮވެމްބަރު މަހު ކުޅޭ ސާފް ޗެމްޕިއަންޝިޕް ވެސް ގެއްލޭނެ އެވެ.
