އައްޑޫ ސިޓީ ހިތަދޫއިން ފުރައިގެން މާލެއަށް ދަތުރުކުރަމުންދިޔަ މުދާ އުފުލާ ދޯންޏެއް ރަސްމާލެ ފަރަށް ރޭ އަރައިފި އެވެ.
ފުލުހުން ބުނީ މި ހާދިސާ ހިނގިއިރު ދޯނީގައި ދިވެހި ކެޕްޓަނަކާއި ތިން ބިދޭސީން ހިމެނޭހެން ހަތަރު މީހުން ތިބިއިރު، އޭގެއިން އެއްވެސް މީހަކަށް އަނިޔާއެއް ލިބިފައި ނުވެ އެވެ.
މި ހާދިސާ ލިބުމާއެކު ފުލުހުންނާއި އެމްއެންޑީއެފް ކޯސްޓްގާޑުން ހަރަކާތްތެރިވެފައިވާ ކަމަށް ފުލުހުން ބުންޏެވެ. އެގޮތުން ފުލުހުން ބުނީ ރަސްމާލެއިން ދިޔަ އުޅަނދަކަށް ދޯނީގައި ތިބި ހަތަރު މީހުން ނަގައި، ކޯސްޓްގާޑުގެ ހާބާ ޕެޓްރޯލް ލޯންޗުގައި އެ މީހުން ވަނީ އެ ސަރަހައްދުގައި ހަރަކާތްތެރިވި އެހެން އުކޅަނދަކަށް ގެންގޮސްދީފައި ކަމަށެވެ.
ފުލުހުން ބުނީ ރަސްމާލެ ފަރަށް އަރާފައިވާ އެ ދޯނި ފުންކުރުމުގެ މަސައްކަތް ކުރަމުންދާ ކަމަށެވެ. މިކަން ހިނގާފައިވާ ގޮތް ފުލުހުން އަންނަނީ ބަަލަމުންނެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި އެ ދޯނި ފަރަށް އަރައި، އޮތީ އަރިއަޅާލާފަ އެވެ. އޭގެ ސަބަބުން ދޯންޏަށް ލިބުނު ގެއްލުމުގެ ތަފްސީލެއް މިހާތަނަށް ލިބިފައެއް ނުވެ އެވެ.
ރަސްމާލެއަކީ ދިވެހި ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ހިއްކަމުންދިޔަ ރަށެކެވެ. އެތަނުން ބޮޑުބައެއް ހިއްކާ ނިމުނުފަހުން ސަރުކާރުން މިހާރު އުޅެނީ އެތަނުން އެއްބައި ޔޫއޭއީގެ އީގަލް ހިލްސްއަށް ދޫކޮށްލުމަށެވެ.
އެކަމާ ދެކޮޅަށް ގިނަ ބަޔަކު އަޑުއުފުލަމުންދާއިރު، ސަރުކާރުން މަސައްކަތްކުރަނީ ރައްޔިތުންގެ އަޑު ނާހައި ގާނޫނުތައް ބަދަލުކޮށްގެން އެތަން އީގަލް ހިލްސްއަށް ދިނުމަށެވެ.
