ސައުދީ އަރަބިއްޔާގެ ރިޔާދު އެއާޕޯޓަށް އަމާޒުކޮށް ދިން ނުރައްކާތެރި ހަމަލާތަކެއްގައި މަދުވެގެން 18 މީހުން މަރުވެ 300 އަށް ވުރެ ގިނަ މީހުން ޒަހަމްވިއިރު، އެ ހަމަލާތައް ދިނުމުގެ ކުރިން، އަސްކަރީ ހަމަލާތަކާ ގުޅޭ ގޮތުން އާންމުންނަށް ދެމުންދިޔަ އިންޒާރުތައް ސައުދީ ސަރުކާރުން ހުއްޓާލާފައި އޮތްކަން އެނގިއްޖެ އެވެ.
ވޭތުވެދިޔަ ހަފުތާގެ ތެރޭގައި ރިޔާދަށް ދިން ހަތަރު ހަމަލާގެ ކުރިން އާންމުންނަށް އެއްވެސް އިންޒާރެއް ދީފައިނުވަނީ ކީއްވެގެން ކަމެއް ސައުދީ ސަރުކާރުން މިހާތަނަށް ހާމަކޮށްފައެއް ނުވެ އެވެ.
އީރާނަށް ތާއީދުކުރާ ހޫތީންނާ ދެކޮޅަށް ކުރަމުންދާ ހަނގުރާމައިގެ ތެރޭގައި، ސައުދީ ރައްޔިތުންނަށާއި ދުނިޔެއަށް އެ ގައުމަކީ އަމާން ތަނެއްގެ ގޮތުގައި ދެއްކުމަށް ކުރާ މަސައްކަތަށް ހުރަސްއެޅޭ ފަދަ ހަމަލާތައް ފާހަގަކުރުމަށް މީގެ ކުރިން މިފަދަ އިންޒާރުތައް ދެމުންދިޔަ އެވެ.
ރިޔާދު އެއާޕޯޓަށް ދިން ހަމަލާތަކުގެ ކުރިން އެއްވެސް އިންޒާރެއް ދީފައިނުވުމުން، ސައުދީ އަރަބިއްޔާއަށް ދޭ ހަމަލާތަކުން ދިފާއުވުމުގެ ގާބިލުކަމާއި، އެ ގައުމުގައި ދިރިއުޅޭ މީހުންނާއި ޒިޔާރަތްކުރާ މީހުން ރައްކާތެރިކުރުމުގެ ގާބިލުކަމާ މެދު ސުވާލު އުފެދިފައިވާ ކަމަށް އެ ސަރަހައްދުގައި ތިއްބެވި ހުޅަނގުގެ އަދި އަރަބި ގައުމުތަކުގެ ހަތަރު އޮފިޝަލަކާއި ސިޔާސީ ދިރާސާވެރިން ރޮއިޓާސްއަށް މައުލޫމާތު ދީފައިވެ އެވެ.
އޮފިޝަލުން ވިދާޅުވި ގޮތުގައި އިންޒާރު ނުދިނުމަކީ ގައުމުގެ ހާލަތު އާންމު ހާލަތެއްގައި އޮތްކަން ދެއްކުމަށް ކުރާ މަސައްކަތެކެވެ.
ސައުދީގެ ދާޚިލީ ވުޒާރާގެ ދަށުން ހިންގާ، ކުއްލި ހާލަތްތައް މެނޭޖުކުރުމުގެ މަސައްކަތް ކުރާ ސައުދީ ސިވިލް ޑިފެންސް އާއި، ސަރުކާރުގެ މީޑިއާ އޮފީހުން، އިންޒާރުތައް ނުދޭ ސަބަބާ ގުޅޭގޮތުން އީމެއިލް މެދުވެރިކޮށް ކުރި ސުވާލުތަކަށް އެއްވެސް ޖަވާބެއް ދީފައެއް ނުވެ އެވެ.
ސަރަހައްދީ ބައެއް ދިރާސާވެރިން ބުނާ ގޮތުގައި ސައުދީ އަރަބިއްޔާގެ މި ސިޔާސަތުގެ ސަބަބުން ނޭދެވޭ ނަތީޖާއެއް ނުކުތުމުގެ ފުރުސަތު އެބައޮތެވެ. ސަބަބަކީ އިންޒާރުތައް ނުދިނުމުގެ ސަބަބުން ގައުމުގެ ތެރޭގައި އޮތް ނުތަނަވަސްކަމާއި ޔަގީންކަން އިތުރުވެފައި ވާތީ އެވެ.
މިދިޔަ ހޯމަ ދުވަހު ސައުދީ ސިވިލް ޑިފެންސް އޮތޯރިޓީން ވަނީ ސެޕްޓެމްބަރު 29 ގެ ފަހުން ފުރަތަމަ ފަހަރަށް އިންޒާރުގެ މެސެޖުތަކެއް ނެރެފަ އެވެ. އެ މެސެޖުތަކުގައި ވަނީ ރިޔާދާއި ދެކުނުގެ ސިޓީތަކަށް ނުރައްކަލެއް ކުރިމަތިވެދާނެ ކަމުގެ އިންޒާރު ދީފަ އެވެ.
