އިންޑިއާގެ ލަކީ ގްލޯބަލް ޕްރޮޖެކްޓްސް ކުންފުންޏަށް ދައްކަން ޖެހޭ 11.7 މިލިއަން ރުފިޔާ އެއްފަހަރާ ދައްކަން ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގެ މައްޗަށް ސިވިލް ކޯޓުން ހުކުމްކޮށްފިއެވެ.
މި މައްސަލައަކީ 2023 ވަނަ އަހަރު ދެ ކުންފުނީގެ މެދުގައި ވެފައިވާ އެއްބަސްވުންތަކެއްގެ ދަށުން ދައްކަންޖެހޭ ފައިސާ ނުދައްކައިގެން ކޯޓަށް ހުށަހެޅި މައްސަލައެކެވެ.
މި ފައިސާ ދެއްކުމާ ގުޅޭގޮތުން ދެ ކުންފުނީގެ މެދުގައި މި އަހަރުގެ ތެރޭގައި ތިން ސެޓްލްމަންޓް އެއްބަސްވުމެއް ހެދި އެވެ. ނަމަވެސް އާރުޑީސީން އެ އެއްބަސްވުންތަކާ އެއްގޮތަށް ފައިސާ ދައްކާފައެއް ނުވެ އެވެ.
މި މައްސަލައިގެ ޝަރީއަތުގައި އާރުޑީސީން ވަނީ ލަކީ ގްލޯބަލްއަށް ދައްކަންޖެހޭ ފައިސާއަށް އެއްބަސްވެފަ އެވެ. އާރުޑީސީން ބުނި ގޮތުގައި އެއްބަސްވި ގޮތަށް ފައިސާ ނުދެއްކުނީ ކުންފުނީގެ މާލީ ހާލަތު ދަށްވުމުގެ ސަބަބުންނެވެ.
މާލީ ދަތިތަކާ ހުރެ އާރުޑީސީން ކޯޓުގައި އެދުނީ އެ ފައިސާ މަހުން މަހަށް ބަހާލައިގެން ދެއްކޭނެ ލުއި ގޮތްތަކެއް ހަމަޖައްސައިދިނުމަށެވެ. އަދި އެކަމާ ގުޅޭގޮތުން ލަކީ ގްލޯބަލްއާ މަޝްވަރާ ކުރަމުންދާ ކަމަށްވެސް އާރުޑީސީން ބުންޏެވެ.
ނަމަވެސް ލަކީ ގްލޯބަލްއިން ވަނީ އާރުޑީސީން އެދުނު ލުއިތަކަށް އިއުތިރާޒުކޮށްފަ އެވެ. އެ ކުންފުނިން އެދުނީ ޝަރީއަތުގެ އިތުރު އަޑުއެހުމަކަށް ނުގޮސް، އެ ފައިސާ އެކީ އެއްފަހަރާ ދެއްކުމަށް އަމުރުކޮށްދިނުމަށެވެ.
ރާއްޖޭގެ މަދަނީ އިޖުރާއަތުގެ ގާނޫނު ބުނާގޮތުން ދަރަނި އަދާކުރުމުގައި ބައިބަޔަށް ބަހާލައިގެން ފައިސާ ދެއްކުމުގެ ލުއި ދެވޭނީ އެކަމަށް އަރަނިވެރިޔާ ނުވަތަ ފައިސާ ލިބެން ޖެހޭ ފަރާތުން އެއްބަސްވާނަމަ އެވެ. މި މައްސަލައިގައި ލަކީ ގްލޯބަލްއިން އެކަމަށް އެއްބަސްނުވުމުން، ކޯޓުން ނިންމީ އާރުޑީސީން އެ ފައިސާ އެއްކޮށް ދައްކަން ޖެހޭނެ ކަމަށެވެ.
އާރުޑީސީއަކީ އުފެދުނީއްސުރެ ބޮޑެތި ގެއްލުންތަކެއްވަމުންދާ ކުންފުންޏެކެވެ. އެ ކުންފުނީގެ ތެރޭގައި ކޮރަޕްޝަންގެ ބޮޑެތި މައްސަލަތަކެއް ހުރިކަމަށާއި، ގިނަ އަދަދެއްގެ ފައިސާ ގެއްލިފައިވާ ކަމުގެ ތުހުމަތުތައް އަބަދުވެސް ކުރެވެ އެވެ.
ސަރުކާރުން މިހާރު ނިންމާފައިވަނީ ހަރަދު ކުޑަކުރުމުގެ ފިޔަވަޅެއްގެ ގޮތުން އާރުޑީސީ އުވާލައި، އެމްޓީސީސީގެ ދަށަށް އެ ކުންފުނީގެ މަސައްކަތްތައް ބަދަލުކުރުމަށެވެ.
