ޔަމަނުގެ ބޯޑަރު ހުރަސްކޮށް ސައުދީ އަރަބިއްޔާއަށް ދެމުންދާ ހަމަލާތައް ވަރުގަދަވެ، ފާއިތުވި ދެ ދުވަހުގެ ތެރޭގައި އެ ގައުމުގެ އެއާޕޯޓުތަކަށް ދިން ހަމަލާތަކެއްގައި ތިން މީހަކު މަރުވެއްޖެ އެވެ.
ސައުދީ އަރަބިއްޔާގެ ޖެނެރަލް އޮތޯރިޓީ އޮފް ސިވިލް އޭވިއޭޝަން އިން ބުދަ ދުވަހު ނެރުނު ބަޔާނެއްގައި ބުނީ، އަބްހާ އިންޓަނޭޝަނަލް އެއާޕޯޓަށް ދިން ހަމަލާއެއްގައި ދެ މީހަކު މަރުވެ، 28 މީހަކު ޒަޚަމްވެފައިވާ ކަމަށެވެ.
މީގެ އިތުރުން، ސައުދީގެ ވެރިރަށް ރިޔާދުގައި ހުންނަ ކިންގް ޚާލިދު އިންޓަނޭޝަނަލް އެއާޕޯޓަށް ދިން ވަކި ހަމަލާއެއްގައި އެކަކު މަރުވެ، އަށް މީހަކު ޒަޚަމްވެފައިވާ ކަމަށް ވެސް އެ އިދާރާއިން މައުލޫމާތު ދީފައިވެ އެވެ.
ޔަމަނުގެ ހޫތީން ޒިންމާ އުފުލާފައިވާ މި ހަމަލާތަކަކީ، ސައުދީން ތާއީދުކުރާ ޔަމަނު ސަރުކާރުގެ ފައުޖުތަކާއި އީރާނުން ތާއީދުކުރާ ހޫތީންނާ ދެމެދު އަލުން ފެށިފައިވާ ހަނގުރާމަ އިތުރަށް ވަރުގަދަވެގެން ގޮސްފައިވާ ކަމުގެ ނިޝާނެކެވެ.
ސިވިލް އޭވިއޭޝަން އޮތޯރިޓީން ބުނި ގޮތުގައި މި ދެ އެއާޕޯޓަށް ހަމަލާދީފައިވަނީ އޮކްޓޫބަރު މަހުގެ 6 އަދި 7 ވަނަ ދުވަހު އެވެ.
ޔަމަނު ބޯޑަރު ކައިރީގައި އޮންނަ އަބްހާ އެއާޕޯޓަށް ދިން ހަމަލާގައި މަރުވެފައިވަނީ މޮރޮކޯ އަދި އަލްޖީރިއާ އަށް ނިސްބަތްވާ ދެ އަންހެނުންނެވެ.
އޭގެ އިތުރުން، ރިޔާދުގެ ކިންގް ޚާލިދު އެއާޕޯޓަށް ދިން ހަމަލާގައި މަރުވެފައިވަނީ ސޫދާނަށް ނިސްބަތްވާ ފިރިހެނެއް ކަމަށް ވެސް އެ ބަޔާނުގައިވެ އެވެ.
މި ހަމަލާތަކުގެ ޒިންމާ އުފުލަންޖެހޭ ފަރާތެއް ސައުދީގެ ސިވިލް އޭވިއޭޝަން އިދާރާއިން ހާމަކޮށްފައި ނުވި ނަމަވެސް، ހޫތީންގެ އަސްކަރީ ތަރުޖަމާނު ޔަހްޔާ ސަރީ ބުނީ އެ ޖަމާއަތުގެ ހަނގުރާމަވެރިން ސައުދީގެ ދެ އެއާޕޯޓަށް ހަމަލާދިނީ ބެލިސްޓިކް މިސައިލާއި ޑްރޯން ބޭނުންކޮށްގެން ކަމަށެވެ.
