އީގަލް ހިލްސް މަޝްރޫއުގެ ސަބަބުން ދިވެހި މުޖުތަމައުގައި މިހާރު އޮތް ބައިބައިވުން އިތުރަށް ބޮޑުވެގެންދާނެ ކަމަށް އެމްޑީޕީގެ ކުރީގެ ރައީސް އިބްރާހީމް އިސްމާއީލް (އިބްރާ) ވިދާޅުވެއްޖެ އެވެ.
އެމްޑީޕީގެ މިސްރާބު ހުރީ ޕާޓީ އުފެއްދި އަސާސްތަކާ ދުރަށް ކަމަށް ވިދާޅުވެ ނަޝީދު އެކްސް ގައި ކުރެއްވި ޕޯސްޓަށް ރައްދު ދެއްވައި އިބްރާ ވިދާޅުވީ އެމްޑީޕީގެ އަސާސީ ސިޔާސަތުތަކަކީ ގައުމުގެ ވަސީލަތްތަކުން ހަމަހަމަ ފުރުސަތުތައް ހޯދައިދިނުން ކަމަށެވެ.
"އެމްޑީޕީ އުފެދިގެން އައީ އިންސާނީ ހައްގުތަކާއި ޑިމޮކްރެޓިކް ހަމަތަކުގެ މައްޗަށް. އެއީ ދުވަހަކުވެސް ގިނަ ދީންތަކާއި ސަގާފަތްތަކަށް ޖާގަދޭ ޕްލުރަލިޒަމް އަށް ބިނާވެފައިވާ ޕާޓީއެއް ނޫން،" އިބްރާ ވިދާޅުވި އެވެ.
އިބްރާ ވިދާޅުވީ ރާއްޖޭގައި މަސައްކަތްކުރާ ބޭރުގެ ގިނަ އަދަދެއްގެ މީހުންނަށް އިހުތިރާމްކޮށް، ކެތްތެރިކަން އިސްކުރުމަށް އެމްޑީޕީން އަބަދުވެސް ބާރުއަޅަމުން އައި ނަމަވެސް، އެއީ ތަފާތު ދީންތަކާއި ސަގާފަތްތަކުގެ މީހުންނަށް ރާއްޖޭގައި ދާއިމީކޮށް ވަޒަންވެރިވުމަށް ފުރުސަތު ދިނުން ނޫން ކަމަށެވެ.
ރަސްމާލެ ޑީލާ އޮތް ދެކޮޅުވެރިކަމަކީ ހަމައެކަނި ވަކި ފިކުރަކަށް ނުވަތަ އެންޓި-ޒަޔަނިސްޓް ވިސްނުމަކަށް އޮތް ދެކޮޅުވެރިކަމެއް ނޫންކަން ފާހަގަކުރައްވާ އިބްރާ ވިދާޅުވީ މީގެ ކުރިން ނަޝީދު އަމިއްލަފުޅަށް ދައްކަވަމުން ގެންދެވި ބައެއް ވާހަކަތަކާމެދު ޕާޓީގެ ތެރެއިން އޭރު ދެކޮޅު ނުހެދީ، އޭރުގެ ސިޔާސީ މަސްރަހު އޮތް ނާޒުކު ގޮތުން ކަމަށެވެ.
ނަމަވެސް މިހާރު ރައްޔިތުންގެ ވިސްނުން ބަދަލުވެފައިވާ ކަމަށާއި، ހަގީގީ ޑިމޮކްރަސީއެއްގައި ތަފާތު ހިޔާލުތަކަށް ޖާގަ އޮންނަންވާނެ ކަމަށް އިބްރާ ވިދާޅުވިއެވެ. އޭނާ ވިދާޅުވީ ގައުމުގެ މިލްކިއްޔާތާއި ވަސީލަތްތައް ބޭރުގެ ބޮޑެތި ކުންފުނިތަކަށް ދޫކޮށްލުމަކީ ގައުމުގެ މިނިވަންކަމާއި އިސްތިގުލާލަށް އޮތް ނުރައްކަލެއް ކަމަށެވެ.
ދައުލަތުން ބޮޑު ހަރަދުކޮށްގެން ހިއްކި ރަސްމާލޭގެ ބިމުން 500 ހެކްޓަރު ޔޫއޭއީގެ އީގަލް ހިލްސް ކުންފުންޏަށް ދޫކޮށްލުމަށް ސަރުކާރުން ނިންމާފައިވާ ނިންމުމާ މެދު އެ ޕާޓީގެ ތެރޭގައި ދެބަސްވުންތަކެއް އެބައޮތެވެ. އެކާމާ ގުޅޭގޮތުން އެ ޕާޓީގެ ސްޓޭންޑު ކަނޑައެޅުމަށް މިރޭ ގައުމީ މަޖިލީހުގެ ބައްދަލުވުމެއް ބޭއްވުމަށް ވަނީ ނިންމާފަ އެވެ.
ރަސްމާލެ ދޫކޮށްލަން ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
