އިއްޔެގެ މެންދުރުފަހުން ފެށިގެން ރޭގެ 9:30 އާ ހަމައަށް ވަރަށް ބޯކޮށް ވާރޭވެހި، ގއ. ކޮލަމާފުށީގެ 85 ޕަސެންޓު ގެތަކަށް ފެން ވަދެ، އޭގެ ތެރެއިން 25 ގެއެއްގެ މީހުން ވަންނާނެ ތަނެއް ނެތި ހާލުގައި ޖެހިއްޖެ އެވެ.
ކޮލަމާފުށިން އަދަދު އާ ވާހަކަ ދައްކަވަމުން އެ ރަށު ކައުންސިލުގެ ނައިބު ރައީސް ޝަހާމަތު ހަނީފް ވިދާޅުވީ، އިއްޔެ ވެހުނު ވާރޭގައި ދިރިނުއުޅުވޭ ވަރަށް ހަލާކުވި ގެތަކުގެ މީހުން ބަދަލު ކުރާނެ އެހެން ގެއެއް ނެތް ކަމަށެވެ.
"އެމީހުން ބަދަލު ކުރާނެ ތަނެއް ވެސް ނެތް، ހާލުގައި ޖެހިފައި ހަގީގަތުގައި،" ޝަހާމަތު ވިދާޅުވި އެވެ.
އިއްޔެ ވެހުނު ވާރޭގައި ރަށުގައި ފެން ބޮޑުވުމުގެ ސަބަބުން މުޅި ރަށް އޮތީ ފެނު އަޑީގަ އެވެ. ޝަހާމަތު ވިދާޅުވީ ގާތްގަނޑަކަށް 85 ގެތަކަށް (60 ގެއަށް) ފެން ވަން ކަމަށެވެ. އަދި ބައެއް ގެތަކުގައި ދެ ފޫޓާ ހަމައަށް ފެން ހުރި ކަމަށް ވެސް އޭނާ ބުންޏެވެ.
"ގާތްގަނޑަކަށް 85 ޕަސެންޓު ގެތަކަށް ހަމަ އެއްކޮށް ފެން ވަދެފައި ހުރީ. މުދަލާއި ތަކެއްޗެއް ވަރަށް ބޮޑު ގެއްލުމެއްވި،" އޭނާ ބުންޏެވެ.
އިއްޔެއިން ފެށިގެން މެދުކެނޑުމެއް ނެތި ސިފައިންނާއި ރަށު ކައުންސިލުން ގުޅިގެން ކުރި މަސައްކަތުން ރަށް މިހާރު އާންމު ހާލަތަކަށް ގެނެވިފައިވާ ކަމަށް ކައުންސިލުގެ ނައިބު ރައީސް ވިދާޅުވި އެވެ.
"އަޅުގަނޑުމެން ވެސް ކޯރުކަނޑައި ހެދިން، އަޅުގަނޑުމެންނަށް ކުރެވޭ ކަންކަން. ދެން ސިފައިން ޕަންޕު ޖަހައިގެން ފެން ހިންދީ،" ޝަހާމަތު ވިދާޅުވި އެވެ.
ނެޝަނަލް ޑިޒާސްޓާ މެނޭޖްމަންޓުން މިއަދު މެންދުރު ސޯޝަލް މީޑިއާގައި ކުރި ޕޯސްޓެއްގައި ބުނެފައި ވަނީ، ފެނުގެ އަސަރު ކުރުމުގެ ސަބަބުން ބައެއް ގެތަކުން ކަރަންޓު ވެސް ކެނޑިފައިވާ ކަމަށެވެ. އަދި ގެއެއްގެ ފާހާނާ ފުރިގެން ނަގިސް ބޭރުވުމުގެ މައްސަލައެއް ވެސް ޖެހުނު ކަމަށް އެ އިދާރާއިން ބުންޏެވެ.
"މަގުތަކުން މިހާރު ފެންހިއްކާފައިވީ ނަމަވެސް ގިނަ ގެތަކުން އަދިވެސް ފެން ނުހިއްކޭ. ހާލަތު އެންމެ ގޯސް އެއްގޭގެ ފާހާނާ ފުރިގެން ނަޖިސް ބޭރުވެފައިވާއިރު، ރެއިން ފެށިގެން އެގެއިން ވަނީ ކަރަންޓު ވެސް ކެނޑިފައި. ކައުންސިލާއި އެމްއެންޑީއެފް ގުޅިގެން މިހާރު ދަނީ އެގެއަށް އެހީތެރިކަން ފޯރުކޮށްދެމުން،" އެ އިދާރާއިން ބުންޏެވެ.
