ޔުނައިޓެޑް އެރަބް އެމިރޭޓްސްގެ ޑުބާއީ އިން ފުރައިގެން އިޒްރޭލުގެ ތެލް އަވީވަށް ދަތުރު ކުރި ފްލައިޑުބާއީގެ މަތިންދާބޯޓު ވައްޓާލަން އުޅުނު މައްސަލައިގެ ތަހުގީގަށް ކަމަށް ބުނެ ހައްޔަރުކުރި ދިވެހި ދެ ޕައިލެޓުން ރާއްޖެއަށް ގެނައުމާއެކު ފުލުހުން އެ މީހުންނާ ސުވާލުކުރަން ފަށައިފި އެވެ.
ފުލުހުން އަދަދު އަށް ބުނީ ޔޫއޭއީން އެ ދެ ޕައިލެޓުން ރާއްޖެ ފޮނުވާލުމުން އެ މީހުން އައި ބޯޓު ވެލާނާ އިންޓަނޭޝަނަލް އެއާޕޯޓަށް ޖެއްސުމާއެކު ފުލުހުން އެއާޕޯޓަށް ގޮސް ސުވާލުކުރަމުންދާ ކަމަށެވެ.
ނަމަވެސް މިހާތަނަށް އެ ޕައިލެޓުންނާމެދު ފިޔަވަޅެއް އެޅުމާމެދު ގޮތެއް ނުނިންމާ ކަމަށްވެސް ފުލުހުން ބުންޏެވެ. އެގޮތުން އެ ދެ ޕައިލެޓުން ހައްޔަރުކުރުމާމެދު ފުލުހުން މިހާތަނަށް ގޮތެއް ނުނިންމަ އެވެ.
ދިވެހި ދެ ޕައިލެޓުން ރާއްޖެ ގެނެސްފައި މިވަނީ ޔޫއޭއީގައި އެ މީހުން ހައްޔަރުކޮށް، އަސާސީ ހައްގުތަކުން މަހުރޫމްކޮށްފައި ތިބޭތާ 12 ދުވަސް ފަހުންނެވެ. ޔޫއޭގައި ބަންދުގައި ތިބިއިރު އެ މީހުންނަށް އާއިލާއާ ވާހަކަ ދެއްކުމުގެ ފުރުސަތާއި ވަކީލަކާ ވާހަކަ ދެއްކުމުގެ ފުރުސަތުންވެސް ވަނީ މަހުރޫމްކޮށްފަ އެވެ.
ދެ ދިވެހިން އަސާސީ ހައްގުތަކުން މަހުރޫމުކޮށް، ޔޫއޭއީގައި ހައްޔަރުކޮށްފައި ތިބޭތާ 12 ދުވަސް
ފްލައިދުބާއީގެ ބޯޓެއް ވައްޓާލަން އުޅުނު މައްސަލައިގެ ތަހުގީގަށް ޔޫއޭއީގައި ހައްޔަރުކުރި ދިވެހި ދެ ޕައިލެޓުންނަށް، ގާނޫނީ އެހީތެރިކަމާއި އާއިލާއާ ގުޅުމުގެ ފުރުސަތު ނުދީ ބަންދުގައި ބައިތިއްބާތާ 12 ދުވަސް ވެއްޖެ.
އެނގިފައިވާ ގޮތުގައި ޔޫއޭއީގައި ހައްޔަރު ކުރި ދެ ދިވެހިންނަކީ ފްލައިޑުބާއީގައި މަސައްކަތް ކުރާ ހަ ދިވެހި ޕައިލެޓުންގެ ތެރެއިން އެންމެފަހުން އެތަނާ ގުޅުނު ދެ މީހުންނެވެ.
އެ ދެ މީހުން ހައްޔަރުކުރިކަން ޔޫއޭއީގައި ހުންނަ ދިވެހި އެމްބަސީން އާއިލާއަށް އެންގީ މި މަހު 8، ގަ އެވެ. އޭގެ ކުރިން އެމީހުންނަށް ވީނުވީ އެއްވެސް މިންވަރަކަށް، ދިވެހި އެމްބަސީއަށް ވެސް ޔޫއޭއީން ހާމަކޮށްފައެއް ނުވެ އެވެ.
އިޒްރޭލުގެ 182 މީހުންނާއެކު ދަތުރުކުރަމުންދިޔަ އެފްޒެޑް 1073 ފްލައިޓު ވައްޓައިލަން މަސައްކަތްކުރީ އެ ބޯޓުގެ ކޯ-ޕައިލެޓެވެ. އެ ޓެރަރިސްޓު ހަމަލާގައި ކޯ-ޕައިލެޓު ވަނީ ކޮކްޕިޓްގައި އޮންނަ ކުއްލި ހާލަތްތަކުގައި ބޭނުންކުރާ ކޯރާޑި ބޭނުންކޮށްގެން ބޯޓުގެ ކެޕްޓަނަށް ހަމަލާދީ ބޯޓު ވައްޓައިލަން މަސައްކަތްކޮށްފަ އެވެ.
އޭނާގެ މި އަމަލުގެ ސަބަބުން ބޯޓު ކޮންޓްރޯލުން ނެއްޓި، ކުޑަ ވަގުތުކޮޅެއްގެ ތެރޭގައި ގާތްގަނޑަކަށް 17,000 ފޫޓު (5,180 މީޓަރު) ތިރިއަށް ވެއްޓުނެވެ. ނަމަވެސް، އެ ބޯޓު ވެއްޓެން ދަނިކޮށް، އިންޑިއާގެ ކެޕްޓަން ކޮކްޕިޓްގެ ދޮރު ހުޅުވުމުން ފަސިންޖަރުންނާއި އެހެން މީހުން ވަދެ ހަމަލާދިން މީހާ ވަނީ ހިފަހައްޓައިފަ އެވެ. އެ ބޯޓުގެ ކޮންޓްރޯލް އަލުން ހޯދައި ރައްކާތެރިކަމާއެކު ޖެއްސީ އެ ބޯޓުގައި ތިބި އިތުރު ދެ ޕައިލެޓުންނެވެ.
