ރާއްޖޭގެ ރައްޔިތުންނަށް ބޯހިޔާވަހިކަން ކަށަވަރުކޮށްދޭން ކަމަށް ބުނެ ހިއްކަމުންދާ ރަސްމާލެއިން 500 ހެކްޓަރު އިޒްރޭލަށް ވާގިވެރިވާ ޔޫއޭއީގެ އީގަލް ހިލްސްއަށް އެއްވެސް އަގަކާ ނުލައި ދިނުމަށް ސަރުކާރުން ނިންމާފައިވާ ނިންމުމާ މިއަދުގެ ހުކުރު ހުތުބާ އިއްވެވި ބޭފުޅުން ދެކޮޅު ހަދަން ޖެހޭ ކަމަށް ކުރީގެ ހޯމް މިނިސްޓަރު ޝެއިހް އިމްރާން އަބްދުﷲ މިއަދު ވިދާޅުވެއްޖެ އެވެ.
އިމްރާން އެކްސް ގައި ވިދާޅުވީ ހުކުރު ހުތުބާ ވިދާޅުވާ ހުރިހާ ބޭފުޅުން އަދާކުރައްވަނީ ބޮޑު ދީނީ ވާޖިބެއްކަމުން ސައްތައިން ސައްތަ މި އިސްލާމީ ފަސްގަޑުން ބޮޑު ބައެއް ޔަހޫދީ ޒައިނިސްޓުންނަށް ވިއްކާލުމަށް ރޭވޭ ރޭވުން ހުއްޓުވުމަށް ކެރިގެން ޙައްޤު ބަސްބުނުމަކީ އެބޭފުޅުންގެ ދީނީ ގައުމީ ވާޖިބެއް ކަމަށެވެ.
"ތިޔަ ބޭފުޅުން ތިޔަ އަދާކުރެއްވީ ވަރަށްބޮޑު ދީނީ ވާޖިބެއް. ތިޔަ އުފުއްލެވީ ވަރަށް ބޮޑު އަމާނާތެއް. ތިޔަބޭފުޅުންގެ ކޮނޑުފުޅުގައި އެޅިފައިވަނީ ވަރަށްބިޔަ ޒިިިިިިންމާއެއް. އެޒިިންމާ ޙައްގު ގޮތުގައި އަދާ ކުރެއްވުމަކީ ތިޔަބޭފުޅުން ދީނީ ވާޖިބެއް،" އިމްރާން ވިދާޅުވި އެވެ.
"ސައްތައިން ސައްތަ މި އިސްލާމީ ފަސްގަޑުން ބޮޑު ބައެއް ޔަހޫދީ ޒައިނިސްޓުންނަށް ވިއްކާލުމަށް ރޭވޭ ރޭވުން ހުއްޓުވުމށް ކެރިގެން ހައްގު ބަސްބުނުމަކީ ތިޔަ އިމާމުންގެ ދީނީ ގައުމީ ވާޖިބެއް."
ހުތުބާ އިއްވެވި ބޭފުޅުން ހައްގުބަސް ބުނަން ބިރުގެން ފަސްޖެހިފައި ތިއްބާ މި ގައުމުގާ ގިނަ އަދަދެއްގެ ޔަހޫދީންނާއި ޒަޔަނިސްޓުން ވަޒަންވެރިވެ، ރާއްޖެއިން ސައްތައިން ސައްތަ އިސްލާމްކަން ކެނޑި އިތުރު ދީންތައް ފެތުރި އެބައިމީހުންގެ މައްޗަށް ބާރުވެރިކަން ލިބި މުސްލިމުންނަށް އަނިޔާ ލިބި ނިކަމެތިވެ އަޅުވެތިވާ ހިސާބަށް ކަން ކަން ހިނގައްޖެ ނަމަ ހުތުބާގައި ވިދާޅުވި ފަދައިން الله ގެ ހަޟުރަތުގައި ދޭނީ ކޮން ޖަވާބެއްތޯ އިމްރާން ސުވާލު އުފެއްދެވި އެވެ.
އަދާލަތު ޕާޓީގެ ރައީސްކަން ވެސް ކުރިން ކުރެއްވި އިމްރާން މަޝްރޫއާ ގުޅިގެން ކުރިން ވިދާޅުވީ ދިވެހީންގެ މިނިވަންކަމާއި އިސްތިގުލާލަށް ގޮންޖެހުން ކުރިމަތިވި ކޮންމެ ފަހަރަކު ވެސް ދިވެހީން އެކަންކަމާ ދެކޮޅަށް ތެދުވި ކަމަށާއި ސިޔާސީ ފިކުރު އެއްކިބާކޮށް، ދިވެހި ގައުމުގެ ދިފާއުގައި ދިވެހީން ތެދުވާންވީ ވަގުތު ޖެހިފައިވާ ކަމަށެވެ.
މާލެ ސަރަހައްދުގެ ބޯހިޔާވަހިކަމަށް ހައްލެއް ހޯދައިދިނުމުގެ ނަމުގައި ހިއްކަން ފެށު ރަސްމާލެއިން 500 ހެކްޓަރުގެ ބިން ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދޭން ސަރުކާރުން ނިންމާފައި ވަނީ ކުއްޔެއް ވެސް ނުނަގާ ގޮތަށެވެ.
ޔޫއޭއީގެ އީގަލް ހިލްސް ކުންފުންޏަށް ރަސްމާލެ ދޫކޮށްލީ 99 އަހަރަށް ކަމަށް ސަރުކާރުން ބުނި ނަމަވެސް އެގްރިމެންޓު ފަރުމާކޮށްފައި ވަނީ ދުވަހަކު ވެސް ދިވެހިންނަށް އަނބުރާ އެތަން ނުލިބޭ ގޮތަށެވެ. ރަސްމާލެއިން ވިއްކާ އެޕާޓްމަންޓެއް ނުވަތަ ބިމުގެ ފުރަތަމަ 99 އަހަރު ހަމަނުވަނީސް ވިއްކާލައިފި ނަމަ ނުވަތަ ވާރުތައިން ދީފި ނަމަ, އަލަށް ގަންނަ މީހާއަށް ވެސް އަލުން އިތުރު 99 އަހަރަށް އެތަން ލިބޭނެ އެވެ. އެގޮތަށް ކިތަންމެ ފަހަރަކު ވެސް އެތަން ވިއްކާލެވިދާނެ އެވެ.
