ކެލިފޯނިއާގައި ހުންނަ އޯޕަންއޭއައިގެ އޮފީހެއްގައި ސިއްރުން ރެކޯޑިން ޑިވައިސްއެއް ހަރުކުރި ކަމުގެ ތުހުމަތުގައި ސައުދީ އަރަބިއްޔާގެ ރައްޔިތަކަށް ދައުވާ އުފުލައިފި ކަމަށް އެމެރިކާގެ ފެޑަރަލް ޕްރޮސެކިއުޓަރުން ހާމަކޮށްފި އެވެ.
އޯޕަންއޭއައިގައި އިންޖިނިއަރެއްގެ ގޮތުގައި މަސައްކަތް ކުރި އަބްދުއްރަހްމާން އަލްފައުޒާންގެ މައްޗަށް ފެޑަރަލް ކޯޓުގައި އުފުލާފައިވަނީ، އިލެކްޓްރޯނިކް ނުވަތަ މެކޭނިކަލް އާލާތެއް ބޭނުންކޮށްގެން ސިއްރުން މުއާމަލާތްތައް އަޑުއެހުމަށް މަސައްކަތް ކުރުމުގެ ކުށުގެ ދައުވާ އެވެ.
ސެން ފްރަންސިސްކޯގައި ހުންނަ އެ ކުންފުނީގެ އޮފީހުގެ ތެރޭގައި ފޮރުވާފައި ހުރި "ޒަމާނީ ރެކޯޑިން ޑިވައިސްއެއް" ފެނުމާ ގުޅިގެން އެކަން އެފްބީއައި އަށް ރިޕޯޓްކޮށްފައިވާ ކަމަށް އޯޕަންއޭއައި އިން ބުންޏެވެ. އެ ކުންފުނިން ބުނި ގޮތުގައި، އެ ޑިވައިސް ހަރުކުރީ އެތަނުގެ މުވައްޒަފަކުކަން ދެނެގަނެފައިވަނީ ކުންފުނީގެ އަމިއްލަ އާޓިފިޝަލް އިންޓެލިޖެންސް މޮޑެލްތައް ބޭނުންކޮށްގެންނެވެ.
ޕްރޮސެކިއުޓަރުން ބުނާ ގޮތުގައި، ޓިޝޫ ކަރުދާހުން އޮޅާލާފައިވާ އެ ޑިވައިސް ފެނިފައިވަނީ އެގްޒެކެޓިވް ކޮންފަރެންސް ރޫމެއްގައި ހުރި ޓީވީއެއްގެ ފަހަތުގައި އިން ޔޫއެސްބީ ޕޯޓަކަށް ޖަހާފައި ހުއްޓަ އެވެ.
މަގުބޫލު ޗެޓްބޮޓް "ޗެޓްޖީޕީޓީ" އުފެއްދި އޯޕަންއޭއައި އިން ބުނީ، މި ހާދިސާގައި ކުންފުނީގެ ސޯސް ކޯޑް، މޮޑެލް ވެއިޓްސް ނުވަތަ ކަސްޓަމަރުންގެ އެއްވެސް މައުލޫމާތެއް ނަހަމަ ގޮތުގައި ބޭނުންކޮށްފައިވާ ކަމުގެ ނުވަތަ ވަގަށް ނަގާފައިވާ ކަމުގެ އެއްވެސް ހެއްކެއް ފެނިފައި ނުވާ ކަމަށެވެ. އަދި އެކަމާ ގުޅިގެން އެ މުވައްޒަފު މިހާރު ވަޒީފާއިން ވަކިކޮށްފައިވާ ކަމަށް ވެސް އެ ކުންފުނިން ބުންޏެވެ.
އެފްބީއައިގެ ޑިރެކްޓަރު ކޭޝް ޕަޓޭލް ނެރުއްވި ބަޔާނެއްގައި ވިދާޅުވީ، ހުށަހަޅާފައިވާ މައްސަލައިގައިވާ ގޮތުން އަލްފައުޒާން ވަނީ އޭނާ ވަޒީފާ އަދާކުރާ ކުންފުނީގެ އެގްޒެކެޓިވް ކޮންފަރެންސް ރޫމުގައި ސިއްރު ރެކޯޑިން ޑިވައިސްއެއް ފޮރުވައިގެން، ކުންފުނީގެ ނާޒުކު މުއާމަލާތްތަކެއް ސިއްރުން ރެކޯޑްކުރަން މަސައްކަތް ކޮށްފަ އެވެ.
ޕަޓޭލް ވިދާޅުވި ގޮތުގައި، މި އަމަލުގެ މަގްސަދަކީ ކުންފުނީގެ އޭއައި އުފެއްދުންތަކާ ބެހޭ މައުލޫމާތު ހޯދުމެވެ.
ޕްރޮސެކިއުޓަރުން ބުނާ ގޮތުގައި އަލްފައުޒާން އޯޕަންއޭއައިގައި އިންޖިނިއަރެއްގެ ގޮތުގައި މަސައްކަތް ކުރަން ފަށާފައިވަނީ 2025 ވަނަ އަހަރުގެ ޖުލައި މަހުން ފެށިގެންނެވެ.
އޯޕަންއޭއައިގެ މުވައްޒަފުންނަށް މި ޑިވައިސް ފެނިފައިވަނީ ސެޕްޓެމްބަރު 30 ގައެވެ. އެއީ ޕްރޮސެކިއުޓަރުން ބުނާ ގޮތުގައި އެ ޑިވައިސް ހަރުކުރިތާ ދެ ދުވަސް ފަހެވެ. އަދި އެ ޑިވައިސް ހުރީ އެންކްރިޕްޓްކޮށްފައި ކަމަށް ވެސް ޕްރޮސެކިއުޓަރުން ބުންޏެވެ.
އޯޕަންއޭއައި އިން ބުނީ، އެ ކުންފުނީގެ އޭއައި މޮޑެލްތައް ބޭނުންކޮށްގެން އެ ޑިވައިސްއަކީ ކޮން އެއްޗެއްކަމާއި، އެއީ ކޮންތާކުން އައި އެއްޗެއްކަން ދެނެގަނެވުނު ކަމަށެވެ. އަދި އެއީ މީގެ ދުވަސްކޮޅެއް ކުރިން ވަކި މުވައްޒަފަކު ހަރުކުރި އެއްޗެއްކަން ވެސް އެ މޮޑެލްތަކުގެ އެހީގައި ކަށަވަރު ކުރެވުނު ކަމަށް އެ ކުންފުނިން ބުންޏެވެ.
އެފްބީއައި އިން ބުނާ ގޮތުގައި، ތުހުމަތު ކުރެވޭ މީހާ ވަނީ އޯޕަންއޭއައިގެ ތެރޭގައި ހުރި މުހިންމު ތަންތަނާ ބެހޭ މައުލޫމާތާއި، ސިއްރުން އޯޑިއޯ އިކުއިޕްމަންޓް ހަރުކުރާނެ ގޮތް ހޯދުމަށް "ޕްރޮޑަކްޓިވިޓީ ޓޫލް" އެއްގެ އިތުރުން "ޗެޓްބޮޓެއް" ބޭނުންކޮށްގެން ދިރާސާކޮށްފަ އެވެ.
އޭނާ ޗެޓްބޮޓް މެދުވެރިކޮށް ހޯދާފައިވާ މައުލޫމާތުތަކުގެ ތެރޭގައި، ޑިވައިސްއެއް ތައްޔާރުކުރުމާއި، އޭގައި ބޭނުންވާ ބަދަލުތައް ގެނައުމާއި، ހަރުކުރުމާއި، އޯޑިއޯ ރެކޯޑްކުރުމާއި، ޓެސްޓްކުރުމާއި، ޑިވައިސް ފޮރުވުމުގެ އިތުރުން ދުރުގައި ހުރެގެން އެ ޑިވައިސް ބޭނުންކުރާނެ ގޮތް ހިމެނޭ ކަމަށް ޕްރޮސެކިއުޓަރުން ތުހުމަތު ކުރެ އެވެ.
އަލްފައުޒާން އަންގާރަ ދުވަހު ކޯޓަށް ހާޒިރުކޮށްފައިވާ އިރު، މި ކުށް ސާބިތުވެއްޖެ ނަމަ، އޭނާގެ މައްޗަށް ފަސް އަހަރުގެ ޖަލު ހުކުމެއް އައުމުގެ އިތުރުން 250,000 އެމެރިކާ ޑޮލަރުން ޖޫރިމަނާ ކުރެވޭނެ އެވެ.
