މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް މިދިޔަ މަހު ލިބުނު ޑޮލަރުގެ އާމްދަނީ މިދިޔަ އަހަރުގެ އެ މުއްދަތާ އަޅައިބަލާއިރު 15 ޕަސެންޓު މަދުވެއްޖެ އެވެ.
މީރާގެ ތަފާސްހިސާބުތަކުން ދައްކާ ގޮތުގައި މިދިޔަ މަހު އެ އިދާރާއަށް ބަލައިގަނެފައި ވަނީ 126.8 މިލިއަން ޑޮލަރެވެ. ނަމަވެސް މިދިޔަ އަހަރުގެ ސެޕްޓެމްބަރު މަހު މީރާއަށް 150.2 މިލިއަން ޑޮލަރު ލިބިފައިވެ އެވެ.
މިދިޔަ މަހު ޑޮލަރުން ލިބުނު އާމްދަނީ ދަށްވި ނަމަވެސް، މީގެ މައިގަނޑު ސަބަބަކީ ފަތުރުވެރިކަމުގެ ދާއިރާއިން ލިބޭ ޓެކްސްތައް މަދުވުން ނޫން ކަމަށް މީރާގެ ރިޕޯޓުން އެނގެ އެވެ.
މީރާގެ އެންމެ ފަހުގެ ޓެކްސް ކަލެކްޝަން ރިޕޯޓުން ދައްކާ ގޮތުގައި ޑޮލަރު އާމްދަނީގެ ބޮޑު ބައެއް ހިއްސާކުރާ ޓީޖީއެސްޓީ އާއި ގްރީން ޓެކްސްގެ ގޮތުގައި ލިބުނު އާމްދަނީ މިދިޔަ އަހަރަށް ވުރެ މި އަހަރު އިތުރެވެ.
ނަމަވެސް އެއާޕޯޓު ޑިޕާޗާ ޓެކްސްގެ ގޮތުގައި ލިބުނު އާމްދަނީ ވަނީ ދަށްވެފަ އެވެ. އެގޮތުން މިދިޔަ އަހަރުގެ ސެޕްޓެމްބަރު މަހު އެއާޕޯޓު ޓެކްސްގެ ގޮތުގައި 12.9 މިލިއަން ޑޮލަރު ލިބުނު އިރު، މި އަހަރުގެ އެ މުއްދަތުގައި ލިބިފައި ވަނީ 11.2 މިލިއަން ޑޮލަރު އެވެ.
މީރާއިން ބަލައިގަތް ޑޮލަރު އާމްދަނީ (2026)
| Label | Value |
|---|---|
| ޖެނުއަރީ | 180.4 Million USD |
| ފެބްރުއަރީ | 126.8 Million USD |
| މާޗު | 205.1 Million USD |
| އޭޕްރިލް | 120.7 Million USD |
| މެއި | 88.5 Million USD |
| ޖޫން | 118.5 Million USD |
| ޖުލައި | 108.3 Million USD |
| އޮގަސްޓު | 98 Million USD |
| ސެޕްޓެމްބަރު | 126.8 Million USD |
މިދިޔަ އަހަރާއި މި އަހަރުގެ ޑޮލަރު އާމްދަނީގެ މެދުގައި ބޮޑު ފަރަގަކަށް މެދުވެރިވި މައިގަނޑު ސަބަބަކީ ލީސް ޕީރިއަޑް އެކްސްޓެންޝަން ފީގެ ގޮތުގައި ލިބުނު ފައިސާ މަދުވުމެވެ. މިދިޔަ އަހަރުގެ ސެޕްޓެމްބަރު މަހު މި ފީގެ ގޮތުގައި 33 މިލިއަން ޑޮލަރު ދައުލަތަށް ލިބިފައިވެ އެވެ. ނަމަވެސް މި އަހަރުގެ ސެޕްޓެމްބަރު މަހު އެ ދާއިރާއިން ލިބިފައި ވަނީ އެންމެ 375،000 ޑޮލަރު އެވެ.
މީގެ އިތުރުން ޓެކްސް ނޫން ގޮތްގޮތުން ޑޮލަރު އާމްދަނީ ވަންނަ އެހެން ދާއިރާތަކުން ލިބުނު ފައިސާ ވެސް ވަނީ ދަށްވެފަ އެވެ.
މިދިޔަ މަހު ޑޮލަރު ލިބުނު މިންވަރު މަދުވި ނަމަވެސް، މުޅި އަހަރަށް ބަލާއިރު މިހާތަނަށް ލިބުނު ޖުމްލަ ޑޮލަރުގެ އާމްދަނީ ވަނީ މިދިޔަ އަހަރަށް ވުރެ އިތުރުވެފަ އެވެ. އެ ގޮތުން މި އަހަރުގެ މިހާތަނަށް 1.2 ބިލިއަން ޑޮލަރު މީރާއަށް ލިބިފައިވާ އިރު، މިދިޔަ އަހަރުގެ މި މުއްދަތުގައި ލިބިފައި ވަނީ 1.1 ބިލިއަން ޑޮލަރު އެވެ.
މި އަހަރުގެ ޖުމްލަ އާމްދަނީ އިތުރުވުމުގެ މައިގަނޑު ސަބަބަކީ އަހަރުގެ ފުރަތަމަ ތިން މަސް ދުވަހުގެ ތެރޭގައި ރެކޯޑު އަދަދަކަށް ޑޮލަރުގެ އާމްދަނީ ލިބުމެވެ.
