އިޒްރޭލުގެ އިޝްތިހާރު ކުރާ ކުންފުންޏެއް ކަމަށްވާ ޑިސްކަވަރ-ޓެކް އިން އަލްޖަޒީރާގެ މުވައްޒަފުންގެ ފޯނުތަކާއި އެހެނިހެން ވަސީލަތްތަކަށް ޖާސޫސީ ސޮފްޓްވެއާ ނުވަތަ ސްޕައިވެއާ ފޮނުވުމަށް އެހީތެރިވެދީފައިވާކަން ހާމަވެއްޖެ އެވެ.
މި މައްސަލައާ ގުޅިގެން އަލްޖަޒީރާ މީޑިއާ ނެޓްވޯކުން ވަނީ އެ ކުންފުނީގެ މުވައްޒަފުންނަށް އަމާޒުކޮށް ދީފައިވާ މި ހަމަލާތައް ހަރުކަށި އިބާރާތުން ކުށްވެރިކޮށްފަ އެވެ. އަދި މުވައްޒަފުންނާއި ނެޓްވޯކުގެ ރައްކާތެރިކަން ކަށަވަރުކުރުމަށް ކުރަންޖެހޭ ހުރިހާ މަސައްކަތެއް ކުރާނެ ކަމުގެ ޔަގީންކަން އެ ނެޓްވޯކުން ވަނީ ދީފަ އެވެ.
ކެނެޑާގެ ޔުނިވަސިޓީ އޮފް ޓޮރޮންޓޯގެ ސިޓިޒަން ލެބުން ހިންގި ތަހުގީގަކުން ހާމަވި ގޮތުގައި، މި ހަމަލާ ދިނުމަށް ބޭނުންކޮށްފައިވަނީ އިޒްރޭލުގެ ކެންޑިރޫ ނަމަކަށް ކިޔާ ކުންފުންޏެއްގެ ސްޕައިވެއާ އެވެ. ކެންޑިރޫ އަކީ ނުރައްކާތެރި ސައިބަ ހަރަކާތްތަކާ ގުޅިގެން 2021 ވަނަ އަހަރު އެމެރިކާ ސަރުކާރުން ބްލެކްލިސްޓް ކޮށްފައިވާ ކުންފުންޏެކެވެ. މި ސްޕައިވެއާ ފޯނުތަކަށް ފޮނުވާފައިވަނީ "ޒީރޯ-ކްލިކް" އެޑްވަަޓައިޒިން މެދުވެރިކޮށެވެ. މީގެ މާނައަކީ ފޯނުގެ ސްކްރީނަށް އެ އިޝްތިހާރު އެރުމާއެކު، އެއްވެސް ތަނަކަށް ފިތާނުލި ކަމުގައިވިޔަސް ފޯނު އިންފެކްޓްވެ، އޭގެ ތެރޭގައި ހުންނަ ހުރިހާ މައުލޫމާތެއް ހަމަލާދޭ ފަރާތަށް ލިބެން ފެށުމެވެ.
މި ނުރައްކާތެރި ސޮފްޓްވެއާ ފަރުމާކޮށްފައިވަނީ ފޯނުގައި ހުންނަ ފައިލްތަކާއި، ލިޔެކިޔުންތަކާއި، ބްރައުޒާގެ މައުލޫމާތާއި، ސޭވްކޮށްފައި ހުންނަ ޕާސްވޯޑްތައް ވަގަށް ނެގުމަށެވެ. މީގެ އިތުރުން، ފޯނުން ޓައިޕްކުރާ އަކުރުތައް ދެނެގަތުމާއި، ސްކްރީންޝޮޓް ނެގުމާއި، މައިކްރޯފޯނާއި ކެމެރާ މެދުވެރިކޮށް އަޑާއި މަންޒަރު ރެކޯޑްކުރުމުގެ ގާބިލުކަންވެސް މި ސޮފްޓްވެއާގައި ހުރެއެވެ. އަދި އީމެއިލްތަކާއި މެސެޖުތައް ވެސް މީގެ އެހީގައި ވަގަށް ނެގެއެވެ. ސަލާމަތީ ނިޒާމުތަކަށް ނޭނގި މި މަސައްކަތް ކުރުމަށްޓަކައި، ވަގަށް ނަގާ މައުލޫމާތުތައް ފޮނުވަނީ ކުދި ބައިތަކަކަށް ބަހާލައިގެން، އެންކްރިޕްޓް ކުރެވިފައިވާ މަގުތަކުންނެވެ.
ސިޓިޒަން ލެބުގެ ރިޕޯޓުގައި ބުނެފައިވާ ގޮތުގައި، ޑިސްކަވަރ-ޓެކް އިން ވަނީ މި ސްޕައިވެއާ ހިމެނޭ އިޝްތިހާރުތައް ގަނެފަ އެވެ. އަދި އެ އިޝްތިހާރުތައް މެދުވެރިކޮށް ކެންޑިރޫގެ މެލްވެއާ އަމާޒުކުރެވޭ ފޯނުތަކަށް ފޮނުވާފައިވެ އެވެ. މި ހަމަލާގެ ޝިކާރައަކަށްވި މީހުންގެ ތެރޭގައި އަލްޖަޒީރާގެ ބައެއް ނޫސްވެރިން ހިމެނެއެވެ. އަލްޖަޒީރާގެ އައިޓީ ޓީމަށް މިކަމުގެ ޝައްކުތަކެއް ފުރަތަމަ ކުރެވުނީ 2024 ވަނަ އަހަރުގެ ތެރޭގައެވެ. އަދި 2025 އާ ހަމައަށް މި ހަރަކާތްތައް ކުރިއަށް ގޮސްފައިވާކަން ތަހުގީގުން އެނގެ އެވެ.
ނިއުޔޯކުގެ އެޑްވަަޓައިޒިން ސެކިއުރިޓީ ކުންފުންޏެއް ކަމަށްވާ ކޮންފިއަންޓުން ހާމަކުރި ގޮތުގައި، ޑިސްކަވަރ-ޓެކްގެ މިފަދަ އިޝްތިހާރުތައް އެމެރިކާގެ ޕެންޓަގަން އާއި، އދ. ގެ އިންޓަނޭޝަނަލް އެޓޮމިކް އެނާޖީ އެޖެންސީ އަދި އިންޓަނޭޝަނަލް ކްރިމިނަލް ކޯޓުގެ ނެޓްވޯކްތަކުންވެސް ފެނިފައިވެ އެވެ. މީގެ ކުރިންވެސް ކެންޑިރޫގެ ސްޕައިވެއާ ބޭނުންކޮށްގެން ދުނިޔޭގެ އެކި ގައުމުތަކުގެ 100 އަށްވުރެ ގިނަ ނޫސްވެރިންނާއި، ސަރުކާރާ ދެކޮޅު ފަރާތްތަކަށް ޖާސޫސީ ހަމަލާތައް ދީފައިވާކަން ފާހަގަކުރެވެއެވެ.
އަލްޖަޒީރާއިން ބުނީ ނޫސްވެރިންނަށް އަމާޒުކޮށް މިފަދަ ހަމަލާތައް ދިނުމަކީ ނޫސްވެރިކަމުގެ މިނިވަންކަމަށް އަރައިގަތުން ކަމަށާއި، މިކަމުގައި ޒިންމާވާ ފަރާތްތައް ޖަވާބުދާރީ ކުރުވަން ޖެހޭނެ ކަމަށެވެ. މި ހަމަލާ ދިނުމަށް ބޭނުންކުރި ޓޫލްއަކީ އެތައް މިލިއަން ޑޮލަރެއްގެ އަގުހުރި އެއްޗެއް ކަމަށް ބެލެވެ އެވެ. މިއީ ޒަމާނީ ސަލާމަތީ ފިޔަވަޅުތައް ފޫއަޅުވާލުމަށް ބޭނުންކުރާ ނުރައްކާތެރި އަދި އެހާމެ ކުރިއަރާފައިވާ އުކުޅެކެވެ.
