ސިވިލް ކޯޓުގައި ހިނގަމުން އަންނަ ވިޔަފާރީގެ ބޮޑެތި މައްސަލަތައް ހިންގުުން އަވަސް ކުރުމުގެ ގޮތުން އެ ފަދަ މައްސަލަތައް ބަލަން ހާއްސަ މާކެންޓައިލް ކޯޓެއް ގާއިމުކުރުމުގެ ވިސްނުން ސަރުކާރުން ގެންގުޅޭ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
މުއިއްޒު މިކަން ހާމަކުރެއްވީ، މަދަނީ އިޖުރާއަތުގެ ނިޒާމަށް ބޮޑެތި ބަދަލުތަކެއް ގެނެސް، ކުދި އަދަދުތައް ހިމެނޭ މައްސަލަތަކާއި ބޮޑެތި އަދަދުތައް ހިމެނޭ މައްސަލަތައް ވަކިން ބެލޭނެ ނިޒާމެއް ގާއިމުކުރަން ގެންނަން އުޅޭ ކަން އިއުލާންކުރައްވަމުންނެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، މިކަމުގެ މައުލޫމާތު ދެއްވަމުން މުއިއްޒު ވިދާޅުވީ ސަރުކާރުން ގެންގުޅެނީ ދެ ވިސްނުމެއް ކަމަށެވެ. އެ މި ކޯޓު ގާއިމުކުރުން ނޫނީ ސިވިލް ކޯޓުގައި މި ފަދަ މައްސަލަތަކަށް ހާއްސަކޮށްގެން ޑިވިޝަނެއް ގާއިމުކުރުމެވެ.
މުއިއްޒު ވިދާޅުވީ މިކަމާ ގުޅޭ ފަންނީ ދިރާސާތައް މިހާރު ކުރަމުންދާއިރު، ސަރުކާރުން ނިންމާ ގޮތަކަށް ގާނޫނުތައް ބަދަލުކުރަން މި ފެށޭ ރައްޔިތުންގެ މަޖިލީހުގައި ދައުރުގެ ތެރޭގައި ހުށަހަޅުއްވާނެ ކަމަށެވެ. އަދި، މި ބަދަލުތައް ގެނެވުމުން، ކޯޓުތަކުގައި ތާށިވެފައި ހުރި އެތަކެއް މިލިއަން ރުފިޔާއެއް ހިމެނޭ މައްސަލަތައް ހިންގުން އަވަސްވެ، ފަސޭހަވެގެން ދާނެ ކަމަށް އެމަނިކުފާނު ވިދާޅުވި އެވެ.
"މިހާރު އެބަހުރި ކޯޓުތަކުގައި ވިޔަފާރިއާ ގުޅޭ އާންމު ރައްޔިތުންގެ ބައިވަރު މައްސަލަތައް. މިލިއަންސް އޮފް މިލިއަންސް އޮފް ރުފިޔާގެ މައްސަލަތައް، ލަސްކަމާ އެކީގައި ހިނގަނީ. އެހެން ނަމަވެސް އެއީ އަވަސް ކުރެވިދާނެ ކަންކަން،" މުއިއްޒު ވިދާޅުވި އެވެ.
ސަރުކާރުން މަދަނީ އިޖުރާއަތު ބަދަލުކުރަން ހުށަހަޅާފައިވާ ގޮތުން މަދަނީ މައްސަލަތައް ބަލަން ތިން ކޯޓު ނޫނީ ދެ ކޯޓު އޮންނާނެ އެވެ. ތިން ކޯޓު އޮންނާނީ ސިވިލް ކޯޓު އޮވެފައި ކުދި މައްސަލަތަކަށް ސްމޯލް ކްލެއިމްސް އަދި ބޮޑު މައްސަލަތަކަށް މާކެންޓައިލް ކޯޓު ގާއިމުކުރަން ނިންމާ ހާލަތެއްގަ އެވެ. ބޮޑު މައްސަލަތަކަށް ވަކި ކޯޓެއް ގާއިމު ނުކުރާ ނަމަ އޮންނާނީ ދެ ކޯޓެވެ.
މި ބަދަލުތައް ގެންނަނީ، ސަރުކާރުން ބުނާ ގޮތުގައި، ވިޔަފާރިތަކަށް ފަހިކުރުމުގެ ޝަރުއީ ދާއިރާ ހަކަތަރި (އެފިޝެންޓް) ކުރާށެވެ.
