ސައުދީ އަރަބިއްޔާގެ ވެރިރަށް ރިޔާދުގެ އެއާޕޯޓަށް ދިން ހަމަލާއެއްގައި މަދުވެގެން 12 މީހުން މަރުވެ، 309 މީހުން ޒަޚަމްވެފައިވާ ކަމަށް އެ ގައުމުގެ ކަމާބެހޭ އިދާރާތަކުން ބުނެފި އެވެ.
ސައުދީ ސިވިލް އޭވިއޭޝަން އޮތޯރިޓީން ހާމަކުރި ގޮތުގައި މި ހަމަލާގައި މަރުވި މީހުންގެ ތެރޭގައި ސައުދީގެ ހަތަރު މީހަކާއި، ބަންގްލަދޭޝްގެ ދެ މީހެއްގެ އިތުރުން އެމެރިކާ، އުރުދުން، ފަލަސްތީން، ސީރިއާ، ސޫދާން އަދި މިސްރުގެ މީހަކު ހިމެނެ އެވެ. މި ހާދިސާއާ ގުޅިގެން ކިންގް ޚާލިދު އިންޓަނޭޝަނަލް އެއާޕޯޓުގެ އޮޕަރޭޝަންތައް މިހާރު ވަނީ މެދުކަނޑާލާފަ އެވެ.
ސައުދީ އިސްވެ އޮންނަ އަސްކަރީ ކޯލިޝަނުން ވަނީ މި ހަމަލާއަށް ރައްދު ދޭނެ ކަމަށް ބުނެފަ އެވެ. އަދި މިއީ ހޫތީން ދިން ހަމަލާއެއް ކަމަށް ތުހުމަތުކޮށް، މިއީ "ހަނގުރާމައިގެ ކުށެއް" ކަމަށް އެ ކޯލިޝަނުން ވަނީ ސިފަކޮށްފަ އެވެ.
މިދިޔަ ބުރާސްފަތި ދުވަހު އެއާޕޯޓަށް ދިން ހަމަލާގައި ތިން މީހުން މަރުވެ، ބޯޓަކަށް ގެއްލުން ލިބުނު ހަމަލާގެ ޒިންމާ ހޫތީން އުފުލި ނަމަވެސް، ހޮނިހިރު ދުވަހު ދިން މި ހަމަލާގެ ޒިންމާ އެ ޖަމާއަތުން އަދި ރަސްމީކޮށް އުފުލާފައެއް ނުވެ އެވެ.
ޔަމަނުގެ ސަރުކާރަށް ތާއީދުކުރާ ސައުދީ ކޯލިޝަނާއި، އެ ގައުމުގެ ބޮޑު ބައެއް ކޮންޓްރޯލް ކުރާ ހޫތީންނާ ދެމެދު ކުރަމުންދާ ހަނގުރާމަ ފަހަކަށް އައިސް ވަނީ ވަރަށް ބޮޑަށް ވަރުގަދަވެފަ އެވެ. ހޮނިހިރު ދުވަހު ދިން މި ހަމަލާއަކީ 2015 ވަނަ އަހަރުގެ މެއި މަހަށް ފަހު ސައުދީ އަރަބިއްޔާއަށް ދިން އެންމެ ނުރައްކާތެރި ހަމަލާ އެވެ.
ރިޔާދުގެ އެއާޕޯޓަށް ދިން ހަމަލާގެ އިތުރުން، ސައުދީގެ އިރުމަތީގައި އޮންނަ ދައްމާމުގެ ކިންގް ފަހުދު އިންޓަނޭޝަނަލް އެއާޕޯޓު ކައިރިއަށް ވެސް ހޮނިހިރު ދުވަހު މިސައިލެއް ވެއްޓިފައިވާ ކަމަށް ސައުދީ ކޯލިޝަނުން ބުނެފައިވެ އެވެ.
މި ހަމަލާތައް ދީފައި މިވަނީ، އީރާނުގެ މަދަދުލިބޭ ހޫތީން އެއާޕޯޓަށް ދިން ދެ ހަމަލާއެއްގައި ޕައިލެޓަކު ހިމެނޭހެން ސައުދީގެ ތިން މީހަކު މަރުވިތާ އެއްދުވަސް ފަހުންނެވެ. މީގެ އިތުރުން، އޮކްޓޯބަރު މަހުގެ 6 އަދި 7 ވަނަ ދުވަހު ސައުދީގެ ދެ އެއާޕޯޓަކަށް ހޫތީން ދިން ހަމަލާތަކުގައި ވެސް ތިން މީހަކު ވަނީ މަރުވެފަ އެވެ.
ހޮނިހިރު ދުވަހު ނެރުނު ބަޔާނެއްގައި ސައުދީ ސިވިލް އޭވިއޭޝަން އޮތޯރިޓީން ބުނީ، މި ހަމަލާގައި ޒަޚަމްވި ބައެއް މީހުންގެ ހާލު "ވަރަށް ސީރިއަސް" ކަމަށެވެ.
ފްލައިޓްތައް މޮނިޓާ ކުރާ "ފްލައިޓްރޭޑާ" އިން ދައްކާ ގޮތުގައި، ރިޔާދަށް ދަތުރުކުރަން ހަމަޖެހިފައިވާ ހުރިހާ ފްލައިޓްތަކެއް މިހާރު ވަނީ ކެންސަލްކޮށް ނުވަތަ އެހެން އެއާޕޯޓުތަކަށް ބަދަލުކޮށްފަ އެވެ.
ހޫތީން ބުނަމުންދަނީ ސައުދީ އަރަބިއްޔާއަށް ހަމަލާ ދެނީ، ޔަމަނުގެ ދާޚިލީ ހަނގުރާމައިގައި އެ ގައުމުގެ ސަރުކާރު ފައުޖުތަކަށް ސައުދީން އެހީތެރިކަން ފޯރުކޮށްދެމުންދާތީ އެކަމާ ދެކޮޅަށް ކަމަށެވެ.
