އެމެރިކާގެ މަޝްހޫރު އެކްޓްރެސް ސެލްމާ ބްލެއާ، މަތިންދާބޯޓެއްގެ ކްރޫއަށް ހަމަލާދިން ކަމަށް ބުނާ މައްސަލައެއްގައި އޭނާގެ މައްޗަށް ދައުވާ އުފުލައި ކޯޓަށް ހާޒިރުވުމަށް އަމުރު ނެރެފި ކަމަށް އޮފިޝަލުން ވިދާޅުވެއްޖެ އެވެ.
"ލީގަލީ ބްލޮންޑް" ފަދަ ފިލްމުތަކުން ފެނިގެންގޮސްފައިވާ ބްލެއާ، ލޮސް އެންޖެލިސް އިން ނިއުޔޯކަށް ދަތުރުކުރި ޑެލްޓާ އެއާލައިންސްގެ ފްލައިޓެއްގެ ތެރޭގައި ހިންގި ކަމަށް ބުނާ މި އަމަލު އެމެރިކާގެ ފެޑަރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ވަނީ ތަހުގީގުކޮށްފަ އެވެ.
އެއާޕޯޓް އޮފިޝަލުން ވިދާޅުވި ގޮތުގައި، މިދިޔަ އާދީއްތަ ދުވަހު ފްލައިޓެއްގެ ތެރޭގައި "ފަސިންޖަރަކު ޖިސްމާނީ ގޮތުން އަނިޔާވެރިވަމުންދާ" ކަމުގެ ރިޕޯޓެއް ލިބިގެން އެ ފަރާތްތަކުން ވަނީ ހަރަކާތްތެރިވެފަ އެވެ. ނިއުޔޯކް ޕޯޓް އޮތޯރިޓީން ބުނި ގޮތުގައި މި ހާދިސާގައި ފްލައިޓްގެ ދެ އެޓެންޑެންޓަކަށް އަނިޔާވެފައިވާއިރު، އޭގެ ތެރެއިން އެކަކަށް ހޮސްޕިޓަލުގައި ފަރުވާދޭން ޖެހުނެވެ.
"ހެލްބޯއި" އަދި "ކްރުއަލް އިންޓެންޝަންސް" ފަދަ ފިލްމުތަކުން މަގުބޫލުކަން ހޯދި އުމުރުން 54 އަހަރުގެ ބްލެއާ ވަނީ ހައްޔަރުކޮށް ހޮސްޕިޓަލަށް ގެންގޮސްފަ އެވެ. ބްލެއާގެ ޕަބްލިސިސްޓް ބުނީ، މި ހާދިސާ ހިނގަން މެދުވެރިވީ އޭނާއަށް ދިމާވި ސިއްހީ ކުއްލި ހާލަތެއްގެ ސަބަބުން ކަމަށެވެ.
ސީބީއެސް ނިއުސް އިން ރިޕޯޓްކޮށްފައިވާ ގޮތުގައި، އެމްބިއުލާންސްގައި ބްލެއާ ހޮސްޕިޓަލަށް ގެންދިޔަ މަގުމަތީގައި އޭނާ ވަނީ ފުލުހެއްގެ ގައިގައި ކޮޅުފައިން ޖަހާފަ އެވެ. އަދި ހޮސްޕިޓަލަށް ގެންދިއުމަށްފަހު އެތަނުގެ ނަރުހަކަށް ވެސް އޭނާ ހަމަލާދީފައިވާ ކަމަށް ޕްރޮސެކިއުޓަރުން ތުހުމަތު ކުރެ އެވެ.
ހޮސްޕިޓަލުން ދޫކޮށްލުމަށްފަހު ބްލެއާ ގެންދިޔައީ ކުއީންސް ސެންޓްރަލް ބުކިން އަށެވެ. އެމްބިއުލާންސްގަ އާއި ހޮސްޕިޓަލުގައި ހިންގި ހާދިސާތަކާ ގުޅިގެން އޭނާގެ މައްޗަށް އުފުލާފައިވާ ދެ ދައުވާއަށް ވެސް އޭނާ ވަނީ އިންކާރުކޮށްފަ އެވެ.
ސީބީއެސް އިން ރިޕޯޓްކުރި ގޮތުގައި ފަނޑިޔާރު ވަނީ 60،000 ޑޮލަރު ދެއްކުމުން އޭނާ ކަފާލާތުގެ ދަށުން ދޫކޮށްލާފަ އެވެ.
ބްލެއާ ފިލްމީ މަސައްކަތްތަކާ ދުރަށް ޖެހިލީ 2018 ވަނަ އަހަރު އޭނާއަށް "މަލްޓިޕަލް ސްކްލެރޯސިސް" (އެމްއެސް) ބަލި ޖެހިފައިވާކަން އެނގުނު ހިސާބުންނެވެ. އޭގެ އަހަރުތަކެއް ފަހުން ބީބީސީއަށް ދިން އިންޓަވިއުއެއްގައި އޭނާ ބުނީ، މަސައްކަތް ހުއްޓާލަން ޖެހުމުގެ ސަބަބުން އޭނާގެ ކެރިއަރު ބަރުބާދުވީ އެ ބަލީގެ ސަބަބުން ކަމަށެވެ.
އާދީއްތަ ދުވަހުގެ ހާދިސާގެ ކުރިން ބްލެއާ ވަނީ އޭނާގެ ކުއްތާ "ސްކައުޓް" އާއެކު ކުރި ދަތުރުތަކުގެ ފޮޓޯތައް އިންސްޓަގްރާމްގައި ހިއްސާކޮށްފަ އެވެ. އިނގިރޭސި ރެޑް ފޮކްސް ލެބްރަޑޯ އާއިލާގެ މި ކުއްތާއަކީ ނާރުގެ ބަލީގެ ސަބަބުން ދިމާވާ އުނދަގޫތަކުގައި އެހީތެރިވުމަށް 2021 ވަނަ އަހަރު އޭނާ ހޯދި ކުއްތާއެކެވެ.
އޭނާގެ ބަލީގެ ނުރައްކާ ކުޑަވެ، ބަލި ކޮންޓްރޯލް ކުރެވިފައިވާކަން 2021 ވަނަ އަހަރު އިއުލާން ކުރި އެވެ.
މީގެ ކުރިން 2016 ވަނަ އަހަރު ވެސް ފްލައިޓެއްގެ ތެރޭގައި މަސްތުގެ ހާލަތުގައި ހުރެ ބްލެއާ ހިންގި ހަމަނުޖެހުމަކާ ގުޅިގެން، ދެ ނަރުހަކު ވެގެން އޭނާ ކޮންޓްރޯލް ކުރަން ޖެހުނު ހާދިސާއެއް ހިނގާފައިވެ އެވެ.
އެ ހާދިސާއަށް ފަހު ބްލެއާ ވަނީ އާންމުންގެ ކިބައިން މައާފަށް އެދިފަ އެވެ.
އޭނާގެ ހަޔާތުނާމާ "މީން ބޭބީ" ގައި، މަޝްހޫރު ތަރިން ކަމަށްވާ ސިއެނާ މިލާ، ސެތު މެކްފާލޭން އަދި ކޭޓް މޮސްގެ ގައިގައި އޭނާ ދަތްއެޅި ވާހަކަ ލިޔެފައިވެ އެވެ.
އޭގައިވާ ގޮތުގައި، އޭނާގެ ހަށިގަނޑަށް ނުކަތާ ވަރަށް ކަންކަން ދިމާވެ، ސިކުނޑީގެ މަސައްކަތްތަކަށް ބުރޫއަރާ ވަގުތުތަކުގައި އޭނާއަށް މީހުންގެ ގައިގައި ދަތްއެޅެނީ އެވެ.
