އިޓަލީގެ މަޝްހޫރު ލަވަކިޔުންތެރިޔާ އެންޑްރިއާ ބޮޗެލީ އިޒްރޭލަށް ތާއީދުކުރާ ކަމަށް ބުނެ، އިންޑޮނޭޝިއާގައި ބޭއްވުމަށް ހަމަޖެހިފައިވާ އޭނާގެ ދެ ކޮންސަޓަކާ ދެކޮޅަށް އެ ގައުމުގެ އެންމެ މަތީ އިސްލާމީ ކައުންސިލުން ބުދަ ދުވަހު ސަރުކާރުގެ އިސް އޮފިޝަލުންނާ ބައްދަލުކޮށްފި އެވެ.
މުސްލިމުންގެ އަޣުލަބިއްޔަތު އޮންނަ އިންޑޮނޭޝިއާގެ ގިނަ ބައެއްގެ ވިސްނުމާ ބޮޗެލީގެ އަމަލުތައް ފުށުއަރާ ކަމަށް އެ ކައުންސިލުން ވަނީ ބުނެފަ އެވެ.
އިންޑޮނޭޝިއާގެ ދީނީ އިލްމުވެރިންގެ އެންމެ ނުފޫޒު ގަދަ އަދި އެންމެ މަތީ މަޖިލިސް ކަމަށްވާ އިންޑޮނޭޝިއާ އުލެމާ ކައުންސިލް (އެމްޔޫއައި) އިން ވަނީ އޮކްޓޯބަރު 31 ގައި މެދު ޖާވާގެ މަގެލަންގް ސިޓީގައި ހުންނަ ޔުނެސްކޯގެ ދުނިޔޭގެ ތަރިކައިގެ ލިސްޓުގައި ހިމެނޭ ބޮރޯބުދުރް ފައްޅީގައި ބޭއްވުމަށް ހަމަޖެހިފައިވާ ކޮންސަޓާއި، ނޮވެމްބަރު 3 ގައި ވެރިރަށް ޖަކާޓާގައި ބޭއްވުމަށް ހަމަޖެހިފައިވާ ކޮންސަޓް ކެންސަލް ކުރުމަށް ގޮވާލާފަ އެވެ.
ބޮޗެލީގެ "ރޮމާންޒާ 30 ވަނަ އެނިވަސަރީ ވޯލްޑް ޓުއާ" ގެ ދަށުން ބޮރޯބުދުރް ފަދަ އިންޑޮނޭޝިއާގެ ތާރީޚީ މުހިންމު ބިނާއެއްގައި ބާއްވާ ކޮންސަޓާ ގުޅޭ ގޮތުން އެމްޔޫއައި އިން ފުރަތަމަ ނުރުހުން ފާޅުކުރީ އޮކްޓޯބަރު 10 ގަ އެވެ. އެއަށްފަހު، އެ ކައުންސިލުން ވަނީ ބުދަ ދުވަހު އިންޑޮނޭޝިއާގެ ޓޫރިޒަމް މިނިސްޓްރީއާ ބައްދަލުކޮށް މިކަމާ ގުޅޭ ގޮތުން މަޝްވަރާކޮށްފަ އެވެ.
އެމްޔޫއައި އިން ބުނި ގޮތުގައި އެ ކައުންސިލުން މި ކޮންސަޓްތަކާ ދެކޮޅު ހަދަނީ ބޮޗެލީ މީގެ ކުރިން އިޒްރޭލަށް ތާއީދުކޮށްފައި ވާތީ އެވެ. އެގޮތުން 2010 ވަނަ އަހަރު ލޮސް އެންޖެލިސްގައި އިޒްރޭލް ޑިފެންސް ފޯސް (އައިޑީއެފް) އަށް ފަންޑު ހޯދުމަށް ބޭއްވި ހަރަކާތެއްގައި ބޮޗެލީ ބައިވެރިވުމާއި، 2022 ވަނަ އަހަރު އިޒްރޭލުގެ ތެލް އަވީވްގައި އޭނާ ކޮންސަޓެއް ބާއްވާފައިވާކަން އެ ކައުންސިލުން ފާހަގަކުރި އެވެ.
އެ ކައުންސިލުން ނެރުނު ބަޔާނެއްގައި ބުނެފައިވަނީ، ގާޒާގައި ހިންގަމުންދާ އިންސާނީ ހައްގުތަކާ ޚިލާފު އަމަލުތަކަށް ފަންޑުކޮށް ނުވަތަ އެކަމަށް ތާއީދުކުރާ ފަރާތްތަކަށް ފުރުސަތު ދިނުމަކީ އިންޑޮނޭޝިއާގެ ގައުމީ މިންގަނޑުތަކާއި އެމްޔޫއައިގެ ދީނީ އިރުޝާދުތަކާ ޚިލާފު ކަމެއް ކަމަށެވެ.
ދުނިޔޭގެ އެންމެ އާބާދީ ބޮޑު މުސްލިމް ގައުމު ކަމަށްވާ އިންޑޮނޭޝިއާގެ ރައްޔިތުންގެ މެދުގައި ފަލަސްތީނަށް އޮންނަ ހަމްދަރުދީ ބޮޑުއިރު، އެ ގައުމުގެ ސަރުކާރުން ވެސް ޒަމާނުއްސުރެ ވަކާލާތު ކުރަމުން އަންނަނީ ފަލަސްތީނުގެ މިނިވަން ދައުލަތެއް ގާއިމުކުރުމަށެވެ.
ޓޫރިޒަމް މިނިސްޓްރީގެ ސެކްރެޓަރީ ބަޔޫ އަޖީ ވިދާޅުވީ އެމްޔޫއައި އާއެކު ބޭއްވި މަޝްވަރާތަކުގެ ބޭނުމަކީ ދެފަރާތުން އެއްބަސްވެވޭ ގޮތަކަށް ކަންކަން ނިންމުން ކަމަށެވެ.
"ސަރުކާރުގެ ސިޔާސަތު ވަރަށް ސާފު. އަޅުގަނޑުމެން މިތިބީ ފަލަސްތީނާއެކު. އެމްޔޫއައިގެ ލީޑަރުން ދެއްވާފައިވާ އިރުޝާދުތަކާ ގުޅޭ ގޮތުން އިތުރަށް މަޝްވަރާ ކުރާނަން. ނަމަވެސް އެމްޔޫއައި އިން ވަކި ގޮތެއް ނިންމައިފި ނަމަ، ސަރުކާރުން އަމަލުކުރާނީ އެ ނިންމުމާ އެއްގޮތަށް،" އަޖީ ވިދާޅުވި އެވެ.
މި މައްސަލައާ ގުޅިގެން މަގެލަންގްގެ ފުލުހުން ވަނީ ބޮރޯބުދުރްގައި ބޭއްވުމަށް ހަމަޖެހިފައިވާ ކޮންސަޓަށް ހުއްދަ ދިނުމަށް ކުރިން ދޫކޮށްފައިވާ ރެކޮމެންޑޭޝަން ބުދަ ދުވަހު އަނބުރާ ގެންގޮސްފަ އެވެ. މީގެ އިތުރުން، އިސްލާމީ އެކި ޖަމާއަތްތަކުން މި ކޮންސަޓާ ދެކޮޅަށް އަޑުއުފުލުން އިތުރުވުމާއެކު، ކޮންސަޓް އިންތިޒާމުކުރާ ފަރާތްތަކަށް ވަނީ ބޮޑު ޕްރެޝަރެއް ކުރިމަތިވެފަ އެވެ.
އެމްޔޫއައިގެ މި ނިންމުމާ ގުޅޭގޮތުން ބޮޗެލީގެ ފަރާތުން ނުވަތަ ކޮންސަޓް އިންތިޒާމުކުރާ ފަރާތުން އަދި ރަސްމީކޮށް އެއްވެސް އެއްޗެއް ބުނެފައެއް ނުވެ އެވެ.
އިންޑޮނޭޝިއާގައި ބޭއްވުމަށް ތައްޔާރުވަމުންދާ މި ކޮންސަޓްތަކަކީ ބޮޗެލީ ބައިނަލްއަގުވާމީ ފެންވަރުގައި މަޝްހޫރުކޮށްދިން "ރޮމާންޒާ" އަލްބަމަށް 30 އަހަރު ފުރުން ފާހަގަކުރުމަށް ބާއްވާ ދުނިޔޭގެ ދަތުރުގެ ބައެކެވެ. މި އަލްބަމުގައި އޭނާގެ އެންމެ މަގުބޫލު އެއް ލަވަ ކަމަށްވާ "ކޮން ޓޭ ޕާޓީރޯ" ހިމެނެ އެވެ.
