އިޓަލީގެ ޕްރޮސެކިއުޓަރުން އިޒްރޭލްގެ ދިފާއީ ވަޒީރު އިސްރާއީލް ކަޓްޒް އާއި އެ ގައުމުގެ އަސްކަރިއްޔާ އަދި ފުލުހުންގެ އިސް 12 އޮފިޝަލަކާ ދެކޮޅަށް ޖިނާއީ ތަހުގީގެއް ފަށައިފި އެވެ.
މި ތަހުގީގަކީ ގައްޒާއަށް އެހީ ހިފައިގެން ދިޔަ ފްލޮޓިލާ ބޯޓުތަކުގައި ތިބި އެކްޓިވިސްޓުންނަށް އަނިޔާކޮށް، ޖިންސީ ގޯނާކުރި ކަމަށް ބުނެ ހުށަހެޅި މައްސަލަތަކަކާ ގުޅިގެން ފެށި ތަހުގީގެކެވެ. މީގެ ކުރިން މި ތަހުގީގު އަމާޒުވެފައި އޮތީ ހަމައެކަނި އިޒްރޭލްގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން-ގަވީރުގެ މައްޗަށެވެ.
ރޯމްގެ ޕްރޮސެކިއުޓަރުންގެ އޮފީހުން ހުކުރު ދުވަހު ހާމަކުރި ގޮތުގައި، މި މައްސަލައިގައި ތަހުގީގު ކުރަނީ 2025 އަދި 2026 ވަނަ އަހަރު ގާޒާއަށް ދަތުރުކުރި އެހީގެ ބޯޓުތައް އިޒްރޭލް ސިފައިން ހުއްޓުވައި، އޭގައި ތިބި މީހުންނަށް އަނިޔާކުރުމާއި، ވަގަށް ނެގުމާއި، ވައްކަން ކުރުމާއި އަދި މުދަލަށް ގެއްލުން ދިނުމުގެ ތުހުމަތުތަކެވެ. މި ތަހުގީގު ފަށާފައިވަނީ މިދިޔަ އަހަރާއި މިއަހަރު ކުރިއަށް ގެންދިޔަ ގްލޯބަލް ސުމޫދު ފްލޮޓިލާގެ ދެ މިޝަނެއްގައި ބައިވެރިވި އިޓަލީގެ 50 ރައްޔިތަކު ހުށަހެޅި ޝަކުވާތަކަކާ ގުޅިގެންނެވެ. ތަހުގީގު ކުރެވޭ މީހުންގެ ތެރޭގައި އިޒްރޭލްގެ އަސްކަރީ ވެރިޔާ އީޔަލް ޒަމީރު ވެސް ހިމެނެއެވެ.
ޕްރޮސެކިއުޓަރުން ބުނި ގޮތުގައި 2025 ވަނަ އަހަރުގެ ފުރަތަމަ މިޝަނުގައި ހައްޔަރުކުރި މީހުން ވަނީ އެމީހުންނަށް ތަޅައި އަނިޔާކޮށް، މަރާލާނެ ކަމުގެ އިންޒާރު ދީ، ޓެރަރިޒަމްގެ ތުހުމަތު އަޅުވައި ބަދުބަސް ބުނެފައިވާ ކަމަށް ރިޕޯޓުކޮށްފަ އެވެ. އަދި 2026 ވަނަ އަހަރުގެ ދެވަނަ މިޝަނުގައި ހައްޔަރުކުރި މީހުންނަށް މިއަށްވުރެ މާ ބޮޑެތި އަނިޔާތަކެއް ދީފައިވާ ކަމަށް ބުނެފައިވެ އެވެ. އޭގެ ތެރޭގައި އަނދިރީގައި ބައިތިއްބައިގެން ތަޅައި އަނިޔާކުރުމާއި، ކަރަންޓު ޝޮކް ދޭ ބަޑި ނުވަތަ ޓޭޒާ ބޭނުންކުރުމާއި، ރަބަރު ވަޒަން ޖެހުން ހިމެނެއެވެ. މީގެ އިތުރުން، މަދުވެގެން 15 މީހަކަށް ޖިންސީ ގޯނާކޮށްފައިވާ ކަމަށާއި، އޭގެ ތެރޭގައި ރޭޕްގެ މައްސަލަތައް ހިމެނޭ ކަމަށް އެކްޓިވިސްޓުން ވަނީ ބުނެފައެވެ.
މި ހާދިސާގައި ހައްޔަރުކުރި އިޓަލީގެ އިގްތިސާދީ މާހިރެއް ކަމަށްވާ ލޫކާ ޕޮގީ މީޑިއާތަކަށް ކިޔައިދިން ގޮތުގައި، އިޒްރޭލްގެ ސިފައިން ވަނީ އެމީހުންގެ އަންނައުނު ބާލުވައި، ބިމަށް ވައްޓާލައި، ކޮޅުފައިން ޖަހައި ބޮޑެތި އަނިޔާތަކެއް ދީފައެވެ.
ގްލޯބަލް ސުމޫދު ފްލޮޓިލާގެ ފުރަތަމަ ދަތުރު 2025 ވަނަ އަހަރުގެ ސެޕްޓެމްބަރު މަހު ބާސެލޯނާއިން ފެށީ 42 ބޯޓާއި 462 އެކްޓިވިސްޓުންނާއެކުގައެވެ. އިޒްރޭލް ސިފައިން މި ބޯޓުތައް ބައިނަލްއަގުވާމީ ކަނޑުގެ ސަރަހައްދުން ހުއްޓުވައި، އެތައް ސަތޭކަ ބަޔަކު ހައްޔަރުކުރި އެވެ. ދެވަނަ މިޝަން 2026 ވަނަ އަހަރުގެ އޭޕްރީލް މަހު ފެށިއިރު، ގްރީސް އާއި ސައިޕްރަސް ކައިރިން އިޒްރޭލް ސިފައިން ވަނީ 50 އަށްވުރެ ގިނަ ބޯޓު ހުއްޓުވައި 430 އެއްހާ މީހުން ހައްޔަރުކޮށްފައެވެ.
