ފުލުހުން ވިލިމާލޭގައި އޮކްޓޯބަރު 8، ގައި ހިންގި އޮޕަރޭޝަނެއްގައި މަސްތުވާތަކެއްޗާއެކު ހައްޔަރުކުރި ތިން ފިލްމީ ތަރިންގެ އިތުރުން މައްސަލައިގައި ދެން ހައްޔަރުކުރި މީހާވެސް ދޫކޮށްލައިފި އެވެ.
ފުލުހުން ބުނީ މައްސަލައިގައި ހައްޔަރުކުރި ފިލްމީ ތަރިން ކަމަށްވާ އަހުމަދު އަޒްމީލް (އަޒޭ)، 44، އާއި އިސްމާއިލް ޖުމައިހު، 35، އާއި މުހައްމަދު ވިޝާލް (ރޯމަން)، 29، އަދި ދެން ހައްޔަރުކުރި ޝާހިލް މުހައްމަދު، 42، ދޫކޮށްލީ ތަހުގީގު މަރުހަލާ ނިމުމުން ކަމަށެވެ.
މައްސަލައިގައި ހައްޔަރުކުރި ހަތަރު މީހުންވެސް މަސްތުވާތަކެއްޗަށް ޕޮޒިޓިވްވި އެވެ. ޕޮޒިޓިވްވީ މެތާ ގުޅުންހުރި ސިންތެޓިކް އެހެން ދެ ބާވަތެއްގެ ޑްރަގަކަށެވެ.
އަޒޭ އާއި ޖުމާހަކީ މީގެ ކުރިން އެއް އާއިލާއެއްގެ ދެބެންނާ ކައިވެނިކޮށްގެން އުޅުނު ދެމީހުންނެވެ. އޭގެ ތެރެއިން ފިލްމީ ދާއިރާގައި އުޅޭތާ އެންމެ ގިނަދުވަސްވީ އަޒޭ އެވެ. އެންމެ ފަހުން ފިލްމު ކުޅެން ފެށީ ރޯމަން އެވެ.
މީގެއިތުރުން މައްސަލައިގައި ހައްޔަރުކުރި ޝާހިލްއަކީ ދެ ކިލޯގެ ޑްރަގުގެ މައްސަލައެއްގައި ޝަރީއަތް ނިމެންދެން ބަންދުގައި ހުއްޓާ ޕްރޮސެކިއުޓާ ޖެނެރަލް (ޕީޖީ) އިން އެދިގެން ދޫކޮށްލި މީހެކެވެ.
ޕީޖީ އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު އަދަދު އަށް ވިދާޅުވީ ދެ ކިލޯގެ ޑްރަގް މައްސަލައިގައި ހައްޔަރުކުރި ތިން މީހުންގެ ތެރެއިން ދެ މީހުންގެ މައްސަލަ ނިމިފައިވާއިރު، ޝާހިލްގެ މައްސަލަ އޮތީ ހުލާސާ ބަޔާނުގެ ހިސާބުގައި ކަމަށެވެ. އެގޮތުން އޭނާ ބަންދުން ދޫކޮށްލަން އެދުނީ ބަންދުގައި ގިނަދުވަސްވެފައިވާތީ އާއި ބަލި ހާލަތަށް ރިއާއަތްކޮށް ޝަރުތުތަކާއެކު ކަމަށެވެ.
