ދިރާގު ދިވެހި ޕްރިމިއާ ލީގުގެ ފުރަތަމަ ބުރުގައި ގދ. ގައްދޫ ފުޓްބޯޅަ ޓީމުން ހަ ޕޮއިންޓް ހޯދަން ޖެހޭ ކަމަށް އެ ޓީމުގެ ކޯޗު، މުހައްމަދު ނަޒީހު ބުނެފި އެވެ.
ދިހަ ޓީމު ވާދަކުރާ ލީގުގައި މިހާތަނަށް ގައްދޫން ކުޅުނު ހަތަރު މެޗުން ވެސް ވަނީ ބަލިވެފަ އެވެ. އެއީ، އަމިއްލަ ދަނޑުގައި ކުޅެ، ނިއު ރޭޑިއަންޓް ސްޕޯޓްސް ކްލަބާއި ޓީސީ ސްޕޯޓްސް ކްލަބާއި ކްލަބް އީގަލްސް އަތުންނާއި މާލޭގައި ކުޅެގެން އޮޑި ސްޕޯޓްސް ކްލަބް އަތުންނެވެ. ލީގުގައި މިއަދު ހަވީރު ގައްދޫން ކުޅޭނީ ބުރު ސްޕޯޓްސް ކްލަބާ އެެވެ. އެ ޓީމަކީ ވެސް މި ފަަހަރުގެ ލީގުގައި ކުޅުނު ތިން މެޗުން ބަލިވެފައި އޮތް ޓީމެކެވެ. މި ފަހަރުގެ ލީގުގައި ޕޮއިންޓެއް ނުލިބި އޮތީ ގައްދޫ އާއި ބުރު އެވެ.
މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ނަޒީހު ބުނީ، މުބާރާތަށް ފެށިއިރު ވެސް ތައްޔާރުވި ހާލަތުގައި ގައްދޫން މަޑުމަޑުން ކުރިއަށްދަމުން އަންނަ ކަމަށެވެ. އަދި، މި ލީގުގައި މި ވަގުތު އޮތް ގޮތުން، އެންމެ ބޮޑެތި ޓީމުތަކާ ވާދަކުރާ ވަރުގެ ބަޖެޓެއް ގައްދޫ ޓީމުގައި ނެތް ނަަމަވެސް، އެކި ކަހަލަ ދަތިތައް ފަހަނަ އަޅައި ގޮސް މެޗުތަކަށް ތައްޔާރުވަމުން އަންނަ ކަމަށް ނަޒީހު ވަނީ ބުނެފަ އެވެ.
ބުރުއާ ދެކޮޅަށް ކުޅޭ މެޗަކީ ނަތީޖާ ނެރެން ވަރަށް އުންމީދުކުރާ މެޗެއްގެ ގޮތުގައި ނަޒީހު ފާހަގަކުރި އެވެ. އަދި، މެޗަކުން މޮޅުވުމަށްޓަކައި ނަސީބުގެ އެހީ ވެސް ލިބެނީ އެއާ އެއްވަރަށް މަސައްކަތްކޮށްގެން ކަމަށް ނަޒީހު ވަނީ ބުނެފަ އެވެ.
"ނަސީބަކީ ވެސް ކަމެއް ނުކޮށްތިއްބަކާ ދެއްވާ އެއްޗެއް ނޫން، އެ ކަންތައް ރަނގަޅަށް ކޮށްގެން އެ މީހުން ނަތީޖާ ނެރެނީ، އުންމީދުކުރަން ރަނގަޅު ނަތީޖާއެއް ނެރެވިދާނެކަން، އެއީ، ވަރަށް ހަމަހަމަ ދެ ޓީމު މިއީ. ދުވަހެއްގައި މޮޅުވާނެ ރަނގަޅަށް ކުޅޭ ޓީމަކަށް އެކަމަކު، އެހެން ނުކިޔޭނެ ތަންކޮޅެއް ބޮޑެތި ޓީމުތަކާ ކުޅޭއިރު، އެއީ ތިބޭނެ އިންޑިވިޖުައަލީ ވެސް ގޭމެއް ޗޭންޖްކުރާނެ ކުޅުންތެރިން، މިއީ، އެ ކަހަލަ ކުުޅުންތެރިންތަކެއް ނެތް ޓީމުތަކެއް ބޮޓަމް 4 ގައެއް. ނަތީޖާ ނެރުމަށް ތަންްކޮޅެއް ސަމާލުވެގެން ކުޅެއްޖިއްޔާ ހަމަ ރަނގަޅު ނަތީޖާ ނެރެވޭނެ،" ނަޒީހު ބުންޏެވެ.
ގައްދޫ އަށް އެންމެ ބޮޑު ގޮންޖެހުމަކަށް އޮތް އެއް ކަމަކީ، ޕްރިމިއާ ލީގުގެ ލެވަލްގައި ކުޅެފައި ތިބި ދިވެހި ކުޅުންތެރިން ޓީމުގައި ނެތުމާއި ވަކި މަގާމުތަކަށް އެންމެ ރަނގަޅު ބިދޭސީ ކުޅުންތެރިން ނެގުމުގައި ހުރި ދަތިތަކެވެ.
މިއަދު ބުރުއާ ދެކޮޅަށް ކުޅޭ މެޗުން ބަލިވިޔަސް މުޅިން އުންމީދު ކެނޑިގެންނުދާނެ ކަމަށާއި އެކަމަކު، މި މެޗުގެ ނަތީޖާ އަކީ ޓާގެޓް ކަނޑައަޅައިގެން ދިއުމަށް މުހިންމު މެޗެއް ކަމަށް ނަޒީހު ވަނީ ބުނެފަ އެެވެ.
"އަޅުގަނޑަކީ ވަރަށް ދުރަށް ހިސާބު ހަދައިގެން އަންނަ މީހެއް، ހިސާބު ބައެއް ފަހަރު ދިމާނުވެވެސް ދޭ. އެހެން ނަމަވެސް، 12 ޕޮއިންޓަކީ ޔަގީން ވަރެއް. ވަރަށް ގިނަ ފަހަރަށް، ބޮޓަމް 4 އަށް ދާ ޓީމުތަކުގެ ތެރެއިން މިދިޔަ ސީޒަނަށް ބެލިކަމުގައި ވިޔަސް އެބައުޅޭ 9 ޕޮއިންޓް 10 ޕޮއިންޓް، ވެއްޓުނު ޓީމުތަަކަށް ބަލާއިރު، އެހެންވީމަ، 12 ޕޮއިންޓުން މައްޗަށް ދެވިއްޖިއްޔާމު އެއީ ރަނގަޅު ވަރެއް، މި ބުރުގައި ހަ ޕޮއިންޓް ނުހޯދައިފިނަމަ ވަރަށް ނާދިރު ކަމެކޭ ބުނެވޭނީ ސަލާމަތްވުމަކީ،" ނަޒީހު ބުންޏެވެ.
ދިވެހި ޕްރިމިއާ ލީގު އަތޮޅުތަކުގެ ތެރޭ މެޗުތައް ކުޅޭ ގޮތަށް މިހާރު ކުރިއަށްދާއިރު، މި ސީޒަނުގައި އެ ފުރުސަތު ލިބުނީ ގައްދޫގެ އިތުރުން، ހއ. ދިއްދޫ އެވެ. ދިއްދޫން ވަނީ ޕްރިމިއާ ލީގުގައި ބުރު ބަލިކުރުމުގެ އިތުރުން ނިއުއާ އެއްވަރުކޮށްަފަ އެެވެ. ގައްދޫ އަށް ދިއްދޫއާ ވާދަކުރެވިދާނެތޯ ސުވާލުކުރުމުން، ނަޒީހު ބުނީ، އެކަން ކުރެވޭނީ ވެސް ގައްދޫން ކަންތައްތަކެއް ރަނގަޅުކޮށްގެން ކަމަށެވެ.
"މިސާލަކަށް އަޅުގަނޑުމެންގެ މިޑްފީލްޑް ތެރޭގައި، މީގެ އެބަހުރި މި ވަގުތުގެ ހާލަތަށް ބަލީގެ ކަންކަން ވެސް އެބައުޅޭ ބައެއް ކުޅުންތެރިންގެ، އެ އެންމެން ފިޓްވެގެން ނުކުމެއްޖިއްޔާ ވާދަކުރެވޭނެ. ގައްދޫ އަށް ދިމާވާ މައްސަލަ އަކީ އިންޖީނުގެ މައްސަލަ އެއީ މިޑްފީލްޑްގައި. އެހެން ހުރިހާ ޓީމެއްގައި ވެސް މިޑްފީލްޑްގައި އެބަކުޅޭ ބޭރު ކުޅުންތެރިން. ގައްދޫން މި ކުޅެނީ މުޅިން ލޯކަލް ކުޅުންތެރިން، ދިއްދޫން އެ ނެރޭ ނަތީޖާތަކާ ދިއްދޫގެ ގޭމަށް ބަލާއިރު ވަރަށް ރަނގަޅު ފުޓްބޯޅައެއް ކުޅެމުން އެބަދޭ، އެ މީހުންނަށް ތައުރީފު ހައްގު، ނިއު ރޭޑިއަންޓް އަތުން ވެސް ޕޮއިންޓެއް ރަށުގައި ހޯދައިފި، ހަމަ ރަަނގަޅަށް ކުޅެ ޕޮއިންޓެއް ހޯދައިފި، ހަމަ ޕޮއިންޓެއް ލިބުނީކީއެއް ނޫން،" ނަޒީހު ބުންޏެވެ.
ބުރުގެ ކޯޗު ސްޕެއިނުގެ ކްރިސްޓިއަން ރޮޑްރިގޭޒްގެ އިރުޝާދުގެ ދަށުން އެ ޓީމުން މިހާތަނަށް ކުޅުނު ހަ މެޗުން ވެސް ވަނީ ބަލިވެފަ އެވެ. އެއީ، ކަޕް ވިނާސް ކަޕް ތިން މެޗާއި ޕްރިމިއާ ލީގުގެ ތިން މެޗުގަ އެވެ.
ރޮޑްރިގޭޒް އަންނަނީ ޓީމުގެ ހާލަތު ރަނގަޅު ކުރުމަށްޓަކައި ގިނަ ކަންތައްތަކެއް ކުރަމުންނެވެ. އެ ގޮތުން، ގައްދޫ މެޗަށް ނުކުންނައިރު ވެސް ޓީމަށް ކޮންމެ ވެސް ވަރެއްގެ ބަދަލުތަކެއް ގެނެސްގެން މެޗުން ނަތީޖާ ނެެރެވޭތޯ މަސައްކަތްކުރާނެ ކަމަށް ރޮޑްރިގޭޒް ވަނީ ބުނެފަ އެވެ.
"އަހަރެމެންނަށް މި އޮތީ އުނދަގޫ ޗެލެންޖެއް. ހަގީގަތުގައި ވަރަށް މަސައްކަތް އެބަކުރޭ، ކުޅެން ވެސް ކުޅޭ، މައްސަލަ މި އަންނަނީ ނަތީޖާ ނުނެރެވިގެން، އެކަން ރަނގަޅުވިހާ އަވަހަކަށް ބުރުގެ ކަންކަން ދާނީ ރަނގަޅަށް އަަހަރެން މި ހުރީ އުންމީދާ އެކު،" ރޮޑްރިގޭޒް ބުންޏެވެ.
ގައްދޫ އާއި ބުރު ކުޅޭ މެޗު ފަށާނީ މިއަދު ހަވީރު 16:00 ގަ އެވެ.
