ދައުލަތުގެ ބަޖެޓުގައި ހިމަނާފައިވާ ޕަބްލިކް ސެކްޓާ އިންވެސްޓްމަންޓް ޕްރޮގްރާމް ނުވަތަ ޕީއެސްއައިޕީ މަޝްރޫއުތަކުގެ ތަފްސީލުތައް ހާމަކުރުމަށް ގޮވާލައި، މާވަށު ދާއިރާގެ މެންބަރު އަހުމަދު ޝާކިރު ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ސިޓީއެއް ފޮނުއްވައިފި އެވެ.
މި ސިޓީގައި މެންބަރު ޝާކިރު ވަނީ 2027 ވަނަ އަހަރަށް ލަފާކުރާ ދައުލަތުގެ ބަޖެޓާ ގުޅޭގޮތުން ހުރި ބޮޑެތި ކަންބޮޑުވުންތަކެއް ހިއްސާކުރައްވާފަ އެވެ.
މެންބަރު ޝާކިރު ފާހަގަކުރެއްވި ގޮތުގައި 2024 ވަނަ އަހަރުން ފެށިގެން ބަޖެޓް ފޮތުގައި ރަށްރަށުގެ މަޝްރޫއުތަކުގެ ތަފްސީލު ހިމަނާފައި ނުވާތީ، ދާއިރާތަކަށް ކަނޑައެޅިފައިވާ ބަޖެޓާއި ހިނގާ ހަރަދުތައް ދެނެގަތުމަށް މެންބަރުންނަށް ބޮޑެތި ދަތިތަކެއް ވަނީ ކުރިމަތިވެފަ އެވެ. ބަޖެޓުގެ ދެފުށް ފެންނަ މިންވަރު ކުޑަވުމުގެ ސަބަބުން ރަށްރަށުގެ ތަރައްގީއަށް ކުރެވޭ މަސައްކަތްތައް މޮނިޓާ ކުރުމަށް ހުރަސްތަކެއް އެބަހުރި ކަމަށް އޭނާ ވިދާޅުވި އެވެ.
ޕީއެސްއައިޕީ ބަޖެޓުގެ ހިސާބުތަކަށް ބަލާއިރު، 2027 ވަނަ އަހަރަށް ހުށަހަޅާފައިވަނީ 8.2 ބިލިއަން ރުފިޔާގެ ބަޖެޓެކެވެ. މީގެ ކުރީ އަހަރުތަކުގެ ތަފްޞީލަށް ބަލާއިރު، 2025 ވަނަ އަހަރު 12.4 ބިލިއަން ރުފިޔާ ފާސްކުރި ނަމަވެސް ހަރަދުވެފައިވަނީ 8.6 ބިލިއަން ރުފިޔާ އެވެ. އަދި 2026 ވަނަ އަހަރު 8.3 ބިލިއަން ރުފިޔާ ފާސްކުރިއިރު، އޭގެ ތެރެއިން ހަރަދުވާނެ ކަމަށް މިހާރު އަންދާޒާ ކުރެވެނީ 6.5 ބިލިއަން ރުފިޔާ އެވެ. މި ހިސާބުތަކުން ފެންނަ ގޮތުގައި މަޝްރޫއުތަކަށް ކަނޑައަޅާ ބަޖެޓާއި ހިނގާ ހަރަދާ ދެމެދު ބޮޑު ފަރަގެއް އެބަހުއްޓެވެ.
މާވަށު ދާއިރާގައި ހިމެނޭ ލ. ކުނަހަންދޫ އާއި ހިތަދޫގެ މަޝްރޫއުތަކާ ގުޅޭގޮތުން މެންބަރު ޝާކިރު ވަނީ ހާއްސަ ކަންބޮޑުވުންތަކެއް ފާޅުކުރައްވާފަ އެވެ. އެގޮތުން ކުނަހަންދޫގެ ފެނާއި ނަރުދަމާގެ އަމަލީ މަސައްކަތް މިހާތަނަށް ފެށިފައި ނުވާކަން އޭނާ ފާހަގަކުރެއްވި އެވެ.
ގާނޫނުގައިވާ ގޮތުން 2027 ވަނަ އަހަރުގެ ނިޔަލަށް ރާއްޖޭގެ ހުރިހާ ރަށެއްގައި މި ހިދުމަތް ނިންމަން ޖެހޭއިރު، މަސައްކަތް ލަސްވަމުންދާތީ އެކަމުގެ ޝަކުވާ ވަނީ ހުށަހަޅުއްވާފަ އެވެ. ހަމައެއާއެކު، ހިތަދޫގެ ފެނާއި ނަރުދަމާގެ މަސައްކަތުގެ ދެބައިކުޅަ އެއްބައި ނިމިފައި އޮތް ނަމަވެސް، ފާއިތުވި އަހަރުތަކުގައި އެ މަސައްކަތް އެއްކޮށް ހުއްޓިފައިވާކަން ސިޓީގައި ބަޔާންކޮށްފައިވެ އެވެ.
މަޖިލީހުގެ ރައީސަށް ފޮނުއްވި ސިޓީގައި މެންބަރު ޝާކިރު ވަނީ މުހިންމު މައުލޫމާތުތަކެއް ހޯދުމަށް އެދިވަޑައިގެންފަ އެވެ. މީގެ ތެރޭގައި 2024 އިން 2027 އަށް ޕީއެސްއައިޕީ މަޝްރޫއުތައް ރަށްރަށަށް ބަހާލެވިފައިވާ ގޮތުގެ ފުރިހަމަ ތަފްސީލާއި، ކުނަހަންދޫ އަދި ހިތަދޫގެ މަޝްރޫއުތަކަށް ބަޖެޓުގައި ފައިސާ ހިމަނާފައިވާ މިންވަރާއި އެ މަސައްކަތްތައް ކުރިއަށްދާ ގޮތުގެ މައުލޫމާތު ހިމެނެ އެވެ. މި މައުލޫމާތުތަކަކީ ދާއިރާގެ ރައްޔިތުންގެ ހައްގުގައި ކޮންމެހެން އެނގެންޖެހޭ ކަންކަން ކަމަށް މެންބަރު ވިދާޅުވި އެވެ.
