ހަމަނުޖެހުން ހިންގަން ހިތްވަރުދިން ކަމުގެ ތުހުމަތުގައި ހއ. ބާރަށް، ކުއްޅަވައްގެ، އަލީ ޖުމާން، 25، މިއަދު ހައްޔަރުކޮށްފި އެވެ.
ފުލުހުން ބުނީ ޖުމާން ހައްޔަރުކުރީ ވެހިރާއްޖޭގެ ބައެއް އިމާރާތްތަކާއި އުޅަނދުފަހަރުގައި ހުޅުޖަހައި، ފިހާރައެއް ލޫޓުވުމަށް ސޯޝަލް މީޑިއާ މެދުވެރިކޮށް ހިތްވަރުދީ ގޮވާލި މައްސަލައިގައި ކޯޓު އަމުރެއްގެ ދަށުން ކަމަށެވެ.
ޖުމާން ސޯޝަލް މީޑިއާގައި ޕޯސްޓުކުރީ ރަސްމާލެއިން އެއްބައި އިޒްރޭލަށް ވާގިވެރިވާ އީގަލް ހިލްސްއަށް ދިނުމާ ދެކޮޅު ހެދުމުގެ ގޮތުން މަގުތަކަށް ނުކުމެ މުޒާހަރާކޮށް، އިމާރާތްތަކުގައި ހުޅުޖަހައި، މަޝްހޫރު ފިހާރައެއްގައި ރޯކުރުމަށް ހިތްވަރުދީ އެވެ.
ދައުލަތުގެ އިދާރާތަކެއްގައި ހުޅުޖެހުމަށް ހިތްވަރުދީ ފޭސްބުކްގައި ލިޔުނު ކުރީގެ ޑެޕިއުޓީ މިނިސްޓަރު ހަސަން ޒިހާންވެސް ވަނީ މިދިޔަ އަންގާރަ ދުވަހު ހައްޔަރުކޮށްފަ އެވެ.
ޒިހާންގެ ފޭސްބުކްގައި އޭނާ ވަނީ ސުޕްރީމް ކޯޓާއި، ރައީސް އޮފީހާއި، ރައްޔިތުންގެ މަޖިލީހުގައި ހުޅުޖެހުމަށް ހިތްވަރުދީ ޕޯސްޓުކޮށްފަ އެވެ. އެއީ މަޖާ ކަމަކަށް ވާނެ ކަމަށް ޒިހާން ލިޔުނެވެ.
