ދައުލަތުގެ އިދާރާތަކެއްގައި ހުޅުޖެހުމަށް ހިތްވަރުދީ ފޭސްބުކްގައި ލިޔުނު ކުރީގެ ޑެޕިއުޓީ މިނިސްޓަރު ހަސަން ޒިހާން ހައްޔަރުކޮށްފި އެވެ.
ޒިހާންގެ ފޭސްބުކްގައި އޭނާ ވަނީ ސުޕްރީމް ކޯޓާއި، ރައީސް އޮފީހާއި، ރައްޔިތުންގެ މަޖިލީހުގައި ހުޅުޖެހުމަށް ހިތްވަރުދީ ޕޯސްޓުކޮށްފަ އެވެ. އެއީ މަޖާ ކަމަކަށް ވާނެ ކަމަށް ޒިހާން ލިޔުނުއިރު އެ ޕޯސްޓު އޭނާ ވަނީ ފަހުން ޑިލީޓުކޮށްފަ އެވެ.
އެ މައްސަލަ ފުލުހުން ބަލަން ފެށިއިރު މިއަދު އޭނާ ހައްޔަރުކޮށްފައިވާކަން ފުލުހުން ވަނީ ކަށަވަރުކޮށްދީފަ އެވެ. ޒިހާން ހައްޔަރުކުރީ އުފަން ރަށް ފުވައްމުލައް ސިޓީންނެވެ. ހުޅުޖެހުން ފަދަ ޓެރަރިޒަމްގެ އަމަލެއް ހިންގުމަށް ހިތްވަރު ދިނުމަކީ ޓެރަރިޒަމް މަނާކުރުމުގެ ގާނޫނުގެ ދަށުން ޖިނާއީ ބޮޑު ކުށެކެވެ.
އޭނާ ވަނީ މީގެކުރިން އެމްއެންޑީއެފްގައި ވެސް މަސައްކަތްކޮށްފަ އެވެ. އެމްއެންޑީއެފްގެ ނޭވަލަ އާކިޓެކްޓެއްގެ މަގާމުގައި ޒިހާން ހުއްޓައި އޭނާ މަގާމުން ވަކިކުރީ އެމްޑީޕީ ސަރުކާރުގައި 2023 ވަނަ އަހަރުގެ މެދުތެރޭގަ އެވެ. އޭނާއަކީ އެމްޑީޕީއަށް ވަރަށް ބޮޑަށް ފާޑުކިޔަމުންދިޔަ މީހެކެވެ.
މި ސަރުކާރުގައި އޭނާ ހުރީ ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރަކަށެވެ. އެ މަގާމުގެ މަސްއޫލިއްޔަތުތަކުން އެކަހެރިކޮށްފައި ހުރުމަށްފަހު 2024 ވަނަ އަހަރު އޭނާ މަގާމުން ވަކިކުރި އެވެ. މަގާމުން ވަކިކުރުމާއެކު މި ސަރުކާރާ ދެކޮޅަށް ވެސް ވަރަށް ގިނައިން ޒިހާން ޕޯސްޓުކުރެ އެވެ.
