ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ހއ. ދިއްދޫ ފުޓްބޯޅަ ޓީމުން ރާއްޖޭގެ ފުޓްބޯޅައިގެ ގަދަބާރު، ނިއު ރޭޑިއަންޓް ސްޕޯޓްސް ކްލަބާ 2-2 އިން އެއްވަރުވެއްޖެ އެވެ.
މި މެޗުގައި ދިއްދޫ ލީޑުގައި އޮއްވައި، ނިއު އިން އެއްވަރުކުރީ މެޗުގެ އިތުރު ވަގުތުގެ 10 ވަނަ މިނިޓްގެ ވެސް ފަހު ވަގުތު އެވެ.
ހޯމް އެންޑް އަވޭ ސިސްޓަމަށް ކުޅޭ ގޮތަށް ރާއްޖޭގެ ޕްރިމިއާ ލީގު މި ފަހަރު ބަދަލުވިއިރު، ދިއްދޫން ފުރަތަމަ ތިން މެޗު ކުޅެފައިވަނީ، މާލޭގަ އެވެ. ފުރަތަމަ މެޗުން ބުރު ސްޕޯޓްސް ކްލަބް އަތުން މޮޅުވިއިރު، ދިއްދޫ ދެން ކުޅުނު ދެ މެޗުން ވިކްޓަރީ ސްޕޯޓްސް ކްލަބާއި ބިސް ބުރު ސްޕޯޓްސް ކްލަބް އަތުން ބަލިވީ އެވެ. މީގެ ތެރެއިން ވިކްޓަރީ މެޗުގައި ދިއްދޫން ވަނީ ފަހަތުން އަރައި 3-3 އިން އެއްވަރުކޮށްފަ އެވެ. އެހެން ނަމަވެސް، 4-3 އިން ބަލިވީ އެވެ. އެކަމަކު، ދިއްދޫން މިއަދު ނިއު ރޭޑިއަންޓާ އެއްވަރުކޮށް މި ވަނީ ދިވެހި ފުޓްބޯޅައިގައި ތާރީހީ ސޮފުހާއެއް ލިޔެފަ އެވެ.
ދިއްދޫ ފުޓްބޯޅަ ދަނޑުގައި މިއަދު ހަވީރު ކުޅުނު މެޗުގެ ފުރަތަމަ 13 މިނިޓް ތެރޭ ދިއްދޫން ވަނީ ނިއު ކޮޅަށް ދެ ލަނޑު ޖަހައިފަ އެވެ. މެޗުގެ ނުވަ ވަނަ މިނިޓްގައި އޭރިއާތެރެއަށް ހުރަސްވި ބޯޅައަކުން އުފާލް އަބްދުﷲ ވަނީ ބޮލުން ގޯލަށް ފޮނުވާލައި ދިއްދޫ އަށް ލީޑުނަަގައިދީފަ އެވެ. އަދި، އޭގެ ތިން މިނިޓް ފަހުން، އުފާލް ހުސްކޮށްލާފައި ދިން ބޯޅައަކަށް އަރައި، އައިވަރީ ކޯސްޓުގެ ފޯވާޑް، ޓެޓޭ ގިޑިއޯން ވަނީ ދިއްދޫގެ ދެ ވަނަ ލަނޑު ޖަހައިފަ އެވެ. އޭނާ މި ލަނޑު ޖެހީ، ނިއުގެ ކީޕަރު އަހުމަދު ސަމީރު ކައިރިން ނައްޓާފައި ގޮހެވެ.
ނިއު އިން މެޗުގެ ތެރެއަށް އަންނަން ކުރި މަސައްކަތުގައި އެ ޓީމުގެ ކެޕްޓަން، އަލީ އަޝްފާގު (ދަގަނޑޭ) ފޮނުވާލި ހިލޭ ޖެހުމެއް ވަނީ ހުރަސްދަނޑިއަށް އަމާޒުވެފަ އެވެ. ނިއުގެ އެޓޭކު ވަރުގަދަކުރަން، 30 ވަނަ މިނިޓްގައި އަލީ ފާސިރު (ސެންޓޭ) ކުޅެން އެރުވި އެވެ. އެއާ އެކު ނިއުގެ އެޓޭކް އަވަސްވެ، 34 ވަނަ މިނިޓްގައި ލަނޑު ޖެހި އެވެ. މިއީ، އޭރިއާތެރެއަށް މަތިން ހުރަސްވި ބޯޅައެއް ހޯދަން ދިއްދޫގެ ކީޕަރު މުަހައްމަދު ޝިފާން އެރި ނަމަވެސް އެ ބޯޅަ ހޯދައިގެން، ނިއުގެ ދަގަނޑޭ ޖެހި ގޯލެކެވެ.
ދިއްދޫ އަށް ފުރަތަމަ ހާފު ނިމުމުގެ ކުރިން ތިން ވަނަ ލަނޑެއް ޖަހައިދޭން ޓެޓޭ އާއި އަބްދުﷲ އަޝްފާގަށް ލިބުނު ފުރުސަތުތަކުގައި ޖެހި ޝޮޓްތައް ކީޕަރު ސަމީރު ވަނީ ހުއްޓުވައިފަ އެވެ. ދެ ވަނަ ހާފުގެ ކުރީކޮޅުގައި ދިއްދޫ އަށް ދެ ގޯލުގެ ލީޑެއް ނަގައިދޭން ލިބުނު ފުރުސަތުގައި އެ ޓީމުގެ ކުޅުންތެރިންނަށް ބޭނުމެއް ނުހިފުނެވެ.
ނިއު އިން އެންމެ ފަހުން، މާޒިޔާ ބަލިކުރި މެޗެކޭ އެއްގޮތަށް މި މެޗުގައި ވެސް ދެ ވަނަ ހާފުގައި ގޯލެއް ޖެހޭތޯ ގިނަ ކުޅުންތެރިން އެޓޭކަށް ފޮނުވައިގެން މަސައްކަތް ކުރަމުންދިޔަ އެވެ. އޭގެ ނަތީޖާއެއް ފެނުނީ، މެޗުގެ އިތުރު ވަގުތުގެ ވެސް ފަހު ސިކުންތުކޮޅުގެ ތެރޭގަ އެވެ. އޭރިއާތެރެއިން ނިއުގެ ލައިބީރިއާގެ މިޑްފީލްްޑަރު، ޔާޔާ ބިލިޓީ އަށް ލިބުނު ފުރުސަތުގައި ޖެހި ބޯޅަ ކީޕަރު ޝިފާނަށް ނުލިބި ގޯލަށް ވަނީ އެވެ.
ލީގުގައި ދިއްދޫން ކުޅުނު ފުރަތަމަ ހަތަރު މެޗުން ލިބުނު ހަތަރު ޕޮއިންޓާ އެކު އެ ޓީމު އޮތީ ލީގުގެ ހަތް ވަނައިގަ އެވެ.
