އަމިއްލަ ހަރަދުގައި ބޭސްފަރުވާއަށް ރާއްޖެއިން ބޭރަށްދާއިރު ބޭންކުތައް މެދުވެރިކޮށް ވިއްކާ 1000 ޑޮލަރު ދޫކުރާ އުސޫލަށް ބަދަލު ގެނެސް، އެ ފައިސާ ވަކި ހަ ގައުމަކަށް އެކަނި ދޭގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނިންމައިފި އެވެ.
އެމްއެމްއޭއިން ބުނި ގޮތުގައި މި ބަދަލު ގެނައީ ބޭސްފަރުވާގެ ބޭނުމަށް ދޫކުރާ ބޭރު ފައިސާއަކީ ސީދާ އެ ބޭނުމަށް ހަރަދުކުރެވޭ ފައިސާކަން ކަށަވަރު ކުރުމުގެ ބޭނުމުގަ އެވެ.
މި އާ އުސޫލުގެ ދަށުން އަމިއްލަ ހަރަދުގައި ބޭސްފަރުވާއަށްދާ ދިވެހިންނަށް 1000 ޑޮލަރު ދޫކުރާނީ އިންޑިއާ، ސްރީލަންކާ، ތައިލެންޑް، މެލޭޝިޔާ، ސިންގަޕޫރު އަދި ޔުނައިޓެޑް އަރަބް އެމިރޭޓްސް އަށް ދާ ފަރާތްތަކަށް އެކަންޏެވެ. މިއީ ދިވެހިން އާންމުކޮށް ބޭސްފަރުވާއަށް ގޮސް އުޅޭ ގައުމުތަކެވެ.
ނަމަވެސް އާސަންދަ މެދުވެރިކޮށް ބޭސްފަރުވާއަށް ބޭރަށްދާ މީހުންނަށް ދޫކުރާ 2000 ޑޮލަރުގެ އުސޫލަށް އެއްވެސް ބަދަލެއް ނައިސް، ކުރިއެކޭ އެއްގޮތަށް ފައިސާ ލިބޭނެ ކަމަށް އެމްއެމްއޭއިން ބުނެފައިވެ އެވެ.
އެމްއެމްއޭގެ ތަފާސް ހިސާބުތަކުން ދައްކާ ގޮތުގައި، މިދިޔަ އަހަރުގެ އޮގަސްޓް މަހުން ފެށިގެން އަމިއްލަ ހަރަދުގައި ބޭސްފަރުވާއަށްދާ މީހުންނަށް 1000 ޑޮލަރު ވިއްކަން ފެށުމާ ގުޅިގެން، ބޭސްފަރުވާގެ ބޭނުމަށް ދޫކުރާ ޑޮލަރުގެ އަދަދު ވަނީ ވަރަށް ބޮޑަށް އިތުރުވެފަ އެވެ.
އެގޮތުން މި އަހަރުގެ ފުރަތަމަ ނުވަ މަސް ދުވަހުގެ ތެރޭގައި ބޭސްފަރުވާގެ ބޭނުންތަކަށް ޖުމުލަ 41.1 މިލިއަން އެމެރިކާ ޑޮލަރު ވިއްކާފައިވެ އެވެ. މިއީ 2025 ވަނަ އަހަރުގެ އެ މުއްދަތާ އަޅާބަލާއިރު ތިން ގުނަ އިތުރު އަދަދެކެވެ.
މި އަދަދުގެ ބޮޑު ބައެއް ހިއްސާކުރަނީ އަމިއްލަ ހަރަދުގައި ބޭސްފަރުވާއަށްދާ މީހުންނަށް ވިއްކާފައިވާ ފައިސާ އެވެ. ހިސާބުތަކުން ދައްކާ ގޮތުގައި މިއަހަރުގެ ސެޕްޓެންބަރު މަހުގެ ނިޔަލަށް އަމިއްލަ ހަރަދުގައި ބޭސްފަރުވާއަށް ރާއްޖެއިން ބޭރަށް ދިޔަ ދިވެހިންނަށް އެކަނިވެސް 29.2 މިލިއަން އެމެރިކާ ޑޮލަރު ވަނީ ވިއްކާފަ އެވެ.
އެމްއެމްއޭއިން ބުނީ މިގޮތަށް ޑޮލަރު ވިއްކާ ގައުމުތައް މަދުކުރަން ނިންމީ، ބޭރު ފައިސާގެ ބާޒާރަށް އަންނަ ލޮޅުންތައް ކުޑަކޮށް، ފައިސާ ބޭނުންކުރެވެނީ އެންމެ މުހިންމު ބޭނުންތަކަށްކަން ޔަގީން ކުރުމަށް ކަމަށެވެ.
އަމިއްލަ ހަރަދުގައި ބޭސްފަރުވާއަށްދާ މީހުންނަށް ޑޮލަރު ދޫކުރަމުންދާނީ ބޭންކުތައް މެދުވެރިކޮށެވެ. އަދި މެޑިކަލް ލިޔެކިޔުންތައް ކަށަވަރުކުރަނީ ވެސް ބޭންކުތަކުންނެވެ.
