މަދަނީ ކުދިކުދި މައްސަލަތައް އަވަހަށް ނިންމޭނެ ނިޒާމެއް ގާއިމުކުރުމަށް ޓަކައި ސްމޯލް ކްލެއިމްސް ކޯޓެއް ގާއިމުކުރަން ނިންމާފައިވާ ކަމަށް ރައީސް މުހައްމަދު މުއިއްޒު މިއަދު އިއުލާންކުރައްވައިފި އެވެ.
ރައީސް އޮފީހުގައި އޮތް ނޫސްވެރިންގެ ބައްދަލުވުމެއްގައި މުއިއްޒު ވިދާޅުވީ، މި ކޯޓު ގާއިމުކުރަން ކޯޓުތަކާ ބެހޭ ގާނޫނާއި މަދަނީ އިޖުރާއަތުގެ ގާނޫނަށް ގެންނަން ޖެހޭ ބަދަލުތައް މި ފެށޭ ރައްޔިތުންގެ މަޖިލީހުގެ ދައުރުގެ ތެރޭގައި ހުށަހަޅުއްވާނެ ކަމަށެވެ.
ސްމޯލް ކްލެއިމްސް ކޯޓަކަށް ބޭނުންޖެހިފައިވާ މިންވަރު ބަޔާންކުރައްވަމުން މުއިއްޒު ވިދާޅުވީ މިހާރު މަދަނީ އިޖުރާއަތުގެ ނިޒާމު އޮތް ގޮތުން ލަސްތައް ދިމާވެ، ވަރަށް ދަތިވާ ކަމަށެވެ. އެހެންކަމުން މިހާރު ހުށަހަޅާފައިވާ ބަދަލުތަކަކީ، މިކަން ހައްލުކުރުމުގެ ގޮތުން ކޯޓުގެ މަރުހަލާތަކާއި އިޖުރާއަތުތައް ފަސޭހަކޮށް، އަވަސްކުރަން ގެންނަ ބަދަލުތަކެއް ކަމަށް އެމަނިކުފާނު ވިދާޅުވި އެވެ.
"އޭރުން ކުދިކުދި މައްސަލަތައް، މިސާލަކަށް އެއް ލައްކަ ރުފިޔާއަށް ވުރެ ކުދި މައްސަލަަތައް ފަސޭހައިން ހުށަހެޅި، އަވަހަށް ނިންމާލެވޭނެ. އަވަސް ނިޔާ ކޯޓު ނިޒާމެއް ގާތްގަނޑަކަށް،" މުއިއްޒު ވިދާޅުވި އެވެ.
މި ކޯޓު ގާއިމުކުރެވުމުން، މުއިއްޒު ވިދާޅުވީ، އާންމުންނާ އެކުއެކީ ކުދި ވިޔަފާރިތަކަށް ވެސް ފަސޭ ހަވެގެން ދާނެ ކަމަށެވެ.
ސަރުކާރުން ވަނީ ބޮޑެތި ވިޔަފާރިތަކާ ގުޅިފައި ހުރި މައްސަލަތައް ހިންގުން އަވަސް ކުރަން ވެސް ބަދަލުތަކެއް ގެންނަން ނިންމާފަ އެވެ. މުއިއްޒު ވިދާޅުވީ ސަރުކާރުން ވިސްނަމުން ދަނީ މި ފަދަ މައްސަލަތައް ބަލަން ހާއްސަ ކޮމާޝަލް ޑިވިޝަނެއް ސިވިލް ކޯޓުގައި ގާއިމުކުރަން ނޫނީ ވަކިން މާކެންޓައިލް ކޯޓެއް ގާއިމުކުރަން ކަމަށެވެ.
"މިހާރު އެބަހުރި ކޯޓުތަކުގައި ވިޔަފާރިއާ ގުޅޭ އާންމު ރައްޔިތުންގެ ބައިވަރު މައްސަލަތައް. މިލިއަންސް އޮފް މިލިއަންސް އޮފް ރުފިޔާގެ މައްސަލަތައް، ލަސްކަމާ އެކީގައި ހިނގަނީ. އެހެން ނަމަވެސް އެއީ އަވަސް ކުރެވިދާނެ ކަންކަން،" މި ބަދަލު ގެންނަން ޖެހޭ ސަބަބު ކިޔައި ދެއްވަމުން މުއިއްޒު ވިދާޅުވި އެވެ.
މުއިއްޒު ވަނީ ސަރުކާރުން ގެންނަ ބަދަލުތަކާއެކީ އާންމުންނާއި ކުދި ވިޔަފަރިތަކާއި ބޮޑެތި ވިޔަފާރިތަކަށް ވެސް މަދަނީ މައްސަލަތައް ހިންގުމުގައި ބޮޑެތި ފަސޭހަތަކެއް ލިބިގެން ދާނެ ކަމުގެ ޔަގީންކަން އަރުވާފަ އެވެ.
ކުދި މައްސަލަތަކާއި ބޮޑެތި މައްސަލަތައް ބައިކޮށް، މަދަނީ އިޖުރާއަތު ބަދަލުކުރަން އުޅޭއިރު، މިހާރު އެ މައްސަލަތައް ބަލާ ސިވިލް ކޯޓަކީ ރާއްޖޭގައި އެންމެ ގިނަ މައްސަލަތައް ހުށަހަޅާ އަދި އެންމެ ގިނަ މައްސަލަތައް ބަލާ ކޯޓެވެ. މީގެ ސަބަބުން އާދައިގެ މައްސަލަތަކުގައި ނިޔާ އިއްވަން ވެސް އަހަރުތަކެއް ނަގަ އެވެ.
އެ ކޯޓުން އާންމުކޮށްފައިވާ ނިމުނު އަހަރުގެ ތަފާސްހިސާބުތަކުން ދައްކާ ގޮތުގައި، އެ ކޯޓުގެ ހުޅުމާލެ ޑިވިޝަން ހިމެނޭ ގޮތަށް 10،439 މައްސަލަ ކުރިއަށް ގެންގޮސްފައިވެ އެވެ. މީގެ ތެރެއިން 6،719 މައްސަލައެއް ވަނީ ނިންމާފަ އެވެ.
މި ވަރަށް މައްސަލަ ނިންމި ނަމަވެސް، މިދިޔަ އަހަރު ނިމުނުއިރު ވެސް ތިން އަހަރަށް ވުރެ ގިނަ ދުވަސްވެފައިވާ 310 މައްސަލަ އޮތެވެ.
