އެމެރިކާ އާއި އިންޑިއާއާ ދެމެދު ހަކަތައިގެ ދާއިރާއިން އޮތް ގުޅުން ބަދަހިކޮށް، ވިޔަފާރީގެ އެއްބަސްވުމެއްގައި ސޮއިކުރުމުގެ މަސައްކަތް އަވަސްކުރުމަށްޓަކައި، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އިންޑިއާގެ ފޮރިން މިނިސްޓަރާ އެކު މުމްބާއީގައި މަޝްވަރާ ކުރައްވައިފި އެވެ.
އެމެރިކާއިން އިންޑިއާގެ މުދަލުން ނަގާ ޓެރިފް ނުވަތަ ޑިއުޓީއާ ގުޅޭ ގޮތުން އުފެދުނު ހިޔާލުތަފާތުވުންތަކާއި، ރަޝިއާގެ ތެޔޮ އިންޑިއާއިން ގަންނަ މައްސަލައިގައި ދެ ގައުމުގެ ގުޅުމަށް އައި ހީނަރުކަމާ ހެދި މަޑުޖެހިފައި އޮތް ވިޔަފާރީގެ މަޝްވަރާތައް އަލުން ފެށުމަށް ދެ ގައުމުން ވެސް ދަނީ މަސައްކަތް ކުރަމުންނެވެ.
"އަޅުގަނޑުމެން މިތިބީ އެއްބަސްވުމަކާ ވަރަށް ގާތުގައި،" މުމްބާއީގައި ނޫސްވެރިންނާ ވާހަކަދައްކަވަމުން ރޫބިއޯ ވިދާޅުވި އެވެ. "އަޅުގަނޑު ގަބޫލުކުރާ ގޮތުގައި ދެން ނިންމަން ބާކީ ހުރީ ވަރަށް މަދު ކަންތައްތަކެއް. އެހެންކަމުން ވަރަށް އަވަހަށް އެއްބަސްވުމަކަށް އާދެވޭނެ."
އިންޑިއާގެ ފޮރިން މިނިސްޓަރު ސުބްރަމާނިއަމް ޖައިޝަންކަރު ވިދާޅުވީ، ވިޔަފާރި، ހަކަތަ، ޓެކްނޮލޮޖީ އަދި ދިފާއީ ދާއިރާއިން ދެ ގައުމުގެ ގުޅުން ވަރުގަދަކުރުމާ ބެހޭ ގޮތުންނާއި ސަރަހައްދީ ކުރިއެރުންތަކާ ގުޅޭ ގޮތުން ދެ ބޭފުޅުން މަޝްވަރާ ކުރެއްވި ކަމަށެވެ.
ޖައިޝަންކަރާއި ރޫބިއޯ ވަނީ އިންޑިއާއަށް ޒިޔާރަތް ކުރައްވަމުން ގެންދަވާ ޔުނައިޓެޑް އަރަބް އެމިރޭޓްސް (ޔޫއޭއީ) ގެ ފޮރިން މިނިސްޓަރު ޝައިޚް އަބްދުﷲ ބިން ޒައިދު އާލް ނަހްޔާނާ އެކު ތިން ގައުމުގެ ބައްދަލުވުމެއް ވެސް ބާއްވަވާފަ އެވެ. ރޫބިއޯ ވިދާޅުވީ ތިން ގައުމުގެ އިސްވެރިން ބައްދަލުކުރެއްވީ "ސަރަހައްދީ ހަކަތައިގެ ރައްކާތެރިކަމާއި، ގުޅިފައިވާ އިގްތިސާދީ މަސްލަހަތުތައް ކުރިއެރުވުމާ" ބެހޭ ގޮތުން މަޝްވަރާ ކުރެއްވުމަށް ކަމަށެވެ.
ވިޔަފާރީގެ މަޝްވަރާތައް ކާމިޔާބު ނުވުމާ ގުޅިގެން، 2025 ވަނަ އަހަރުގެ އޮގަސްޓް މަހު ވޮޝިންޓަނުން ވަނީ އިންޑިއާގެ ގިނަ މުދަލަކުން 50 އިންސައްތައާ ހަމައަށް ޓެރިފް ބޮޑުކޮށްފަ އެވެ. ފެބްރުއަރީ މަހު އެއްބަސްވި އުސޫލެއްގެ ދަށުން އެ ރޭޓް 18 އިންސައްތައަށް ދަށްކުރި ނަމަވެސް، އޭގެ ފަހުން މަޝްވަރާތައް ވަނީ ހުއްޓިފަ އެވެ.
މި މަހުގެ ކުރީކޮޅު ފިނޭންސް މިނިސްޓަރު ނިރްމަލާ ސީތާރާމަން ވިދާޅުވީ މަޝްވަރާތައް ވަނީ "އެއްވަރެއްގައި ހިފެހެއްޓިފައި" ކަމަށެވެ. ނަމަވެސް ކޮމާސް އެންޑް އިންޑަސްޓްރީ މިނިސްޓަރު ޕިޔޫޝް ގޯޔަލް މިދިޔަ ހަފުތާގައި ވިދާޅުވީ ވިޔަފާރީގެ އެއްބަސްވުމުގެ ފުރަތަމަ މަރުހަލާ މިހާރު އޮތީ ނިމުމުގެ މަގުމަތީގައި ކަމަށެވެ.
އިންޑިއާއިން ބުނަމުންދަނީ އެ ގައުމުގެ މުދަލުން ނަގާ އެންމެ ފަހުގެ ޓެރިފް ރޭޓް ހުންނަންވާނީ ވިއެޓްނާމް ފަދަ އުފެއްދުންތެރިކަމުގެ ދާއިރާގައި ވާދަވެރި އެހެން ގައުމުތަކާ އެއްވަރެއްގައި ކަމަށެވެ.
ރޫބިއޯ އިންޑިއާއަށް ކުރައްވާ މި ދަތުރުފުޅަކީ މެދުތެރޭ އޭޝިއާގެ ގައުމުތަކާ އެކު ވިޔަފާރީގެ ގުޅުން ބަދަހިކުރުމަށް މި ހަފުތާގައި އުޒްބެކިސްތާނަށް ކުރެއްވި ދަތުރުފުޅަށް ފަހު ކުރައްވާ ދަތުރުފުޅެކެވެ.
ރޫބިއޯ އެންމެ ފަހުން އިންޑިއާއަށް ޒިޔާރަތް ކުރެއްވީ މިދިޔަ މެއި މަހު އެވެ.
