ރާއްޖޭގައި ބޯހިޔާވަހިކަމުގެ ދަތިކަން އިންތިހާއަށް ކުރިމަތިވެފައިވަނިކޮށް، ކޯޕަރޭޓް އުސޫލުން މީހުން ވަޒަންވެރި ކުރަން ހަދާ ވިޔަފާރި އެއްބަސްވުންތަކުގެ ސަބަބުން މި ގައުމު މުސްތަގުބަލުގެ ބޮޑު ނުރައްކަލަކަށް ހުށަހެޅެމުން ދާ ކަމަށް އިސްމާއީލް ޒަރިޔަންދު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ޒަރިޔަންދު ވިދާޅުވީ, ކުރު މުއްދަތުގެ މާލީ މަންފާތަކެއް ދައްކައިގެން، އެކަށީގެންވާ ދުރު ވިސްނުމަކާއި ފުން ތަހުލީލެއް ނެތި މިފަދަ ނިންމުންތައް ނިންމުމާއި އެކަމަށް ތާއީދުކުރުމުގެ ފަހަތުގައިވަނީ ބައެއް ދިވެހިންނަށް ލިބޭ އަމިއްލަ މަންފާ އާއި މާލީ ފައިދާ ނުވަތަ ބޭރު ދުނިޔޭގައި ޒާތީ މަގްބޫލުކަމެއް ހޯދުމުގެ ނިޔަތް ކަމަށެވެ.
"ދީނާއި ސަގާފަތް މަސްހުނި ކުރުމަށް ރޭވިގެން މިސްރާބު ޖަހާފައިވާ އަނެއް ދިވެހިރާއްޖެ އަކީ، އަޅުގަނޑުމެންގެ ކާބަފައިން ހިމާޔަތްކުރި ރާއްޖެއެއް ނޫން. އަދި އަޅުގަނޑުމެންގެ އަންނަން އޮތް ޖީލުތަކަށް ހައްގުވާ ރާއްޖެއެއް ވެސް ނޫން،" ޒަރިޔަންދު ވިދާޅުވި އެވެ.
ޒަރިޔަންދު ވިދާޅުވީ ގައުމެއްގެ އަމިއްލަވަންތަކަން އެއްފަހަރު ގެއްލި ހިނގައްޖެނަމަ، އަލުން އެނބުރި ހޯދުމަކީ ނާދިރު ކަމެކެވެ. އަދި އެކަމަށް ތާއީދު ކުރާ ދިވެހިން ވެސް ހަގީގީ ހެކިތަކާއި ހާލަތުގެ އަލީގައި ވިސްނުން މުރާޖަކޮށްލަން ޖެހޭ ކަމަށް ވެސް އޭނާ ވިދާޅުވި އެވެ.
މީގެ އިތުރުން އަމިއްލަ އެދުމާއި މާލީ މަންފާއަކީ ފިލައިދާނެ އެއްޗެއް ނަމަވެސް ގައުމު ދެމިއޮންނާނެ ކަމަށާއި، މިއަދު ރާއްޖެއަށް އެދިގޮވަނީ އެންމެންގެ އެއްބައިވަންތަކަމަށް ކަމަށް ޒަރިޔަންދު ވިދާޅުވި އެވެ.
މިފަދަ މަޝްރޫއުތަކާ ދެކޮޅަށް ރައްޔިތުން އަޑުއުފުލަންޖެހޭކަން ހާމަކުރަމުން، ކެތްތެރިކަމާއި އިސްލާމްދީނުގެ ހައްގު މަގުގައި ސާބިތުވެ ތިބުމުން ނަސްރާއި ކާމިޔާބީ ލިބޭނީ ހައްގަށް ކަމަށް އެ ޕޯސްޓުގައި އޭނާ ފާހަގަކުރި އެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރުން ހުއްޓާލިކަން ސަރުކާރުން ހާމައެއް ނުކުރެ އެވެ. ދާއިމީ އެއްބަސްވުމުގައި މި ނޮވެމްބަރު މަހު ސޮއިކުރާނެ ކަމުގެ އަޑުތައް ވަނީ ފެތުރިފަ އެވެ.
