އޮންލައިންކޮށް ވިޔަފާރިކުރަން މިހާރު އެއްވެސް ދައްޗެއް ދިމާނުވާނެ ކަމަށް ބެންކް އޮފް މޯލްޑިވްސް (ބީއެމްއެލް) އިން މައުލޫމާތު ލިބިފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ސައީދު ވިދާޅުވީ ޑޮލަރުގެ ދަތިކަމާ ގުޅިގެން ބީއެމްއެލް މެދުވެރިކޮށް އޮންލައިން ވިޔަފާރި ކުރުމުގައި ދިމާވި ދަތިތައް ހައްލުކޮށް، ކުރިން ދިމާވި މައްސަލަތައް ކުރިއަށް އޮތްތަނުގައި ދިމާނުވާނެ ކަމަށެވެ.
"އޮންލައިން ވިޔަފާރީގައި، އީ-ކޮމާސްގެ ދާއިރާގައި ޑޮލަރުގެ މައްސަލައާ ގުޅިގެން އައި ބައެއް ކަހަލަ ދަތިތައް. ދެން އެ މައްސަލަ، ޑޮލަރުގެ މައްސަލަ ބެންކް އޮފް މޯލްޑިވްސްއަށް އައި އެކި ހީނަރުކަމާ ގުޅިގެން އެބޭފުޅުން ވަރަށް މެނޭޖްކުރައްވައިފި ހާލަތު. އެނގޭތޯ. އެހެންނަމަވެސް މިހާރު ބެންކް އޮފް މޯލްޑިވްސް އިން މައުލޫމާތު ދެއްވާ ގޮތުގައި އެ ދިމާވި މައްސަލަތަކެއް ދިމައެއް ނުވާނެ ދެން އިރާދަކުރެއްވިއްޔާ،" މިނިސްޓަރު ވިދާޅުވި އެވެ.
ސައީދު ވިދާޅުވީ ބީއެމްއެލް މެދުވެރިކޮށް ޓީޓީ ހެދުމަށާއި އެ ބެންކުން ޑޮލަރު ދޫކުރުމުގައިވެސް ހާލަތު ބަދަލުވެ، ކުރިން އޮތް ހާލަތަށް ރުޖޫއަވުމުގެ މަސައްކަތް ވަރަށް ބާރަށް ކުރިއަށްދާ ކަމަށެވެ.
"މިހާރު އެބޭފުޅުން ޓީޓީ ހަދައިދިނުމުގައި ވެސް އަދި ބޭރު ފައިސާ ދޫކުރުމުގައި ވެސް ހާލަތު ބަދަލުވެ، ކުރީގެ ހާލަތަށް އިރާދަކުރެއްވިއްޔާ ރުޖޫއަވާން މަސައްކަތް ކުރަމުން އެ ގެންދަނީ ވަރަށް ބާރަށް. އެ ހާލަތު ބަދަލުވަމުން އެ އަންނަނީ،" ސައީދު ވިދާޅުވި އެވެ.
ރާއްޖެއަށް ޑޮލަރުގެ ދަތިކަން ދިމާވީ 1.4 ބިލިއަން ޑޮލަރުގެ ދަރަނި ދައްކަން ޖެހުމުންކަން ފާހަގަކުރައްވާ ސައީދު ވިދާޅުވީ އެ ދަރަންޏަކީ މީގެ ކުރިން ސަރުކާރަކުން ނުދައްކާހާ ބޮޑު ދަރަންޏެއް ކަމަށެވެ.
ޑޮލަރު ޓްރާންސްފާ އާއި ޓީޓީގެ ހިދުމަތް ހަފުތާއެއްގެ ތެރޭގައި ހައްލުވާނެ ކަމަށް ބީއެމްއެލް އިން ބުނީ ސެޕްޓެމްބަރު 19، ގަ އެވެ. ނަމަވެސް އޭގެ ފަހުން ވެސް އެ ހާލަތު ބަދަލު ނުވާ ކަމަށް ވިޔަފާރިތަކުން ބުނެފައިވެ އެވެ.
ޑޮލަރުގެ ޓްރާންސްފާގެ މައްސަލަ އާއި ޓީޓީ ހެދުމަށް ދަތިތަކެއް ދިމާވާ ކަމަށް ބީއެމްއެލް އިއުތިރާފުވީ، އެ މައްސަލަތައް ކުރިމަތިވަމުން އަންނަތާ އެތައް މަސްދުވަހެއް ފާއިތުވި ފަހުންނެވެ.
ޑޮލަރު ތާށިވުމުން ބޭންކުން ވަނީ ޑެޓިބް އަދި ކްރެޑިޓް ކާޑުން ކުރެވޭ މުއާމަލާތްތައް އިތުރަށް ހަނިކޮށްފަ އެވެ. މިހާރު ކޮންމެ ދުވަހަކު ވެސް މުޅި ރާއްޖެއަށް ކުރެވޭނީ އެންމެ 16 މިލިއަން ޑޮލަރުގެ ވިޔަފާރި އެވެ.
