ފޭސްބުކްގައި ކުރި ކޮމެންޓަކާ ގުޅިގެން ސްރީލަންކާގެ މީހަކަށް އިއްވާފައިވާ މަރުގެ ހުކުމް ސައުދީ އަރަބިއްޔާގެ ސުޕްރީމް ކޯޓުން ބާތިލްކޮށްފި ކަމަށް ލަންކާގެ ޑެޕިއުޓީ ފޮރިން މިނިސްޓަރު އަރުން ހޭމަޗަންދުރަ ވިދާޅުވެއްޖެ އެވެ.
އުމުރުން 27 އަހަރުގެ އަނޯޖަން ސިވަރާސާގެ މައްޗަށް އިސްލާމްދީނަށާއި ކީރިތި ރަސޫލާއަށް ފުރައްސާރަކުރި ކަމުގެ ކުށް ސާބިތުވެ، ސައުދީގެ އިސްތިއުނާފީ ކޯޓުން އޭނާ މަރަން ހުކުމް ކުރީ މިދިޔަ ސެޕްޓެމްބަރު މަހުގެ ތެރޭގަ އެވެ.
މި މައްސަލައާ ގުޅިގެން ސްރީލަންކާގައި ބޮޑު ކަންބޮޑުވުމެއް އުފެދުނުއިރު، އޭނާއަށް މައާފު ހޯދައިދިނުމަށްޓަކައި ޑިޕްލޮމެޓިކް ފެންވަރުގައި ގިނަ މަސައްކަތްތަކެއް ވަނީ ކޮށްފަ އެވެ.
ސައުދީގެ އެންމެ މަތީ ކޯޓުން މިދިޔަ ބުދަ ދުވަހު އެ ހުކުމް ބާތިލްކޮށްފައިވާކަން ހާމަކުރައްވައި، ހޭމަޗަންދުރަ ފޭސްބުކްގައި ކުރެއްވި ޕޯސްޓެއްގައި ވަނީ ދެ ގައުމުގެ ކަމާބެހޭ ފަރާތްތަކަށާއި ގާނޫނީ ޓީމުތަކުން ކުރި މަސައްކަތަށް ޝުކުރު އަދާކުރައްވާފަ އެވެ.
މި މައްސަލަ ފެށުނީ މިދިޔަ ޖޫން މަހުގެ ފަހުކޮޅު، ހިންދޫންގެ ދީނީ ހަރަކާތެއްގެ ތެރޭގައި މުސްލިމް ޒުވާނަކު ކުއްތާއެއްގެ ގައިގައި ކޮޅުފައިން ޖަހާ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވެ، ދީނީ ބަހުސްތަކެއް އުފެދުމާ ގުޅިގެންނެވެ.
އެ ބަހުސްގެ ތެރޭގައި މީހަކު ހިންދޫންގެ ބާތިލް ކަލާނގެއަކަށް ފުރައްސާރަކޮށް ކުރި ޕޯސްޓަކަށް ރައްދުދެމުން، ސިވަރާސާ ވަނީ ތަމަޅަ ބަހުން ކީރިތި ރަސޫލާއަށް ފުރައްސާރަކޮށް ކޮމެންޓް ކޮށްފަ އެވެ.
ސިވަރާސާ ވަގުތުން އެ ކޮމެންޓް ފޮހެލައި މައާފަށް އެދި ވީޑިއޯއެއް އާންމުކުރި ނަމަވެސް، އެ ކޮމެންޓުގެ ސްކްރީންޝޮޓެއް އޭނާ ވަޒީފާ އަދާކުރާ ކުންފުންޏަށާއި ސައުދީގެ ކަމާބެހޭ ފަރާތްތަކުގެ ސަމާލުކަމަށް އައުމާ ގުޅިގެން، މިދިޔަ ޖުލައި މަހު އޭނާ ހައްޔަރުކުރި އެވެ.
މި މައްސަލައިގައި ދެން އަމަލުކުރާނެ ގޮތެއް ނުވަތަ ސިވަރާސާ ބަންދުގައި ބަހައްޓާނީ ކިހާ މުއްދަތަކަށް ކަމެއް އަދި ސާފެއް ނުވެ އެވެ. އަލް-އަހްސާ ކްރިމިނަލް ކޯޓުން އެންމެ ފުރަތަމަ އޭނާގެ މައްޗަށް އިއްވީ ފަސް އަހަރުގެ ޖަލު ހުކުމަކާއި ތިން މިލިއަން ސައުދީ ރިޔާލްގެ ޖޫރިމަނާއެކެވެ.
ސިވަރާސާގެ މައްސަލައިގައި ސައުދީއާއެކު ކުރިއަށްދާ ގާނޫނީ މަޝްވަރާތަކުގައި ބައިވެރިވެވަޑައިގަންނަވާ ލަންކާގެ ގާނޫނު ހަދާ މަޖިލީހުގެ މެންބަރު ފައިޒަރު މުސްތަފާ ވިދާޅުވީ، ސައުދީން މަރުގެ ހުކުމް ބާތިލްކޮށްފައިވާކަން ކަށަވަރުވާ ކަމަށާއި، މިހާރު ދިރާސާ ކުރަމުންދަނީ ސުޕްރީމް ކޯޓުގެ އެންމެ ފަހުގެ ނިންމުން ކަމަށެވެ.
ސިވަރާސާގެ އާއިލާއިން މީގެ ކުރިން ބުނެފައިވަނީ، ސެޕްޓެމްބަރު 28 ގެ ފަހުން އޭނާއާ އެއްވެސް ވަރަކަށް ގުޅިފައި ނުވާ ކަމަށެވެ.
ބައިނަލްއަގުވާމީ އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ވެސް ވަނީ އޭނާގެ ފުރާނަ ސަލާމަތްކޮށްދިނުމަށް ސައުދީ ސަރުކާރަށް ގޮވާލާފަ އެވެ.
