ކ. މާފުށީގައި ފުޅާ ދާއިރާއެއްގައި ބަނގުރަލުގެ ވިޔަފާރިކުރަމުންދިޔަ ކަމުގެ ތުހުމަތުގައި މީހަކު މިދިޔަ ހުކުރު ދުވަހު ހައްޔަރުކޮށްފި އެވެ.
ފުލުހުންގެ ނާކޮޓިކްސް އިންޓެލިޖެންސާއި މާފުށީ ޕޮލިސް ގުޅިގެން ހިންގި އޮޕަރޭޝަންގައި ހައްޔަރުކުރީ ހދ. ކުޅުދުއްފުށި، ސަމޭދާން، ނަބީހު އަބްދުއްރަޝީދު، 23، އެވެ.
ގިނަ އަދަދެއްގެ ފަތުރުވެރިން ޒިޔާރަތްކުރާ މާފުށީގައި ނަބީހު އަބްދުއްރަޝީދު ދިރިއުޅޭ ގެ ކޯޓު އަމުރެއްގެ ދަށުން ބަލައި ފާސްކުރިއިރު 42 ބަނގުރާ ފުޅި ވަނީ ފެނިފަ އެވެ.
އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން އަށް ދުވަހަށް ބަންދުކޮށްފައިވާ ކަމަށް ފުލުހުން ބުންޏެވެ.
މާލޭގައި ފުޅާ ދާއިރާއެއްގައި ބަނގުރާގެ ވިޔަފާރިކުރަމުންދާ ނެޓްވޯކަކަށް އަމާޒުކޮށް މިދިޔަ ހަފްތާގައި ފުލުހުން ހިންގި އޮޕަރޭޝަނެއްގައި 826 ބަނގުރާ ފުޅި ވަނީ އަތުލައިގަނެފަ އެވެ.
އެ މައްސަލައާ ގުޅިގެން ނެޓްވޯކުގެ އިސް މީހާ ކަމަށް ތުަހުމަތުކުރެވޭ މީހާގެ އިތުރުން ތިން ބިދޭސީއަކު ފުލުހުން ވަނީ ހައްޔަރުކޮށްފަ އެވެ.
